ئیسماعیل ئیبراهیم
رێزی بێ كۆتاییم بۆ ئەو مامۆستایانەی بەرێز و ئەدەبەوە پەیامە جوانەكانی ئایینی دەگەنین و رێ نیشاندەری تاك و كۆی كۆمەڵگەن بۆ خوداپەرستی و پێكەوە ژیان و یەكتر قبوڵ كردن، كە نموونەیان گەلێك زۆرە و دوور دەكەونەوە لە هەر جۆرە هاندانێكی توندڕەوی، بەڵام ئەوانەی دیكە كە هانی كوشتنی جەستەیی و روحی و فكری مرۆڤ دەدەن وەك سێوێكی رزیون لە نێو سندوقی پڕ لە سێوەی پاك و خاوێن، ئەگەر فڕێ نەدرێت دواجار هەموو سێوەكانی دیكە وەك خۆی دەرزێنێت، ئەمانە نەك پێویستە دەستگیر بكرێن و بە تۆمەتی هاندانی كوشتن و بڵاو كردنەوەی تۆی ڕق و كێنە لە نێو كۆمەڵگە رووبەڕووی دادگا بكرێنەوە، بەڵكو پێویستە رێگە لە بڵاو بوونەوەی گووتارەكانیشیان بگیرێت.
كاتێ رێگە بدرێت كەسێك بێتە سەر شاشەی تۆڕە كۆمەڵایەتییەكان و پیاوی كورد بە دەیوس لەقەڵەم بدات، ئەگەر رێگە بە هەر ئافرەتێكی نێو خێزانی بدات باڵا پۆش نەبێت بچێتە دەرەوە.
كاتێ ئافرەتێكی سفوور بە بێ ئەخڵاق لە قەڵەم بدات، ئەمە جۆرێكە لە هاندان بۆ كوشتن.
كاتێ ئەو جۆرە كەسانە لە ژێر پەردەی ئایین خەڵك بە مولحید، كافر و لادەر لە ئایین لەقەڵەم دەدات و بۆ ئەمەش كۆمەڵێك ئایەت و فەرموودە دەهێنێتەوە، بێ رەچاو كردنی بارودۆخ و كات، ئەمە واتای هاندانی كوشتنە.
كەسی وا هەیە، لە پشت مینبەرەكانەوە پڕ بە قورگی و وەك ئەوەی خەریكی جیهاد بێت هاوار دەكات، ئەوانەی نوێژ ناكەن دەبێ لەسەریان بدرێت، ئەمە هاندانی كوشتن نەبێت چییە؟
كاتێ هەندێك كەسی توندڕەو بە جلی جوانی ئایینییەوە پڕ بە دەمی خۆی جنێو دەدات، تەشهیر دەكات، رێك وشەی ( بێ ئەخڵاق، بێ ناموس و هیچوپوچ) لە دەمی دێتە دەرەوە، ئەمە هاندانی كوشتن نەبێت چییە ؟
ئاخر ئەو هاووڵاتییەی ئاستی تێگەیشتن و خوێندەواری لە ئاستێكی نزمدایە لە كاتی بیستنی وشەی (دەیوس و بێ ئەخڵاق)، كە چووە ماڵەوە چۆن رەفتار دەكات؟، تەنها بۆ ئەوەی بە قسەی مەلاكە دەیوس و بێ خەڵاق نەبێت، كاتێ هاووڵاتییەكی خوێن گەرم لە ژێر كاریگەری گووتاری ئایینییە و لە مزگەوت یا لە تۆرەكۆمەڵایەتییەكان گوێ بیستی ئەم وتانە دەبێت، لە بازاڕ ، شوێنە گشتییەكان و ناو ماڵ و بنەماڵەكەی كاردانەوەی چۆن و چی دەبێت؟.
هەموو ئەم گووتارانە هاندانە بۆ كوشتن، با كەسە توندڕەوە وتار بێژەكە وشەی بڕۆ بیكوژەی بەكار نەهێنا بێت.
بەكار هێنانی هەستی تاكی موسلمانی كورد لە رێگەی وتاری ئاگرینی ئایینی بۆ خۆدەرخستن و بەناو بانگ كردن پێویستە چیتر رێگەی پێ نەدرێت .
ئەم دیاردەیە لە رێگەی گفتوگۆوە چارەسەر ناكرێت، لەبەر ئەوەی كەسی توندڕەو ئەوی دی قبوڵ نییە و پێ داگرە لەسەر گووتاری توندڕەوی خۆی، ئێنجا یا تێناگات یا نایەوێت تێبگات، بۆیە دەبێ بە یاسا سنووردار بكرێن، هەم ئەو توندڕەوانەی سووكایەتی بە پیرۆزییەكانی كۆمەڵگە دەكەن هەم ئەوانەشی بە ناوی ئایین یا هەر بابەتێكی دیكە هانی كوشتن و دووبەرەكی لە نێو تاك و پێكهاتەكانی كۆمەڵگە دەدەن.
