دۆزی کورد و بژاردەی ڕێککەوتن لەگەڵ عێڕاق

محیەدین بادلی
هەرچەندە لە ساڵانی ڕابردوودا، چەندان ڕێککەوتن و پەیماننامەی سیاسی و ئابووری لە نێوان هەرێم و عێڕاق هەبووە، بەڵام هیچیان جێبەجێ نەکراون و ئەوەی لە بەرژەوەندی خەڵکی کوردستان بووبێت حکومەتی ناوەندی لێی پاشەگەز بۆتەوە.
لە ئێستاشدا گەڕانەوەی هەرێمی کوردستان بۆ بەغدا لە بواری ئابووری و دارایدا، کارێکی درووستە، لەبەر دوو هۆکار: یەکەمیان، پاڵەپەستۆی وڵاتانی دۆست و بڕیاری ڕاگرتنی هەناردەی نەوتی هەرێم لەلایەن دادگای پاریسەوە، دووەمیان، بەشێک لە هێزەسیاسییەکانی کوردو هەندێ دەنگی شەقامی کوردی، ڕایان وابووە بەگەڕانەوە بۆ عێڕاق ژیان و گوزەرانی خەڵکی کوردستان باشتر دەبێت!
لەبەر ئەو هۆکارانە پێویستبوو جارێکیتر کورد بژاردەی ڕێککەوتن و پەیوەستبوونی خۆی بۆ حکومەتی عێڕاقی فیدراڵ گرتەبەر، بە ئوومێدی ئەوەی کە داواکاریی و مافەسیاسی و ئابوورییەکانی خەڵکی کوردستان دەستەبەربکرێن، ئەوەش هەرگیز بەمانای تەسلیمبوون و پوکانەوەی قەوارەی هەرێمی کوردستان نایەت، چونکە خەڵکی کوردستان و حکومەتی هەرێم هەرگیز سازش لەسەر کۆمەڵێک داواکاری و پرەنسیپ ناکەن کە پەیوەستن بە پاراستنی دۆزی ڕەوای گەڵ و پێگە سیاسی و سەربازیەکەی. ئەوە ڕوونە کە حکومەتی هەرێم تەواو پابەندبووە بە ڕێککەوتنەکانەوە، بەڵام دەستی دەستی و
خاویی ئەبینرێت لە لایەنی حکومەتی عێڕاقەوە، وەکو دواخستنی موچەو بودجەو شایستەداراییەکانی حکومەتی هەرێمی کوردستان، ئەمەش دەچێتە خانەی بەهانەو خۆدزینەوە لەو ڕێککەوتن و بەڵێنانەی کەپێشتر لەسەری کۆک بووینەو لە ئێستادا بەربەستی جۆراوجۆری بۆ سازدەکەن، دڵنیاین جەماوەری کوردستان لە ڕابردوودا بەرگەی زۆرێک لەو جۆرە پاڵەپەستۆیەو شەڕی دەروونی سەرانی بەغدای گرتووەو ئاوات و هیواکانی خۆی پڕبایەختر بووە لەو جۆرە بابەتانە. کێشە ئابووری و ناڕوونی بەغدا کەمتر مەترسین لەسەرمان بەرامبەر بەو ململانە حزبی و چەندئاوازیەی کە ئەمڕۆ لە بازنەی نێوەخۆیماندا دەگوزەرێن، کاردانەوەی نەرێنی هەیە بۆ سەر متمانەی جەماوەریی و لاوازبوونمانە بەرامبەر بە نەیارانی هەرێمەکەمان..
لێرەدا ئەوەی پێویستەو ئەرکە لەسەر کورد، یەکدەنگی و یەکهەڵوێستی حزبەسیاسییەکانە کەبەوە دەتوانرێت نزتکتر ببینەوە لە بەدەستهێنانی ویستەکانمان، بە فرەڕەنگی و زۆردەنگی، هەڵ و درز بۆ دوژمنان و نەیاران دەڕەخسێنین و زیان دەگەیەنین بە قەوارەی ئازادی هەرێمی کوردستان”.