مردنى ژينا ژيانى به‌ر شۆڕشى شه‌قام كرده‌وه‌

ڕۆژان قیاس- زاری كرمانجی :

“بەم شێوەیە نا مرۆڤانە مامەڵەكردن لەگەڵ كوردانمان لە ڕۆژهەڵات تەنیا درێژە دانە بە بیری سڕینەوەی كورد و داگیركردنی خاكمان”
” لەم چەند ساڵەی ڕابردوو ئێمە هەر خەریكی ژماردنی قوربانەكانین، بەدەستی دوژمنانمان لە هەر پارچەیەكی كوردستان بووبێت”
دوای ئەوەی كچە كوردێكی ڕۆژهەڵات، بە ناوی ژینا ئەمینی (مەهسا ئەمینی) تەمەن ٢٢ ساڵ لە شاری سەقز، بە دەستی هێزە سەركوتكەرەكانی ئێران بە تۆمەتی پابەند نەبوون بە باڵاپۆشی دەستگیر دەكرێت و دوای دەستگیركردنەكەی، ژینا تووشی خوێنبەربوونی مێشك دەبێت و بۆ ماوەی چەند ڕۆژێك دەچێتە كۆماوەو دواتر گیان لە دەست دەدات، پۆلیسی ئێران دەڵێت بەهۆی ترسانەوە ژینا جەڵتەی مێشكی لێداوە، بەڵام بنەماڵەی ژینا پۆلیسی ئێران تۆمەتبار دەكات بە كوشتنی كچەكەیان، لە كاتی دەستگیركردنی ژینا بە باتۆم لێی دراوە و سەری بە سەختی بریندار بووە، بەو هۆیەوە تووشی خوێنبەربوونی مێشك دەبێت، ئەم ڕووداوە هەموو ئێرانی هەژاند، ڕێكخراوەكانی پاراستنی مافی مرۆڤ و چالاكوانانی كۆمەڵگەی مەدەنی و هونەرمەندان و ڕۆشنبیران تا دەگاتە شەقام كاردانەوەی توندیان هەبوو لە بارەی مەرگی ژینا، كار گەیشتە خۆپیشاندانی چەندین ناوچەی وڵاتی ئێران كە بەو هۆیەوە توندوتیژی لە نێوان هێزەكانی ئاسایش و خۆپیشاندەران دروست بوو چەندین كەس بریندار كران، بە پێی زانیارییەكان كەسێكیش لە خۆ پیشاندەران كوژراوە، كوشتنی ژینا تەنها لە ئێران دەنگ دانەوەی نەبوو، بەڵكوو لە هەموو دونیا قسەی لەسەر كرا و خودی ئیبراهیم ڕەئیسی سەرۆكی ئێران لە پەیوەندییەكی تەلەفۆنی لەگەڵ خانەوادەی ژینا پشت راستی كردەوە كە دەبێت بەدواداچوون بۆ ئەو ڕووداوە بكرێت و پێی گوتبوون( كچی ئێوە كچی منیش بووە).
“بە تۆمەتی پابەندنەبوون بە باڵاپۆشی نەیانهێشت جوانییەكانی بەسەر ژیانا بڵاوە پێ بكات”
كوردستان یاسین، چالاكوانی پاراستنی مافی ئافرەتان لە بارەی مەرگی ژیناوە گووتی” ئەو كارەساتە قێزەونەی بەسەر ژینا ئەمینی تەمەن ٢٢ساڵ داهێنرا لە ئێرانی ستەمكار، پرس و بابەتێكی هێندە نوێ نین كە خۆمان لێیی بە بێئاگا پیشان بدەین، بەناو ئیسلامەكانی ئەم دیوسنوورمان هەمیشە لە هەوڵی سڕینەوەمانن لەژێر هەر پاساوێك بێت، ئەم خاتوونە كە لە بەهاری تەمەنی دا بوو هەزارەها هیوا و خواست لە ژیان و زەینیدا نێرگزئاسا خۆیان بە روویی ژیان نیشان دەدا، بە تۆمەتی پابەندنەبوون بە باڵاپۆشی نەیانهێشت جوانییەكانی بەسەر ژیانە بڵاوە پێ بكات، تەنیا بە تاوانی ئافرەت بوون و كورد بوونیی ژێر خاكیان كرد، نە بابەتێكی ڕەوشتی و نە كێماسیەك لە