لە سۆران نرخی نەمام و گوڵی سرووشتی بەرزبۆتەوە

زاری كرمانجی – سۆران:
لە دەروازی شاری سۆران چەندین شوێنی فرۆشتنی نەمام و گوڵی سرووشتی بەرچاو دەكەون، بەپێی بەدواداچوونەكان، خواستی هاووڵاتییان لەسەر كڕینی گوڵی سرووشتی و نەمام زیادی كردووە، هەروەها هەلی كاریشی بۆ چەندین كاسبكار رەخساندووە.
كۆڤان بورهان، سەرپەرشتیاری گوڵخانەی شار لە قەزای سۆران، بە زاری كرمانجی راگەیاند” خواستی هاووڵاتییان لەسەر كڕینی نەمام و گوڵی سرووشتی بەپێی وەرزەكانی ساڵ دەگۆڕێت، بەتایبەتیش لە وەرزی بەهاردا هاووڵاتییان زۆر داوای دەكەن، بەڵام لەورزەكانیشدا هەندێك گوڵ و نەمامی تایبەتمەند هەیە خواستی كڕینیان لەسەرە، ئێمەش بەپێی خواستی هاووڵاتییان گوڵی جۆراوجۆر دەهێنین و بە نرخی گونجاو بە موشتەریەكانمان دەیانفرۆشینەوە”.
كۆڤان، گووتیشی:” چەند ساڵێكە رووم لە كاری گوڵفرۆشی كردووە جگە لە خۆم، چەند كەسێك لەو گوڵخانە كار دەكەن، كە بە سەدان جۆرە گوڵمان هەیە، ئەركی خزمەتكردنی گوڵیش ئەستەمە، چونكە ئەگەر بەردەوام چاودێری نەكرێت، وشك دەبن و لەناو دەچن، بەمەش زیان دەكەین، بەڵام ئێمە لەسەر كارەكەمان راهاتووین و توانیومانە جوانترین جۆری گوڵ بەرهەم بهێنین و تا راددەیەك لە ئاستی خواستی هاووڵاتییانی دەڤەرەكەدا‌ بین، هەوڵیشمان داوە زۆربەی جۆرە گوڵەكان لامان دەست بكەوێت”.
ئاماژەی بەوەشكرد ” تا راددەیەكی زۆرباش باش خواستی هاووڵاتیان لەسەر كڕینی گوڵی سرووشتی هەیە، هەروەها زۆرجار لە كاتی ئاهەنگی دەرچوونی قوتابییانی زانكۆ و پەیمانگەكان و بۆنە ژینگەییەكاندا، قوتابییان و كەسوكاریان، هەروەها رێكخراوە ژینگەییەكان و لایەنە پەیوەندیدارەكان سەردانمان دەكەن و داوای گوڵی سرووشتی دەكەن، ئەوەش بۆ ئێمە باشە، لە رووی نرخەوەش جیاوازیان هەیە بۆ نموونە نەمام و گوڵی تایبەت هەیە بەراورد بە ئەوانی دیكە نرخەكەی زۆر زیاترە، بەڵام بەشێوەیەكی گشتی بارودۆخی ئەو كەسانە لەبەرچاو دەگرین كە بۆ ئەم مەبەستە سەردانمان دەكەن”.
هەردی كەریم، گەنجێكی كاسبكاری ئیدارەی سۆرانە، لە نەمامگەكەیدا لە دروازەی شاری سۆران، چەندین جۆر نەمامی هەیە، بە زاری كرمانجی گووت” چەند ساڵێكە كاری هێنانی نەمام و چاندن و رواندن و فرۆشتنەوەیان دەكەین، ‌لەو رێگەیەشەوە توانیومانە داهاتێك بۆ خۆمان دەستەبەر بكەین، جگە لە ئێمەش دەیان كەسی دیكەی كاسبكار‌ لە دەڤەری سۆران سەرقاڵی ئەو كارەن و شانازییشی پێوە دەكەین، چونكە لەو رێگەیەوە بایەخ بە سەوزایی و گوڵ و گوڵزار و ژینگەی پاك دەدرێ‌، لە هەمانكاتیشدا دەتوانین داهاتێكی رۆژانە بۆخۆمان دەستەبەر بكەین”.
وەك ئەم خاوەن نەمامگەیە باسیشی لێوەكرد” دەیان جۆر نەمام و گوڵ لە نەمام خانەكەیاندا هەن، نرخەكەشیان بەپێی جۆر و تایبەتمەندیی نەمامەكە دەگۆڕێت، كە دوو جۆرن، هەیە بەردارە و هی واش هەیە تەنیا بۆ جوانی دەڕوێندرێت، بۆیە نرخەكانیان جیاوازە‌، لەو وەرزەی بەهاریشدا خەڵك زیاتر داوای نەمام دەكەن بە بەراورد بە وەرزەكانی دیكەی ساڵ”.
ئاشكراشی دەكات:”بازاڕی گوڵ و نەمامی سرووشتی هاوشێوەی كاڵاكانی دیكە گۆڕانكاریان بەسەر دادێت لە رووی نرخەكەیاندا، بەمەش بە بەراورد بەو چەند ساڵی رابردوو، نرخی بەشێك لەو نەمامانە گران بووە، هۆكارەكەشی ئەوەیە كرێی گواستنەوە و هێنانی نەمامەكان هەروەها ئەركی پاراستن و پەروەردەكردن و پێگەیانی نەمام تا رادەیەك ئەستەمە و خزمەتیان دەوێ‌، هەروەها ئەوانەی بە شاگردی كاردەكەن دەبێت رۆژانەیەكیان پێ بدرێت، هەروەك لە زۆربەی نەمامگەكان چەند كەسێك كار دەكەن و هەلی كاركردنیان بۆ رەخساوە و لەو رێگەیەوە رۆژانەیەك بۆ خۆیان پەیدا دەكەن”.