زاری كرمانجی-مێرگەسۆر:
محەممەد فریا، بەڕێوەبەری رۆشنبیری و هونەری مێرگەسۆر، بە زاری كرمانجی گوت: ڕۆژی پێنج شەممە كاتژمێر 10، دیداری رۆشنبیری مێرگەسۆر، لەژێر دروشمی “ژینگە و پێكەوە ژیان لە كوردستان بارزان وەك نموونە” بە بەشداری كەسانی پسپۆر و بەرپرسانی حكوومی بەڕێوە دەچێت، ئامانج لەم دیدارە ئەوەیە كلتووری سەردەمی شێخ عەبدولسەلامی دووەم كە تا ئێستا پارێزراوە بگوازینەوە بۆ ناوچەكانی دیكەی هەرێمی كوردستان.
بەڕێوەبەری رۆشنبیری و هونەری مێرگەسۆر، گوتیشی: نمایشكردنی دیكۆمێنتاری لەسەر سروشت و ژینگەی دەڤەری بارزان لەلایەن ژینگە دۆست محەممەد سدیق بارزانی پێشكەش دەكرێت، هەروەها رێز لە چەند كەسێك دەگیرێت كە خزمەتیان كردووە لە بواری رۆشنبیری و پەروەردەیی و ژینگەیی.
محەممەد فریا، بەڕێوەبەری رۆشنبیری و هونەری مێرگەسۆر، ئاشكراشی كرد: ئەم دیدارە رێخۆشكەرە بۆ ئەنجامدانی كۆنفڕانسێكی زانستی نێودەوڵەتی، كە دەمانەوێت ساڵی داهاتوو ئەنجامی بدەین، هەوڵدەدەین بابەتی ژینگەپارێزی بخرێتە نێو پڕۆگرامی خوێندن، هەروەها لەلایەن قایمقامی قەزاكە پێشنیاز كراوە مێرگەسۆر بكرێتە پایتەختی ژینگەپارێزی، چونكە هەموو تایبەتمەندییەكی تێدایە.
