زاری كرمانجی- پارتی و یەکێتی جەخت لەوە دەکەنەوە کە کورد بە یەک وەرەقە و پاکێج بچێتە بەغدا، بۆ ئەوەی بەهێز بێت، چونکە یەکهەڵوێست نەبین و بە یەک پاکێج نەچین، لاواز دەبین، بۆیە یەکهەڵوێستیی کورد زۆر گرنگە و پێویستیشە.
سەعدی ئەحمەد پیرە، ئەندامی مەکتەبی سیاسیی یەکێتیی نیشتمانیی کوردستان، بۆ ماڵپەڕی فەرمیی پارتی دیموکراتی کوردستان گوتی: ”ئەگەر لەناو کورد هەر حزبێک وەرەقەی خۆی ببات بۆ بەغدا غەدر دەکات، چونکە ئەگەر حزبەکان بەجیا هەر یەکەیان وەرەقەی خۆی ببات، هی حزبە، نەک هی کورد، بۆیە پێویستە وەرەقەیەکی هاوبەش هەبێت، پارتی و یەکێتی و لایەنەکانی دیکەش لە بینای سەرۆکایەتیی هەرێمی کوردستان کۆ ببنەوە و بیبەن بۆ بەغدا، ئەوە وەرەقەی کوردە، ئینجا کێ بڕوات بەجیا ماوەیەکی کاتییە و ڕەنگە عەیبەش بێت بۆ کورد.”
سەعدی ئەحمەد پیرە گوتیشی: ”هەر کۆبوونەوەیەک ئەنجام بدرێت ئیجابی و باشە، چونکە سەنگەرگرتن کارێکی خراپە و کارێکی باش نییە.”
پیرە ڕوونیشی کردەوە: ”کە ڕێککەوتن کرا، ئەوکات ئێمە خەڵکی شارەزامان هەیە بچنە بەغدا و یەکەم جاریشمان نییە لەگەڵ بەغدا گفتوگۆ دەکەین و دەتوانین جێبەجێی بکەین ئەو ڕێککەوتنەی دەکرێت.”
هەر لەم بارەیەوە، هیوا ئەحمەد، بەرپرسی لقی 24ی سەفینی پارتی دیموکراتی کوردستان، بۆ ماڵپەڕی فەرمیی پارتی دیموکراتی کوردستان گوتی: ‘یەکڕیزی زۆر پێویستە بۆ هەموو میللەتان و بەتایبەتیش بۆ ئێمەی کورد کە دوژمنمان زۆرە و بەتایبەت هەرێمی کوردستان کە بووەتە مایەی ئومێدی هەر چوارپارچەی کوردستان و کاری زۆر دەکرێت، لاواز بێت و یەکهەڵوێستی نەبێت و نزیکبوونەوە زۆر گرنگە، بەتایبەت بۆ ئێستای هەرێم و عێراق و لە نێوان پارتی و یەکێتی و حزبەکانی دیکە تا بکرێت یەکهەڵوێستی و یەکڕیزی هەبێت و ڕۆیشتن بۆ بەغدا بە یەک پاکێج، بۆ ئەوەی لە داهاتوودا پێگەمان بەهێز بێت، بۆیە پارتی لەسەر ئەو بنەمایە کۆمەڵێک دانیشتن و دیداری ئەنجام داوە لەگەڵ حزبەکان، بەتایبەت لەگەڵ یەکێتی، بۆ ئەوەی هاوهەڵوێست بین بەرامبەر بەغدا.”
هیوا ئەحمەد گوتیشی: تا چەند باسی گرنگیی یەکهەڵوێستیی کورد بکرێت هەر کەمە، بەڵام یەکهەڵوێستی بۆ بەهێزکردنی هەرێمی کوردستان بێت، نەک هەرێمی کوردستان لاواز بکات، ئەوکات مەترسیدارە، بۆیە چوونی کورد بە یەک پاکێج بۆ بەغدا گرنگە و پێویستە هەمووان پشتیوانیی بکەین.”
