زاری كرمانجی-سۆران
دەزگای خێرخوازی بارزانی بەپێی چەند رێنماییەك، هاوكاری دارایی و پێداویستی قوتابیانی بێ باوك دەكات و لە سنووری ئیدارەی سۆرانیش ناوی سەدان منداڵی تۆمار كراون.
لەمبارەوە نێچیروان عەبدلواحید گوانی، بەرپرسی ئۆفیسی سۆرانی دەزگای خێرخوازی بارزانی، بە زاری كرمانجی راگەیاند ” لە بەردەوامی پڕۆژەی ئازیزانی دەزگای خێرخوازی بارزانی كۆمەڵێك مەرج و رێنمایی نوێ دیاریكراوە، بۆ تۆمار كردن و هاوكاری كردنی منداڵانی بێباوك بەتایبەت ئەوانەی كە قوتابین، رێنماییەكان بریتین لە ( منداڵەكە تەمەنی لە خوار 10 ساڵی بێت، پشتگیری قوتابخانەی هەبێت، بارو گوزەرانیان خراپ بێت، ئۆفاتنامەی باوكی بێنێت) بۆ ئەمەش تیمێكی تایبەت دیاریكراوە، لە سنووری شارو شارۆچكەكانی ئیدارەی سەربەخۆی سۆران ناوەكان تۆمار دەكرێن، لە ئێستادا ناوی زیاتر لە 500 منداڵ تۆمار كراوە، پێشبینی دەكەین لە داهاتووشدا رێژەكە زیاتر بێت”.
بەرپرسی ئۆفیسی سۆرانی دەزگای خێرخوازی بارزانی، ئاشكراشی كرد ” دوای تۆمار كردنی ناوی ئەم منداڵانە و گونجانیان لەگەڵ رێنماییەكان، مانگانە هاوكاری داراییان لەلایەن دەزگای خێرخوازی بارزانی بۆ دابین دەكرێت، هەروەها لەكاتی بۆنەو ئاهەنگەكاندا هاوكاری دیكەیان پێدەدەرێت وەك جل و بەرگ و پێداویستییەكان.