سالار تحسین دری
لە كوردەواریدا دەربڕینێكی باو هەیە كە دەڵێن “كاڵا بە قەت باڵایە “؛ ئەمە لە حاڵەتێكدا دەگوترێ، ئەگەر كەسێك، پۆشاكێكی گونجاو لەبەر بكات و بە باشترین شێوە لێی بێتەوە و لەگەڵی بگونجێت، یان پۆستێكی شیاوی پێ بدرێت و بە هەمان شێوە بە نایابترین شێوە رایپەرێنێ و لە ئاستی گەورەییدا بێتەوە، یان ئەوەتا وەسفێك و وشەیەك دەردەبڕی بەرامبەر بە كەسێك، كە لەوپەڕی گونجاویدا نیشاندەری هەموو توانا و بلیمەتی و لێهاتووییەكانی بێت.
لە نووسین و دەربڕیندا، زۆرجار لە پاش ناوی كەسایەتییە داهێنەرەكان، ئەوانەی كە كاریگەرییان لەسەر رەوتی كار و بیركردنەوە و ژیانی مرۆڤەكان داناوە یان دادەنێن (ئیتر هەریەكەو بە ئاست و پێوانەی ژینگەی خۆی)، بۆیە بەرێز “مەسرور بارزانی” سەرۆكی حكومەتی ھەرێمی كوردستان، خاوەنی فكر و چوارچێوەیەكی بەرنامەبۆداڕێژراو، داهێنەر، ئامانجدار و بیركردنەوەیەكی مەزنی ھەیە، كە دەتوانێ موعجیزە ئاسا، كاریگەری لەسەر ژیانی مرۆڤەكان و جۆری روانینیان بۆ ژیان و چۆنیەتی ئەنجامدانی كردەوەكانیان هەبێت.
ئێمە لەناو هەرێمێكی بچووك لە رۆژهەڵاتێكی ناوەڕاستی هەزار رەنگی پڕ قەیران و هەڕەشەدا دەژین. لەم هەرێمەدا و بەتایبەت كاتێك سەیری ئاڵنگارییە جدییەكانی دوای كۆرۆنا دەكەین كە ژیانیان وەستاند و دوای ئەوەش وەك هەمیشە كێشە و ململانێ سیاسییە بەردەوامەكان سەریان هەڵدایەوە و زۆر كەس ئومێدی لەبەر بڕابوو و زۆر كەسیش خۆی دابوو و داویەتە دەستی بەرژەوەندییە تەسكە كاتییەكان، مرۆڤێك بە هێزەوە و بەوپەڕی تواناوە، پرسی بەهێزبوون دەهێنێتە ناو فەرهەنگی سیاسی و بۆ جێبەجێكردنی ئەم كارەش، رووبەڕووی هەموو ئاڵنكاری و بەربەستە ناوخۆیی و دەرەكییەكان دەبێتەوە و “كوردستانێكی بەهێز”، لە ئایدیاوە دەگوازێتەوە بۆ كردەوە و واقیعی سیاسی و كۆمەڵایەتی.
جەنابی “مەسرور بارزانی” لەم بڕگەیە لە ژیانی سیاسی و كۆمەڵایەتی كوردستاندا، بە كۆمەڵێك تایبەتمەندی وەك ستراتیژییانە بیركردنەوە، لێهاتوویی، خاوەن پڕۆژەبوون و نوێكاریی، دژایەتیكردنی گەندەڵی و بەدیهێنانی چاكسازی، گۆڕەپانی سیاسی كوردستان رەنگڕێژ دەكات، بەجۆرێك كە زۆر بە سانایی دەتوانین كاریگەرییەكانی لەسەر پانتایی ژیانماندا ببینین.
