لە ٢٤ شار مانگرتن و ١٣ شار خۆپیشاندانە
٣ كەس شەهید كراون و ٢٥٠ هاووڵاتیش بریندارن
زاری كرمانجی – سۆران :
مەرگیی كچێكی كورد جارێكی تر رووحی بەر شۆرشی شەقام كردەوە و یەكرێزی كوردانی دروستكردووە، كوشتنی ژینا ی تەمەن 22 ساڵ، مانگرتن و خونیشاندانی ناڕەزایی بەدوای خۆیدا هێنا و لە ئێستادا 24 شاری رۆژهەڵاتی كوردستان مانگرتنی گشتی راگەیاندووە و لە 13 شاریش خۆنیشاندانە، تا ئێستا 3 هاونیشتمانی لەلایەن دەزگا ئەمنییەكانی ئێرانەوە شەهید كراون و 221 شیان بریندار و 250 هاونیشتمانی تریش رەفێندراون.
بە پشتبەستن بە ئاماری تۆماركراو لە ناوەندی ئامار و بەڵگەنامەكانی ڕێكخراوی مافی مرۆڤی هەنگاو، لە مانگرتن و ناڕەزایی لانی كەم سێ هاووڵاتیی كورد شەهیدكراون و ٢٢١ هاووڵاتیی دیكەش بریندار بوون. زیاتر لە ٢٥٠ هاووڵاتیی كوردیش بە شێوەی توندوتیژانە لە لایەن هێزە ئەمنییەكانی كۆماری ئیسلامیی ئێرانەوە رفێنراون.
هەنگاو ئاماژە بۆ ئەوە دەكات، سەرەڕای هەڕەشەی دەزگا ئەمنییەكان، بازاڕییان و كاسبكاران و بەشێكی بەرچاوە لە خاوەن پیشەكانی كەرتی تایبەت لە شارەكانی ئیلام، ئاودانان، مەلەكشاهی، كرماشان ڕوانسەر، جوانڕۆ، پاوە، كامیاران، سنە، دێولان، قوروە، مەریوان، سەقز، بانە، دیواندەرە، بیجاڕ، پیرانشار، سەردەشت، مەهاباد، بۆكان، تیكاب، ئورمیە، شنۆ و كۆتۆل بە شێوەی بەربڵاو لە مانگرتندا بوون بە شێوەیەك كە خەڵك بە مانەوەی لە ماڵەكانیان تەنانەت لە بەڕیوەبردنی كۆمەڵێك چالاكیی كۆمەڵایەتی وەك وەرزشی بەیانیش خۆیان بوارد بۆ ئەوەی بەرامبەر بە كوژرانی ژینا ئەمینی، ٢٢ ساڵە و خەڵكی سەقز، لە لایەن حكومەتەوە، ناڕەزایی خۆیان دەرببڕن.
ئەو شارانەی كە هاوكات لەگەڵ مانگرتن، خۆپیشاندان و ناڕەزایی دەربڕینیش تێیاندا بەڕێوە چوو، بەگوێرەی ئەو زانیارییانەی بە هەنگاو گەیشتوون، لە ١٣ شاری دیواندەرە، سەقز، بانە، مەریوان، سنە، كامیاران، دێولان، قوروە، تیكاب، مەهاباد، سەردەشت و بۆكان خەڵك ڕژانە سەر شەقامەكان، بەڵام بە هێرشی هێزە چەكدارەكانی حكومەت، خۆپیشاندانە مەدەنییەكان بەرەوە توندوتیژی چوون لە ئەنجامدا بە هۆی تەقەی هێزە ئەمنییەكانەوە لانی كەم سێ هاووڵاتی كوژراون و ٢٢١ هاووڵاتیی دیكەش بریندار بوون كە لەم ٢٢١ كەسەی بریندار بوون ٤٣ كەسیان ژن و ٢٤ كەسیشیان مێردمنداڵ بوون.
موحسین محەممەدی خەڵكی دیواندەرە، ڕەزا لوتفی ٢٥ ساڵە خەڵكی دێولان و فەرەیدوون مەحموودی خەڵكی سەقز، ئەو سێ هاووڵاتییەن كە بە هۆی تەقەی هێزە حكومەتییەكانەوە گیانیان لە دەستداوە.
