مەهدی محەممەد – زاری کرمانجی :
محەممەد قادر زادە، دوو جار وەک بچووکترین پیاوی جیهان، ناوی لە نێو پەرتووکی ژمارە پێوانییەکانی (گینس) تۆمارکراوە، لە ئێستادا بە سەردانێک لە هەرێمی کوردستانە و وێنەیەکی یادگاری لە باوەشی پارێزگاری هەولێر گرتووە.
ئومێد خۆشناو پارێزگاری هەولێر لە بارەی هاتنی بچووکترین پیاوی جیهان بۆ هەرێمی کوردستان دەڵێ : “وەک ڕێزلێنان محەمەد قادر زادە کە بچووکترین پیاوی جیهانە لە شوێنی خۆمان دانیشاند و خۆشحاڵیمان بە دیداری ناوبراو دەربڕی کە دوو جار ناوی چۆتە کتێبی گینسەوە، جارێک لە ئیمارات و جارێکی تر لە ئیتاڵیا، لە ئێستاشدا خاوەنی بچووکترین دەست و کورتترین باڵایە لە جیهاندا.”
محەممەد قادر زادە ی تەمەن 22 ساڵ، لە گوندێکی سەر بە شاری بۆکان لەدایکبووە، بەرزی باڵای 65 سانتیمەترە لەسەر ئەو بنەمایەش وەک بچووکترین پیاوی جیهان دیاریکراوە.
بچووکترین پیاوی جیهان لە زۆربەی یاد و بۆنە نەتەوەیی و نیشتمانییەکان بە جلوبەرگی کوردی دەردەکەوێت و شانازی بە زمان و کولتوور و نەتەوەیی بوونی خۆی دەکات کە وەک کوردێک توانیویەتی بۆ دوو جار لەسەر ئاستی جیهان نازناوی بچووکترین پیاوی جیهان بەدەست بهێنێت.
لە ئێستادا کورد بچووکترین و درێژترین پیاوانی جیهانی بۆ خۆی مسۆگەر کردووە، محەممەد قادر زادە لە ڕۆژهەڵاتی کوردستان بە بچووکترین و سوڵتان کۆسین ی تەمەن 41 ساڵ لە باکووری کوردستان بە درێژترین پیاوی جیهان لە نێو پەرتووکی گینس ناویان تۆمار کراوە .
