د. ئازا – زاری كرمانجی:
هەروەك ئاشكرایە ئەنجامدانی وەرزش بۆ مرۆڤ بە شێوەیەكی گشتی گرینگە و چارەسەرو یارمەتیدەرە لە زۆربەی كێشە تەندروستیەكان، لەم سەردەمە لە گەڵ پێشكەوتنی كۆمەڵایەتی و كاڵبوونەوەی جیاوازی جەندەری ئەمە هۆكار بووە لە هاتنە پێشی ئافرەتان لە زۆربەی كارو كایەكانی ژیان، ڕۆژانە بەر چاومان دەكەوێت ئافرەتان هاوشان لە گەڵ پیاوان كاردەكەن كە ئەمەش بێ ماندووبوون و بێ كێشەی تەندروستی نیە بۆ ئافرەتان بۆیە لە ڕۆژگاری ئەمڕۆماندا وەرزش وەك پێویستیەكی لێ هاتووە بۆ مرۆڤ ئینجا پیاو بێت یان ئافرەت، لە هەرێمی كوردستان لە دوای كرانەوەی كولتوری و پێشكەوتنی فەزای تەكنەلۆجی و بەكارهێنانی هۆكارەكانی سۆشیاڵ میدیا چەند هۆكاری تر گۆڕانكاریان لە شێوەی ژیانی تاكی كوردستانی دروستكرد بە تایبەت ئافرەتان كە لە ئێستادا زۆر گرنگی بە تەندروستی و لەشجوانی و ڕێكی جەستەیان دەدەن، بەشێك لەم ئافرەتانە بە دیاری كراوی ئەوانەی تەمەنیان كەمێك هەڵكشاوە بە ناچاری دەبێت وەرزش ئەنجام بدەن، چونكە زۆرێكیان وەك چارەسەر پزیشكان بۆیان دیاری كردوون، لە سنووری ئیدارەی سەربەخۆی سۆران چەندین هۆڵی وەرزشی هەن كە زیاترینیان تایبەتن بە یاریە وەرزشیەكانی ڕەگەزی پیاو و بەشێكیان لە ڕۆژێكدا چەند كاتژمێرێك تەرخان كراون بۆ ڕاهێنان و مەشقی وەرزشی ئافرەتان، بەڵام زۆربەی كات ئەو یاریزان و ئافرەتانە ڕووبەڕووی نەبوونی هۆڵ و كەمی ڕاهێنەری ڕەگەزی ئافرەت دەبنەوە.
ئەوەی جێگای خۆشحاڵیە لە سەنتەری شاری سۆران هۆڵێكی تایبەت بۆ یارییە وەرزشیەكانی ئافرەتان كرایتەوە، بۆیە بە دەرفەتمان زانی دیمانەیەك لە گەڵ ڕۆیا مستەفا مەهدی ڕاهینەری ئەو هۆڵە وەرزشیە سازبكەین.