جلوبەرگەكانیدا بوونی هەبووە، پاسدار و مینیشیا بەناو دیندارەكانی ئێران جیا لە تۆمەت هەڵبەستن و زیندانیكردن و بێڕێزی كردن بەم خاتوونە ڕۆژهەڵاتییە، زۆر بێ ڕەحمانە سزایان داوە و هێرشیان كردووەتە سەری بە شێوەیەكی وا دڕندانە و بێبەزەیییانە دواجار بەهۆی قووڵی برینەكانی گیانی لەدەست داوە، ئەو توندڕەوە دژە كوردانە بۆ سڕینەوەیی ئێمەی كورد بیانووی گەلی نادروست و ڕێ تێنەچوو دروست دەكەن، ئەم سیناریۆ و تۆمەتە نابەجێیانە، هەم بەم شێوەیە نا مرۆڤانە مامەڵەكردن لەگەڵ كوردانمان لە ڕۆژهەڵات تەنیا درێژەدانە بە بیری سڕینەوەیی كورد و داگیركردنی خاكمان، ئەمە یەكەم كەیسی هەڵبەستراوی داگیركەرانی ئێران نییە بەسەر هاووڵاتییان و ئافرەتانی ڕۆژهەڵات، با بیرمان نەچێت هەر لە ماوەكانی ڕابردوودا كەیسی زارا محەممەدی كچە كوردێكی ڕۆژهەڵاتی كوردستانە، لە ئێران بە هۆی فێر كردنی زمانی دایك بە منداڵانی كورد، 10 ساڵ زیندانی بەسەر سەپێنرا، ئاخۆ دەبێت چەند كەیس و بابەتی تری هاوشێوە كپ كرابن، ئەوەی لێرە جێیی ئاماژە پێ كردنە هەڵوێستە جوامێر و ئازایانەیی كوردانی ڕۆژهەڵات و سەقزە بەهۆی ئەم ڕووداوە، ڕۆحی ژیناو هەموو شەهیدانی كورد و كوردستان شاد”.
“بۆ ئەوەی ئێمە ئەم ڕووداوانە لە بیر نەكەین دەبێت هەڵوێستەكانمان زیاتر بن و گوشاری زیاتر بكەین”
كرمانج فەتاح، چالاكوان و توێژەری دەروونی لە بارەی ئەم ڕووداوەوە گووتی” ئەمڕۆ دوو جۆرە كوشتن بوونی هەیە، كوشتنی بایۆلۆجی و تیرۆری مەعنەوی، ئەوەی دەی ببینن كورد هەمیشە لەژێر ئەم دوو جۆرە هەڕەشەدایە، بە هەر بیانوو یەك بێت كوشتنی كورد ئاسایی بووەتەوە لە هەر پارچەیەكی كوردستان بێت، دەبینن تەنیا بۆ كوشتنی كورد دەستیان ناترسێت، بەو دوایانەش كوشتنی كچە كوردێك بوو بە دەستی كۆماری ئیسلامی ئێران كە ئەمەش بووە هەواڵێكی گەرمی نێو دونیایی میدیایی ناوخۆی و جیهانی، كە كارێك بوو دژ بە كچە كوردێك كە دوور بوو لە هەموو جۆرە بەهایەكی ئەخلاقی كە دژ بە ژنێكی بێ تاوان كرا، ئەوەی دەیبینن لەم چەند ساڵەی ڕابردوو ئێمە هەر خەریكی ژماردنی قوربانەكانین، بەدەستی دوژمنانمان لە هەر پارچەیەكی كوردستان بووبێت، بۆیە ناكرێت ئێمە زوو ئەم ڕووداوانەمان لە بیر بچێتەوە دەبێت زیاتر گوشاری نێودەوڵەتی بگرینە بەر بۆ ئەوەی كەسانی تریش نەبنە قوربانی، كاتێك تاك لەپێناو ئازادی و نان و مافەكانی وە دەنگ دێت ناكرێت بە كوشتنی وەڵام بدرێتەوە، هەمیشە گوتوومە كورد ماندوو ترین مێژووە بەدرێژای مێژوو، چونكە بە هەموو شێوازێكی كوشتن تاقیكراوتەوە، بۆ ئەوەی ئێمە ئەم ڕووداوانە لە بیر نەكەین دەبێت هەڵوێستەكانمان زیاتر بن و گوشاری زیاتر بكەین”.