دانیشتووانی گوندەكان داوای خزمەتگوزاری زیاتر دەكەن

زاری كرمانجی- سۆران:

هاووڵاتییان خوازیارن بایەخی زیاتر بە ئاوەدانكردنەوەی گوندەكان بدرێت، ئابووریناسێكیش پێیوایە ئەمە هۆكارێك دەبێت بۆ بووژانەوەی ئابووری وڵات. سەرپەرشتیاری ئیدارەی سەربەخۆی سۆرانیش، دەڵێت، بۆ جێبەجێكردنی پڕۆژە خزمەتگوزارییەكان، گرنگی زیاتر بە گوندەكان دەدەین.
دانیشتووانی گوندەكانی ئیدارەی سەربەخۆی سۆران، لە رێگەی زاری كرمانجییەوە داواكارن لە حكوومەت و لایەنە پەیوەندیدارەكان، ئاوڕی زیاتر لە دانیشتووانی گوندەكان بدرێتەوە بە دابینكردنی خزمەتگوزاری جۆراوجۆر و چاككردنی رێگاوبان و شەقام و كۆڵانەكان، بۆ ئەوەی ببێتە هۆكارێك دێهاتەكان زیاتر ئاوەدانی بەخۆیەوە ببین و رێگریش بێت لەوەی كە چیتر خەڵك كۆچ نەكەن بۆ شارەكان.
بەپێی راپۆرتێكی زاری كرمانجی و سەرژمێری بەڕێوەبەرایەتی ئاماری سۆران، كە لەم چەند ساڵی رابردوو ئەنجامدراوە، ئیدارەی سەربەخۆی سۆران پێكدێت، لە چوار قەزا و 13 ناحیە و 813 گوند، ژمارەی دانیشتووانەكەی زیاتر لە 330 هەزار كەسە”.
لای خۆیەوە عەبدولباقی ئەسعەد، دەرچووی كۆلێژی ئابووری و دانیشتووی سنووری ئیدارەی سۆران، بە زاری كرمانجی گووت” لە دێر زەمانەوە گوندەكان كاریگەری زۆریان هەبووە لەسەر بایەخدان بە بواری بەرهەم هێنانی كشتوكاڵی و بەخێوكردنی ئاژەڵداری، تەنانەت لە سەردەمانێكدا بژێوی دانیشتووانی شارەكان زیاتر لەسەر خەڵكی گوندەكان بووە، لەگەڵ ئەوەشدا بەرووبوومەكانیان خۆماڵی و تەندروست بوونە، نەك وەك ئەوەی ئێستا دەیبینین كە پشت بە بەرووبووم و داهاتی وڵاتان دەبەستین”.
ئەسعەد، دەشڵێت:” ئەگەرچی لەسەردەمی رژێم دانیشتووانی گوندەكان بە زۆر لەسەر گوند و ماڵ و حاڵیان دەردەكران و رادەگوێزران و دێهاتەكانیان وێران دەكرا، هێشتا خەڵكی ئارەزووی مانەوەیان بۆ گوندەكانیان هەبوو، كەچی دوای راپەڕین بەهۆی بووژانەوەی شارەكان و رەخساندنی هەلی كار، بە پێچەوانەوە بەشێكی زۆری دانیشتووانی گوندەكان وازیان لە ئاژەڵداری و كشتوكاڵی هێناوە و روویان لە شار و شارۆچكەكان كردوو، ئەمەش بووە هۆی كەمبوونەوەی بەربوومی خۆماڵی”.
ئاماژەی بەوەشكرد:” پێویستە حكوومەت دەستی زیاتری خزمەتگوزاری بۆ دانیشتووانی گوندەكان درێژ بكات، لەرووی ئاوەدانكردنەوە، رێگاوبان، ئاو، كارەبا، قوتابخانە و بنكە تەندروستییەكان، بۆ ئەوەی ببێتە هۆكارێك كە چیتر خەڵك ئارەزووی كۆچ كردن نەكەن بۆ شارەكان، بەڵكو بە پێچەوانەوە ئەوانەی كە نیشتەجێی شارەكان بوونە جارێكی دیكە روو بكەنەوە دێهاتەكانیان و دەست بكەنەوە بە كاری ئاژەڵداری و كشتوكاڵی، هەروەك لەو كابینەیەی حكوومەت پلان و بەرنامەی باش دانراوە بۆ پێشكەش كردنی خزمەتگوزاری بە دانیشتووانی شار و شارۆچكە و گوندەكان.
هەڵگورد شێخ نەجیب، سەرپەرشتیاری ئیدارەی سەربەخۆی سۆران، بە زاری كرمانجی راگەیاند:” لە چوارچێوەی هەوڵەكانمان بۆ جێبەجێكردنی پڕۆژە خزمەتگوزارییەكان، لە رووی پڕۆژەكانی ئاو، كارەبا، رێگاوبان، خزمەتگوزارییەكانی دیكە، گرنگی زیاتر بە گوندەكانی دەوروبەری سنووری ئیدارەی سۆران دەدەین، هەروەك چۆن گرنگی بە سەنتەری شار دەدرێت، بۆ ئەو مەبەستە لەگەڵ بەرپرسانی ئیداری شار و شارۆچكەكانی سنوورەكەمان لە نزیكەوە سەردانی چەند گوندێكمان كردووە و لە كەم و كۆڕییەكانمان كۆڵی وەتەوە”.
سەرپەرشتیاری ئیدارەی سەربەخۆی سۆران، گووتیشی “جێبەجێكردنی پڕۆژەكان بە شێوەیەكی دادپەروەرانە، بەپێی ئەو توانایەی كە لە بەردەستە بەبێ جیاوازی دابەشی سەر قەزا و ناحییە و گوندەكانی سنوورەكەمان دەكەین، هەوڵ دەدەین بە هۆكاری نەبوونی خزمەتگوزاری لە گوندەكان رێژەی كۆچكردنی هاووڵاتییان لە گوندەكانەوە بۆ شارەكان كەم بكەینەوە”.