- چۆن بوو وەرزشی لەش ڕێكیت هەڵبژارد؟
ئارەزووی زۆرم بۆ یاری هونەرە جەنگییەكان هەبوو، خۆم لەم وەرزشە دیتەوە، بەڵام لەبەر ئەوەی مەشق و ڕاهێنان لە یاری هونەری جەنگی ئاسان نیە و قوتابیەكانم لە هۆڵی وەرزشی زۆر ئارەزوویان لێ نەبوو، بۆیە كاركردنم لە هۆڵی وەرزشی لەش ڕێكی هەڵبژارد، هەرچەند تا ئێستاش لە یاری كۆنفۆ بەردەوامم، و بە خۆشحاڵییەوە یەكەم ئافرەت بووم كە ببم بە ڕاهێنەری یاری كۆنفۆ توا. - جگە لە وەرزشی لەش ڕێكی باكگراوندی وەرزشیت لە چ یارییەكی تر هەیە؟
لە كاتی منداڵیمدا یاری تێكواندۆم دەكرد و دواتر كۆنفۆ، ئێستاش لەبەرئەوەی لە سكوڵی پەروەردەی وەرزش دەخوێنم هەموو یارییەكان بەشێوەیەكی ئەكادیمی زانیاریم لەسەریان كۆكردیتەوە و لە بەشێكیان لە ئاستێكی نایابم. - ئێوە بەچی جیاواز دەكرێنەوە لە ڕاهێنەرانی تر ؟
من هەر لە منداڵیەوە لە ناو جیهانی وەرزشیم و بەشێوەیەكی ئەكادیمی یاریە وەرزشیەكانم خوێندوە و لەچەندین پاڵەوانێتی و خول بەشداریم كردووە و چ بە شێوەی تیۆری یان پڕاكتیكی بێت بۆیە دەرەنجامی ئەمە بوە بە هۆی ئەوەی پێشكەوتنی زۆر بە خۆمەوە ببینم و بەردەوامم لە خوێندنەوە و شارەزا بوون و قوڵبوونەوە لە زانستی وەرزشی. - تا چەند لە ئیدارەی سۆران ئافرەتان گرینگی بە وەرزش دەدەن؟
ئێستا لە جاران باشتر و زیاتر گرنگی بە تەندروستی خۆیان و لەشجوانی دەدەن، بەردەوام ئافرەتان لە پەیوەندی دان لە گەڵم دەیانەوێت سوود مەند بن لە زانیارییە وەرزشیەكان و ژمارەی قوتابیەكانم لە زۆربوونە، ئەمە دەرخەری ئەو ڕاستیەن كە ئافرەتان لەم سنوورە تامەزرۆی یاریە وەرزشیەكانن و ئەوەی پێویستیانە ڕەخساندنی هۆڵ و ڕاهێنەری و شوێنی تایبەت بە ئافرەتانە. - ئایا ئێوە تەنها لە گەڵ یاریزانەكانتان كار لەسەر ڕاهێنانە وەرزشیەكان دەكەن، یاخود هاوكاری یاریزانەكانتان دەبن لە سستەمی خۆراكی و شێوازی لایف ستایلی ژیانیان؟
بەڵێ بەدڵنیاییەوە ئێمە هەموو یاریزانەكان ئاگادار دەكەینەوە كە هەرچەنێك وەرزش بكەن و خۆیان ماندوو بكەن و ئەگەر سیستمی خەو و خواردنیان ڕێك و جێگیر نەبێت ئەوە هیچ سوود لەو وەرزشە نابینن و ناتوانن ئەو كات بەرەو گۆڕانكاری تەندروستی ئەرێنی هەنگاو بنێن، بۆیە بۆ زۆربەی یاریزانەكانمان خشتەی خۆراكیان بۆ ڕێكدەخەین و ڕێنماییان دەكەین كە شێوازی ژیانیان ڕێكبخەن بگۆڕن بە ئاراستە باش. - لە هۆڵەكەی ئێوە چەند جۆر وەرزشی تیدا ئەنجام دەدرێت، و ئایا لە ڕووی چارەسەری تەندروستیەوە هاوكاری یاریزانەكانتان دەكەن؟
لە زۆر جۆری وەرزش ڕاهێنان دەكەین لەوانە: یۆگا، زۆمبا، یاری ئاسن، و فیتنس چەند یارییەكی تر، و بۆ ئەوانەی كە نەخۆشییان هەیە لە بڕبڕەی مل و پشت ڕاهێنانی چارەسەریان پێ دەدەین كە جیاوازترە لە ڕاهێنانی یاریزانەكانی تر. - هۆڵەكەتان چ كاتێك كراوەیە بۆ ڕاهێنان؟
