ئازاد جندیانی
لەیادی ٧٧ ساڵەی دامەزراندنی پارتی دیموکراتی کوردستان (١٦ی ئابی ١٩٤٦) پیرۆزبایی گەرم لە هەموو تێکۆشەرانی پارتیمان و خەڵكی كوردستان ئەکەم . لەم بۆنەیەدا سڵاو بۆ ڕۆحی تا ئەبەد کوردانە و شۆشگێڕانەی بارزانی نەمر ئەنێرم، وەک چۆن هاوکات پیرۆزبایی لە گیانی پڕلەکوردایەتی باوکی نەمریشم (وهاباغا) ئەکەم، کە لەپاڵ کۆمەڵێک شانازی نەتەوەییدا، شانازی مەزنی ئەوەشی بۆ ماڵبات و کەس و کار و خزم و هاوشارەکانی و بۆ سەرجەم تێکۆشەرانی کوردستان بەجێهێشتووە، کە بەڕێبەرایەتی بارزانی نەمر لە شۆڕشی بارزاندا، لە بەرگری پێشمەرگانە لە کۆماری کوردستان لە ڕۆژهەڵاتی كوردستاندا بەشداربووەو ماوەیەکی زۆریشی لە ژووری چاوەڕوانی لەسێدارەداندا لەزیندان بەسەربردووە، هەروەها دواتر، تا دواهەناسەشی لەشۆڕشی ئەیلولی مەزندا پێشمەرگە بووە.
شانازیەکی تری بەرزو پیرۆزی تریشمان لەئەمڕۆدا، یادکردنەوەی دامەزراندنی پارتی دیموکراتی کوردستانە، کە باوکی نەمرو پڕلەشانازی و سەروەریمان بەڕێبەرایەتی بارزانی نەمر یەکێک بووە لەو (نۆ) تێکۆشەرە نموونەییانەی کوردایەتی کە بڕیاری دامەزراندنی پارتیان دا، وەک پێویستیەکی مێژووکرد بۆ کوردایەتی.
لەم یادەدا، پیرۆزبایی لە سەرۆکی هێژامان سەرۆک بارزانی و هەموو ڕێبوارانی کوردایەتی ئەکەم و دڵنیاشم کە هەوڵەکانی داگیرکەرو دوژمن و نەیاران لەبەرامبەر ڕەوتی سەربەخۆخوازانەی سەرۆک بارزانی شکست دێنن و پارتیش وەک ئامرازێکی ستراتیژی بۆ سەرکەوتن ؛ نەک هەر لە بەهێزیدا ئەمێنێتەوە ؛ بەڵکو بەردەوام لەبەهێزبووندا ئەبێ . هەروەها پیرۆزبایی گەرم لە سەرۆك بارزانی ئەكەم كە یادی لەدایكبوونی بەڕێزیان هاوكاتە لەگەل یادی دامەزراندنی پارتی دیموكراتی كوردستان، ئەرکی هەمووشمانە، کە بەشێوەیەکی کاراو و بوێرانە و مکوڕانە بە ئاراستەی سەرکەوتندا خەباتە فرە ڕەهەندەکەمان بەداهێنانی نوێ چەشنەوە پەرەپێبدەین . ئەشمەوێ ئەم پەیامەم بە دروشمە دێرینەکەی کوردایەتی (کوردستان یان نەمان) کۆتایی پێ بێنم ؛ چونکە بڕوای زۆرم بەوەهەیە، کە تا پیلانگێڕی و دوژمنایەتیکردنی کوردایەتی مابێ و تا دوژمن و نەیارانی دوورونزیک بەبەردەوامی بۆ لەناوبردنی بوون و سەروەری نەتەوەییمان لە هیچ سیاسەتێکی قێزەوون و نامرۆڤانەو دوژمنکارانە سڵ نەکەنەوە، ئەوا ئەبێ ئێمەش بێ دوودڵی ئەودروشمەمان لە بڵندیدا بهێڵینەوە، کە لە جەرگەی خەباتی بەرگری و خەباتی ڕزگاریخوازیماندا لەدایک بووەو نزیک بە شەست ساڵە بۆتە دروشمێکی بەرزی خۆڕاگری و کوردایەتی، وەک چۆن ئەبێ ئەودروشمە لە ناو دڵ و دەروون و لە ڕەفتاری دلێرانەی نەتەوەییماندا وەک بڕوا و ئاکارێکی پارتیانەش بمێنێتەوەو ببێتە توێشوو و پشکۆی تێکۆشان، لەڕاستیدا هەر ئەو دروشمەیە کە بۆتە هەوێن و هۆکاری وەدەستهێنانی ئەو شانازییانەی ئێستا هەمانە.
دووبارە پیرۆزەو بەرز و بڵند بێ ئاڵای کوردستان و ئاڵای پارتیمان.