لە سەردەمی كابینە چوار ساڵییەكەیدا، هەرچەندە دوو ساڵی سەرەتای، هەم كوردستان و هەم جیهان بە پەتای كۆرۆناوە سەرقاڵ بوون و ئەم پەتا جیهانییە، ژیان و ئومێدی ژیانكردن و گەڕانەوەی بۆ ژیانی ئاسایی، لە هەندێك بڕگەدا بۆ ئاستی سفر دابەزاند، بەڵام بە هێز و باوەڕبەخۆبوونەوە ئیدارەی كرد؛ بە جۆرێك كە دەتوانین بڵێین حكومەتی هەرێمی كوردستان لە رووی رێكارەكانی رووبەڕووبوونەوە و دابینكردنی پێداویستییە تەندروستییەكان، لە ریزی دەوڵەتە هەرە پێشكەوتوو و بە مشوور و بەرپرسیارەكانی دنیا بوو. هەموو ئەمەش بۆ ئەوە بوو، كە خەڵك ئومیدیان بە ژیان هەبێت. ئەمە جگە لەو كێشە و نا ئارامییانەی كە بەردەوام لە لایەن نەیارانی ئاشتی و ئارامی كوردستانەوە، رووبەڕووی كوردستان دەكرانەوە. لەو ماوە كورتەدا، بەڕێزیان بێجگە لەوەی كە زیرەكانە ڕێگری لە هەوڵە نەزۆكە دەرەكی و ناوخۆییەكان كرد، كە مەبەستیان بوو بەچۆكیدا بهێنن و كابینە حكومەتییەكەی لێ هەڵوەشێننەوە، هاوكات توانیویەتی گڕوتینێكی زۆر بە گەشەی ھەرێمی كوردستان، ببەخشێ؛ كردنەوەی بازاڕی جیهان بۆ كاڵای كوردی و بەخشینی ئومێد بۆ وەبەرهێنەر و جوتیارانی ناوخۆیی، بڕیاری تەرخانكردنی بودجەیەكی تایبەت بۆ وەرگێڕانی كتێبی كوردی بۆ سەر زمانە بێگانەكان كە نیشانەی ئەوەیە كورد دەیەوێ وەكو خۆی لە لای ئەوانی تر بخوێندرێتەوە، پەرەسەندنی ژێرخانی ئابووری و كردنەوەی چەندین كارگەی ستراتیژی و خوڵقاندنی دەیان هەزار هەلی كار بۆ گەنجان، گەشەدان بە كەرتی ئابووری و كردنەوەی دەرگا بۆ وەبەرهێنەرە بەتواناكان، پەرەسەندنی كەرتی رێگاوبان و نۆژەنكردنەوەیان، دژایەتیكردنی گەندەڵی، هەبوونی پاكێجی تایبەت بە چاكسازی و گەڕاندنەوەی سەدان ملیار دینار بۆ خەزێنەی حكومەت، راگرتنی شكۆی هەرێمی كوردستان وەك هەرێمێكی فیدراڵ لەنێوان خواستە دوژمنكارییە دەرەكییەكان و دەنگە ناوخۆییە نەخوازراوەكان و لە گۆڕنانی خەونی نەهێشتن و بێهێزكردنی حكومەتی هەرێمی كوردستان، كردنەوەی دەروازەی سنووری زیاتر لەگەڵ وڵاتانی دراوسێ و …هتد.
هەر دەرەنجامی ئەم سیاسەت و ئەم روانینە ستراتیژییانەیە، كە وای لە وەزیری وزەی ئەمەریكا كردووە بڵێت: بەڕێز “مەسرور بارزانی موعجیزەیە”.
لێرەوە، زۆرمان نەگوتووە ئەگەر بڵێین ئەوەی بووەتە داینەمۆی نووسینی میژوو لەم بڕگەیەی ژیانی سیاسیماندا، سەرۆكی حكومەت روانگە و ھزر و ستراتیژێكە لەسەر بنەمای بەرز راگرتنی شكۆ و كەڕامەتی تاك و ئیرادەیەكی بەهێزە بۆ رووبەڕووبوونەوەی قەیرانەكان، كاركردنە بۆ بەدیهێنانی گۆڕانكاری لە ژیانی تاكی كوردستانی بە ئاڕاستەی خۆشبەختی؛ بینینی بەربەست و ئاڵنگارییەكانە وەك دەرفەتێك؛ “مەسرور بارزانی” مۆدێلێكی نوێی سیاسەت و حوكمڕانییە لە میژووی كورددا و دۆكترینێكە بۆ بنیاتنانی “كوردستانێكی بەهێز”.