لە بەر ئەوەی هۆڵەكەمان تایبەتە بە ئافرەتان هەموو كاتەكانی بۆ ئافرەتە، واتا لە كاتژمێر (۲)ی پاش نیوەڕۆ تاكو (۹) ی شەو كراوەیە، و شوێنی هۆڵەكەمان لە سەنتەری شاری سۆرانە لە شەقامی كاوە نزیك بەڕێوەبەرایەتی گشتی تەندروستی. - ئەو ئاستەنگانە چین كە لە كاری ڕۆژانە دێتە بەردەمتان؟
بێگومان هیچ كارێك بە بێ ماندووبوون نابێت بەڵام بە خۆشحاڵیەوە خەڵكی شاری سۆران لە زۆربەی كارەكانمان یارمەتیدەرن بۆیە ئاستەنگێكی وا زەحمەت نابینم شایەنی باسكردن بێ. - چیتان كردووە بۆ پاك ڕاگرتنی هۆڵەكەتان لە ڕووی ژینگەی هۆڵەكە بە شێوەیەكی گشتی؟
یەكێك لەو بابەتانەی كە ئێمە زۆر بە بایەخەوە لێ ی دەڕوانین پاك و خاوێنیە بۆیە هەفتانە كەل و پەل و هۆڵەكە بە گشتی پاكی دەكەینەوە و بەردەوامیش ڕێنمایی بە یارێزانەكانمان دەدەین كە هۆڵەكە پاك ڕابگرن. - ئەو خاڵە ئەرێنیانە چین لە هۆڵەكەی ئێوە هەن؟
جیاواز لە هۆڵەكانی تر كە لە ئیدارەی سۆران هەن، هۆڵێ وەرزشی ئیمە لە بەر ئەوەی هەموو كاتەكانی بۆ ئافرەتانە هەركات ئافرەتان مەبەستیان لە ڕاهێنانی وەرزشی بیت دەتوانن بێن و یاریە وەرزشیەكانیان ئەنجام بدەن، جگە لەمانەش ئیمە هۆڵەكەمان لە سەنتەری شارە و لە جوانترین ناوچەی سۆرانین. - لە داهاتوو دەتانەوێت چی بكەن بۆ یاریزانەكانتان چیتان لە هەگبە دایە؟
دەمانەوێت ژمارەی یارییەكان زیاد بكەین لە هۆڵەكەمان بۆ نموونە كاتێك دیاری بكەین بۆ یاری كیك بۆكسێن و كونگفو توا و هەروەها پاڵەوانێتی لە هەندی یاری رێكبخەین بۆ یاریزانانی كچی هۆڵەكەمان. - چی بكرێت بۆ ئافرەتان بۆ ئەوەی لە ڕووی وەرزشییەوە زیاتر گرینگیان پێ بدرێت؟
هەموو كات خێزان زۆر گرینگە كە پشتگیری لە منداڵەكانیان بكات بە تایبەت كچەكانیان هەرچەند لە سەردەمی ئێستاماندا ئەنجامدانی وەرزش وەك شتێكی ئاسایی و پێویستێ لێهاتووە بۆیە گەشبینم لە داهاتوو توێژی ئافرەتان زیاتر ڕوو لەم بوارە بكەن،جگە لە مانە دەكرێت لایەنی پەیوەندیدار زیاتر خول و چالاكی وەرزشی تایبەت بە ئافرەتان ڕێك بخات.
بۆ زانیاری كورتەیەك دەربارەی ڕاهێنەر ڕۆیا مستەفا مەهدی: قوتابیە لە قۆناغی سێیەمی بەشی پەروەردەی وەرزش لە زانكۆی سۆران، لە تەمەنی منداڵیەوە ئارەزووی وەرزشی هونەری جەنگی كردووە بۆیە لە ٨ ساڵی لە وڵاتی ئێران دەست دەكات بە ڕاهێنانەكانی وەرزشی (تێكواندۆ) بۆ ماوەی ٣ ساڵ بەردەوام دەبێت، دوای ئەوەی كە گەڕایەوە بۆ وڵاتی دایك جارێكی تر دەستدەكاتەوە بە یاری هونەری جەنگی كۆنگفۆ و لە ئێستا وەكو ڕاهێنەرلە یەكێ لە هۆڵە وەرزشیەكان لە سەنتەری شاری سۆران بەردەوامە لە خزمەتی ئافرەت و كچانی ئیدارەی سەربەخۆی سۆران.
