بۆتان سەباح – سۆران :
خراپی رێگاو بانەکان یەکێک بوو لەو هۆکارانەی نەتواندرا وەک پێویست پڕۆژەی گەشتیاری لە سیدەکان جێ بەجێ بکرێن، لە ئێستادا حکومەتی هەرێم دەیەوێت گرنگی زیاتر بە کەرتی رێگاو بان بدات لە سنووری قەزای سیدەکان و بۆ ئەو مەبەستەش چەند پڕۆژەیەکی رێگاو بان کاریان تێدا دەکرێت ، بەڕێوەبەری گشتی گەشتوگوزاری سۆرانیش دەڵێت ” بۆساڵی داهاتوو پڕۆژەی گەشتیاری لەو ناوچەیە دەبیندرێن.
فەیسەڵ سادق، بەرێوەبەری گشتی گەشتوگوزاری سۆران بە زاری کرمانجی راگەیاند” سیدەکان لە رووی سروشتەوە زۆر گونجاو و لە بارە، ئەوەی پێویست بێت بۆ گەشتیاری لە بابەتی سروشت و کەش و هەواو رووبارەکان و تاڤگە کانیاوەکان سیدەکان زۆر دەوڵەمەندە جگە لە ناوچە شاخاویەکەشی کە بەفری تێدا دەمێنێ تا دەرنگانی ساڵ، بەڵام کێشەی پڕۆژەی گەشتیاریمان هەیە لەم یەک دوو ساڵە هەوڵێک هەبوو بەڵام وەکوو پێویست جێی خۆی نەگرت”.
فیسەڵ سادق، باسی لەوەشکرد ” لە چوارچێوەی گرنگی پێدانی ئیدارەی سۆران بە کەرتی رێگاو بان لەو یەک دووساڵە گرنگی زیاتر بە رێگاو بانەکانی سیدەکان دراوە ئەمەش دەبێتە هۆکارێکی زۆرباش بۆ گرنگیدان بەبواری گەشتو گوزار لە قەزای سیدەکان” .
بەڕێوەبەری گشتی گەشو گوزاری سۆران ئەوەشی بۆ زاری کرمانجی ئاشکرا کرد” لە ئێستادا چەند وەبەرهێنەرێک پڕۆژەیان پێشکەشکردووە بۆ سیدەکان بەتایبەتی لەسەر رووباری سیدەکان، لەگەڵ دروستکردنی موتێل و کەپری گەشتیاری و چێشتخانە، ئەمەش لەساڵی داهاتوو دەبیندرێت و دەکەوێتە واری جێ بەجێ کردن.
