مستەفا خۆشناو
ئەگەر گلان و سەركەوتنەكانمان بكەینە ئاوێنەی مێژوو بۆ ئەوەی خۆمان و خەباتی سەدان ساڵەی میللەتەكەمانی تێیدا بدۆزینەوە، بە كردەیی دەبێ سوود لە ئەزموونە خۆش و ناخۆشەكانی ڕابردوومان وەربگرین.
دیاریشە ئەم دۆخە ناهەموارەی ئێستا و لە وێستگەكانی ڕابردووشدا میللەتەكەمان كە پێیەوە گیرۆدە بووە، دەرئەنجامی ئەو هۆكارەیە كە بەدرێژایی مێژوو خەباتی قوربانیدانی گەلەكەمان ڕێبەرانی كورد نەیان توانیوە سوودی لێ ببینن، جەستەو برینی قوڵی ناتەبایی دووری سیاسییان پێ ساڕێژ بكەن. هەرچەندە دەرفەت و فورسەتی باشیش ڕەخسابن، ناكۆكی ڕێبەرانی سیاسی گەلەكەمان لە باریان بردوون، ناكۆكییەكان نەیان هێشتووە هەنگاوی دروست بە ئاراستەی زەمینەسازی بۆ یەكخستنی هەڵوێستێكی یەكگرتووی سیاسی بە ئاكام بگات.
لە دێرزەمانیشەوە گوتراوە، ئەوگەلەی نامرێ، لێ بەئێش و ئازارەوە دەژیت نەهامەتییەكانی لە ناتەبایی و ناڕێكی ڕێبەرانی سیاسی گەلەكەی سەرچاوەی وەرگرتووە”.
ئێساش نەچووە، پاش ئەو هەموو لێكترازان و دوور كەوتنەوە لە یەكتری، ئەگەر بمانەوێت بەئاسانی دەتوانیین لە دەوری مێزی گفتوگۆ كۆببینەوە، كێشەو ململانێ ناوخۆیەكانمان وەلاوەنێین، خاڵە هاوبەشەكان بەهێز بكەین خاڵە پێك ناكۆكەكانیش بەرەوچارەسەری یەك جاری بەرین.
كێماسی نییە ڕێبەرانی سیاسی گەلێكی چل ملیۆنی لە سەدەی بیست و یەكدا لە ئاستی هاتنەدی خواست و داخوازییە ڕەواكانی میللەتەكەی خۆیاندا كەمێك بۆ یەكتر بچەمێنەوە، لێ كێماسی گەورە ئەوەیە برینی دوێنێی یەكتر بكولێنینەوە. چونكە هەڵدانەوەی لاپەڕە ڕەش و قێزەونەكان خۆمان و میللەتەكەشمان بەهەمیشەیی لە گۆشەگیریی و لاوازیدا دەهێڵێتەوە. دووژمنیش سوود بەخش و سەركەوتوو.
بێشك مانەوەی دەستكەوتە بەدیهاتووەكانمان كە بەری ڕەنج و فیداكارین، سەرچاوەیان، لە دەریایەك خوێن وەرگرتووە. بە هەورازوو نشێوێكی زۆرهاتوونەتە دەست، دوورنییە بەو دووبەرەكی و لێكترازانەی ئێستا بە ئاسانی لە دەستیان بدەین. ڕۆژیش نییە دۆستەكانمان ئەوەمان بە گوێچكەدا نەچرپێنن. بۆیە جگە لە مێزی گفتوگۆ بۆ چارەسەركردنی ڕیشەیی كێشەكان، ڕێگەیەكیتر لەبەر دەمماندا نیە، كە گەلەكەمان ئاسوودە و پشتیوانی و پاڵپشتی دۆستە نێودەوڵەتییەكانیشمان مسۆگەر و زیاتر بكات.
