زاری كرمانجی-سۆران:
شاندەكەی حكوومەتی هەرێمی كوردستان كە دوێنێ چوونەتە بەغدا، راگەیەنراوێكیان بڵاو كردەوە و تێیدا هاتووە، لە كۆبوونەوەی دوێنێدا گفتوگۆ لەبارەی دوو بابەت كراوە.
ئومێد سەباح سەرۆكی دیوانی ئەنجوومەنی وەزیران بڵاوی كردووەتەوە، وەك شاندی حكوومەتی هەرێمی كوردستان لەبارەی پڕۆژەیاسای نەوت و گاز سەردانی شاری بەغدامان كرد، كۆبوونەوەمان لەگەڵ لایەنە پێوەندیدارەكانی حكوومەتی عێراقی فیدراڵ لەبارەی پڕۆژەیاساكە ئەنجام دا.
باسی لەوەش كردووە، لە كۆبوونەوەكە لەسەر بنەمای پاكێجی چاكسازییە یاساییەكان كە لەلایەن كارنامەی حكوومەتەوە پێشكەش كراون، بەتایبەتی ئەوەی لە تەوەری 23میندا باس كراوە لەبارەی ئامادەكردنی پڕۆژەیاسای نەوت و گاز، لەسەر بنەمای فەرمانی محەمەد شیاع سوودانی بۆ خێراكردنی تەواوكردنی ئەم پڕۆژەیە و بە بەشداریكردنی هەموو لایەنە پێوەندیدارەكان لەم پڕۆژە نیشتمانییە ستراتیجییەدا.
روونی كردووەتەوە، لە كۆبوونەوەكەدا باس لە گرنگی و ئامانجەكانی ئەم یاسایە و پێویستیی تەواوكردنی بە زووترین كات، بە بەشداریی هەرێم و پارێزگا بەرهەمهێنەرانی نەوت و نوێنەرانی نووسینگەی سەرۆك وەزیران كرا، كەشی كۆبوونەوەكە ئەرێنی بوو و ڕەنگدانەوەی بەرژەوەندی و پەرۆشی هەموو لایەنەكان بوو بۆ تەواوكردنی پڕۆژەكە، چونكە بەشێكە لە پابەندبوونی بەرنامەی وەزارەتی كە لەلایەن ئەنجوومەنی نوێنەرانەوە دەنگی لەسەر دراوە
ئاشكرای كرد كە لە كۆبوونەوەكەدا گفتوگۆ لەسەر ئەم پێشنیازانەی خوارەوە كرا:
1- پێكهێنانی لیژنەكان بۆ بەدواداچوون لەسەر ئەم بابەتە و ڕێكخستنی كۆبوونەوەكانی دواتر.
2- نووسراوێكی كاركردن لە ڕێی لیژنەكان پێشكەش دەكرێت لەسەر بنەمای ئەو تێڕوانینەی كە لەلایەن وەزارەت و حكوومەتی هەرێمی كوردستان و پارێزگا بەرهەمهێنەرەكانەوە پێشكەش كراوە، لەبەر ڕۆشنایی ئەو گفتوگۆیانەی كە لە كۆبوونەوەكەدا بەڕێوە چوون و گفتوگۆكانی پێشوو كە لە ڕێی ئەم لیژنانەوە توێژینەوەی لەسەر دەكرێت، بۆ ئامادەكردنی پڕۆژەی كۆتایی یاسای نەوت و گاز.
