جەبار عەبدولڵا مهاجر
هەر لەسەرەتای دەسپێكردنی خەباتی كوردایەتی تاكو ئەمڕۆ هەوڵەكانی دوژمنان و نەیاران بەردەوام بوونە بۆ سڕینەوەی ناسنامەی بارزانییان، سور دەزانن سڕینەوەی ئەو ناسنامەیە سڕینەوەی دەستەڵاتی كوردە لەناوچەكەدا، ساڵی ۱۹٨۳ ڕژێمی بەعسی گۆڕبەگۆڕ دەستی برد بۆ ئەو كارەو توانیان هەزاران پیر و لاو و ئافرەت و منداڵ دەستبەسەر بكەن و بێ سەروو شوێنیان بكەن، ئەو كارەی ئەو ڕژێمە كردی جگە لەترسنۆكی بەرامبەر بەپێشمەرگە قارەمانەكان و دڵسۆزانی خاك و نیشتیمان هیچتر نەبوو”.
ویستی ئەوان بۆ ئەنفالی بارزانیان ئەوەبوو لەو ڕێگایەوە كورد دەسبەرداری خەباتی شاخ ببێت و خۆی رادەستی دوژمنان بكات، بەڵام فیداكاری و خەباتی سیاسی و مەدەنی لەنێو ڕێزەكانی پێشمەرگەو هاووڵاتییانی كوردستان ڕۆژ دوای ڕۆژ بەرەو پێش دەچوو، تاكوو وای لێهات گەلی كورد بەڕابەرایەتی سەرۆك بارزانی توانیان سنوورێك بۆ دوژمنان دابنێن و پلانە گڵاوەكانی ڕژێمی بەعس پوچەڵ بكەنەوە، گرتن و كوشتنی هاوڵاتیانی مەدەنی و زیندەبەچاڵ كردنیان لەجاڕنامەكانی مافی مرۆڤ لەجیهاندا هێلی سوربوو، بەڵام ئەم تاوانە لەبەرچاووی هەموو جیهان ئەنجامدراو هیچ وەڵامدانەوەیەكی خێرا نەبوو كە دژایەتی خۆیان پیشان بدان و ئەنجامدەرانی ئەو تاوانە بەسزای یاسای خۆیان بگەیێنن”.
ئەنفالكردنی بارزانییان كارەساتێكی گەورەو جەرگبڕبوو، لە ئێستاشدا هەرچەندە چواردەورمان پڕە لەدوژمن پڕە لەخوێن مژ پڕە لەستمكار، بەڵام لەسایەی سەرۆك بارزانی و دڵسۆزانی رێبازەكەی، جارێكی تر دوژمنان ناتوانن بەسەر كوردا زاڵ بن و سیناریۆی ساڵانی پێشوو دوبارە بكەنەوە، ساڵانە لەگەڵ هاتنەوەی ئەو یادەمەزنە كۆمەڵێك هەواڵی تراژیدیاو ناخ هەژێن گوێبیست دەبین لەو كەسانەی كەماڵباتی ئەنفالن وەك خۆیان دەگێڕنەوە كەتاكە كەسە لەو ماڵباتە ماوەتەوەو ئەوانی تر هەمویان زیندەبەچاڵ كراون، ئەگەر ئەو رووداو زوڵم و ستمكاریانەی بەسەری كوردا هات بكرێت بە پەرتوكێك دڵنیام نەوەكانی داهاتوو بەوریایەوە مامەڵە لەگەڵ دۆخەكەدا دەكەن، سارێژ بوونی برینی ئەنفال ئەستەمە، ئاسەواری هەر دەمێنێت لەسەر دڵی هەر كوردێكی خاوەن ویژدان و بە ئەمەك بێت.
