ڕاپۆرت- محەمەد هەسنانی
چەندین كاسبكار بە درێژایی رێگای سەرەكی قەزای شەقڵاوە تا سنووری ناحیەی خەلیفان دەبیندرێن، مامەڵەی فرۆشتنی بەرهەمە خۆماڵییەكان دەكەن، وەك ئاماژەی بۆدەكەن، گەشتیاران و رێبواران كڕیاری سەرەكی ئەو بەرهەمانەن.
لەمبارەوە دلۆڤان رەشاد، كاسبكارێكە لە مامەجەلكە سەر رێگای گشتی شەقڵاوە-هەریر، دوكانی تایبەت بە فرۆشتنی بەرهەمە خۆماڵییەكانی هەیە، بەزاری كرمانجی راگەیاند: ” بە درێژایی چەند كیلۆمەتر واتە لە سەر رێگای گشتی رێگایی نێوان (شەقڵاوە-خەلیفان) بە دەیان خاوەن دووكان و كەپر و كاسبكار دەبیندرێن، مامەڵەی فرۆشتنی بەرهەمە خۆماڵییەكان دەكەن وەك (نانەقەیسی، باسوق و سجوق، هەنجیری وشك، سركە، بەنیشتی كوردی، نانە هەڵوژە، مێوژ، هەنگوین، گوێز، لوقم) لەگەڵ چەندین جۆرە بەرهەمی دیكەی خۆماڵی جۆراو جۆر، ئەمەش هەلی كاری بۆ چەندین كاسبكاری ناوچەكە رەخساندووە، زۆربەی ئەو بەرهەمە خۆماڵیانەش لە سنوری قەزای شەقڵاوە بەرهەم دەهێندرێن”.
گووتیشی: ” جگەلەوەی ئێمەی كاسبكاران لە دووكان و شوێنەكانی پاڵ رێگاكە كاری فرۆشتنی ئەو جۆرە بەرهەمە خۆماڵیانە دەكەین، لە هەمانكاتیشدا هۆكارێكی باش دەبین بۆ كڕینەوەی ئەو جۆرە بەرهەمانە لە جوتیاران و خاوەن ڕەز باخەكانی سنوورەكە، ئەوەش وایكردووە تا راددەیەكی باش ئابووری سنووری قەزای شەقڵاوە بووژانەوە بەخۆیە ببینێت، تا دێت رێژەی ئەو كاسبكارانە روو لە زیادبوون دەكات و دانیشتووانی شەقڵاوەو گوندەكان و خۆشناوەتیش بایەخی زیاتر بە بەرهەم هێنانی بەربوومی خۆماڵی دەدەن و هاوردەی بازاڕەكانی دەكەن”.
ئەو كاسبكارە ئاشكراشی دەكات: ” خواستی سەرەكی كڕینی بەرهەمە خۆماڵییەكان زیاتر بریتین لە گەشتیاران، هەروەها رێبوارانیش واتە ئەو كەسانەی ڕۆژانە بە رێگا سەرەكییەكە تێپەڕدەبن، لەلای ئێمە دەوەستن بە مەبەستی كڕینیان، نەرخە كەشیان تا ڕاددەیەكی باش گونجاوە، ئەوەش وایكردووە خواستی زیاتر لەسەر بێت.
جەواد سورچی، دانیشتووی سنووری ناحیەی خەلیفان، یەكێكە لەو كاسبكارانە بە زاری كرمانجی گووت : “رۆژانە بە دەیان كاسبكار روو دەكەینە پێچەكانی سپیلك لە رێگای سەرەكی (خەلیفان- شەقڵاوە) بەمەبەستی بەدەستهێنانی برە پارەیەكی رۆژانە، بۆ ئەوەی بژێوی خۆمان و ماڵ و خێزانمان بەڕێوەبەرین، كە بەپێی وەرزەكان گژ و گیای خۆڕسك و بەروبوومی خۆماڵیی ناوچەكە لە جووتیاران و خاوەن رەز و باخەكەكان دەكڕین و لێرە بە موشتەرییەكانمان دەفرۆشینەوەو لەو رێگەیەوە داهاتێك بۆ خۆمان و خێزان و منداڵەكانمان دەستەبەر دەكەین”.
ئاماژەی بەوەشدا: ” تا زیاتر گەشتیاران روو بكەنە ناوچەكانی شەقڵاوەو سۆران، خواستی زیاتر لەسەر بەرهەمە خۆماڵییەكانمان دروست دەبێت، چونكە ئەوان خواستی زۆری كڕینی ئەو بەرهەمانە دەكەن، لەگەڵ ئەوەشدا رێبواران و دانیشتووانی شارو شارۆچكەو گوندەكانی دەڤەرەكە، لەكاتی تێپەڕبوون بە رێگاكە لەلامان لادەدەن و جۆرەها بەرهەمی خۆماڵیمان لێدەكەڕن، سروشتی و باشی كوالیتی بەرهەمە خۆماڵییەكانیش هۆكارێكی گرنگە كە خواستی كڕینیان زیاتر لەسەر دروست بێت، ئەو كارەش بۆ ئێمە خێردەداتەوەو چەندین ساڵە خۆم و چەندین كاسبكاری دیكە ڕۆژانە روو لەو شوێنە دەكەین و هەلی كارمان بۆ ڕەخساوە، تادێت ژمارەی ئەو كەسبكارانە زیاتر دەبێت و روو لەم شوێنانە دەكەن بۆ كارو كاسبەی و لەو رێگەیەوە بڕە پارەیەكی ڕۆژانە بەدەست دەهێنن.
