ئەو داستانە بە سەركردایەتی راستەوخۆی سەرۆك بارزانی بوو
زاری كرمانجی- سۆران:
35 ساڵ بەسەر داستانی خواكوڕكدا تێپەڕ دەبێت، ئەو داستانە بە یەكێك لە بەناوبانگترین داستانەكانی میللەتی كورد هەژمار دەكرێت، كە تێیدا پێشمەرگە بە سەركردایەتی راستەوخۆی سەرۆك بارزانی توانی شكست بە پێنجەم بەهێزترین سوپای جیهان بهێنێت كە سوپای عێراق بوو، كە جگە لە تۆپ و فڕۆكە، رژێمی ئەوسای عێراق چەكی كیمیاویشی بەكارهێنا.
لە 19 تەمووزی 1988 چەند هەفتەیەك بەرلەوەی شەڕی هەشت ساڵەی عێراق – ئێران، بە تەواوی رابگیرێت، رژێمی بەعس هێرشێكی بەرفراوانی بۆ ناوچە رزگاركراوەكانی شۆڕشی كوردستان لە دەڤەری خواكوڕك دەستپێكرد، بەڵام پێشمەرگە بە سەركردایەتی راستەوخۆی سەرۆك بارزانی توانییان بۆ ماوەی زیاتر لە 46 رۆژ بەرگری بكەن و دواجار سوپای رژێم ناچاری پاشەكشە بكەن و داستانی خواكوڕك تۆمار كرا.
سەرۆك بارزانی لە 14/8/1988، لە وتەیەكدا بۆ پێشمەرگەكان پێشبینی ئەوەی كرد دوای شەڕی هەشت ساڵەی عێراق- ئێران، بارودۆخی ئابووری و سیاسی عێراق تێكدەچێت و دۆزی گەلی كوردستانیش دەچێتە قۆناغێكی تازەوە.
لەو داستانەدا پێشمەرگە بە خۆڕاگری و قوربانیدان بۆ دوژمن و داگیركاری سەلماند كە ئیرادە و قوربانیدان لە هەموو چەكێك بەهێزترە و سەركەوتن بۆ ئەوانە. بەرگری پێشمەرگە لە داستانی خواكوڕك، توانی دیكتاتۆریەت بەچۆكدا بهێنێت و سەربەخۆیی خەباتی رەوای كورد و گیانی مەقاوەمەتی پێشمەرگە بۆ هەموو لایەك دەربخات.
داستانی خواكوڕك، نموونەیەكی شكۆداری كۆڵنەدان و ورەبەرزیی پێشمەرگە بوو، چونكە لەساتەوەختێكدا تۆماركرا، كە حكوومەتی عێراق زنجیرە هێرشی ئەنفالە بەدناوەكانی دەستپێكردبوو و درێژەشی پێدەدا و شاری هەڵەبجەیشی بە چەكی كیمیایی بۆردمان كردبوو. بە هەزاران گوندی كوردستانی كاولكردبوو، خەڵكەكەی ئاوارە كردبوو، هەر بۆیە پێشمەرگە لە خواكوڕكدا سەركەوتنێكی وایان بەدەستهێنا، كە بۆ باری سیاسی و سایكۆلۆژی كورد و شۆڕشەكەی زۆر پێویست بوو، ئەو داستانە لە ناوچەیەكی بەرتەسكدا تۆماركرا، كە حكوومەت زیاتر لە 15 لیوای سەربازی بەكارهێنابوو.
ئەم داستانە لە 19/7/1988 تا 5/9/1988 خایاند و بە خوێنی گەشی 28 شەهید و زیاتر لە 160 بریندار تۆمار كرا، كە بەڵگەیەكی زیندوو بوو كەوا گەلی كورد هیچ كات لە مافەكانی خۆی پاشگەزنابێتەوە لە پێناو بەرگری لە خاكی پیرۆزی كوردستان.
