سەرۆك شارەوانی سیدەكان: چەندین پڕۆژەی گرنگ لە سەنتەری قەزا جێبەجێ دەكەین

موڕشید برادۆستی – سیدەكان:

ماوەی چەندین ساڵە بە شێك لە گەڕەك و كۆڵانەكانی قەزای سیدەكان سەر بە ئیدارەی سەربەخۆی سۆران، گرفتی خزمەت گوزاریان هەیە و داوا دەكەن حكوومەت پڕۆژەیان بۆ جێبەجێ بكات .
سیدەكان دووای بە قەزا بوونی، ژمارەیەك پڕۆژەی گرنگی رێگە و بان لە دەرەوەی سەنتەری سیدەكان لە واری جێبەجێ كردندان، بە مەش دەیان گوندی ناوچەكە ئاسانكاری هاتووچۆیان بۆ دروست دەبێت، دانیشتوانانی سەنتەری قەزاش، خوازیارین شەقام و گەڕەك و كۆڵانەكانیان نۆژەن بكرێتەوە و خزمەت گوزاری سەرەتییان بۆ دابین بكرێت.
عەلی عەقید دانیشتووی گەڕەكی فەرمانبەرانی سیدەكانە، بە زاری كرمانجی گووت:” ماوەی چەندین ساڵە رێگەی كۆڵانەكەمان خۆڵە و بە زستانانیش قوڕ و چڵپاوە، سەرباری ئەمەش كەندێك لە بەردەم ماڵەكانماندایە زۆر جار بە هۆی بەرز بوونەوەی ئاو مەترسی لەسەر گیانی منداڵەكانمان دروست دەبێت، لە هەمان كات سیمایەكی ناشرین دەبەخشێت و بۆنێكی ناخۆشیش لەو شوێنە بڵاو دەبێتەوە، چەند جارێك ئۆتۆمبێلیش كەوتوونەتە نێو ئەو كەندە، بۆیە پێویستە سەرۆكایەتی شارەوانی سیدەكان ئەو شوێنە چابكات و خزمەت گوزاری بگەینێتە گەڕەك و كۆڵانەكەمان.
دلشاد قادر هاووڵاتییەكی دانیشتووی گەڕەكی گوڵانی سەرووە، بە زاری كرمانجی گووت:” رێگەی سەرەكی كۆڵانەكەمان بە شێوەیەك خراپە كەڵكی هاتووچۆ كردنی نییە، پێویستە حكوومەت رێگە چارەیەك لە كۆڵانەكەمان بكات، تا گرفتی هاتووچۆمان بۆ دروست نەبێت و لە تۆز و خۆڵی رێگا رزگارمان بێت .
هاووڵاتییان و دانیشتوانانی پشت باڵەخانەی گەرماوی سیدەكانیش، لە رێگەی زاری كرمانجی داوای پڕۆژە بە تایبەت چاككردنی رێگە و بانەكانیان دەكەن، ئاماژەبەوەدەكەن، گەڕەكەكەیان نزیكترین شوێنە لە سەنتەری قەزا تا ئێستا رێگەی كۆڵانەكانمان هەمووی خۆڵە، داوا دەكەن كۆنكرێت یا قیڕ بكرێت، تا سیمایەكی جوانتر بە قەزای سیدەكان ببەخشێت .
لای خۆیەوە، عەبدولقادر ئەكرەم سەرۆكی شارەوانی قەزای سیدەكان، بە زاری كرمانجی راگەیاند:” لە سنووری شارەوانیمان حەوت گەڕەك و چەندین كۆڵان پێكهاتووە، وەك گەڕەكی برادۆست، فەرمانبەران، گوڵان، ئازادی و سیدەكانی كۆن و بەردەوامیش لە فراوان بووندایە، بەشی زۆری ئەو گەڕەكانەش، ساڵی رابردوو خزمەت گوزاری سەرەتاییان پێگەیشتووە، بۆ ئەمساڵیش موژدەی كۆمەڵێك پڕۆژەی گرنگ و ستراتیژی بە هاووڵاتییانی دەڤەرەكەمان دەدەین.
سەرۆكی شارەوانی سیدەكان، دەڵێت:” لە پلانمادایە، بە گوژمەی 450 ملیۆن دینار لە گەڕەكی ئازادی كە خۆی لە كربستۆن و ئاوەڕۆ و قیڕتاوكردن و خزمەت گوزاری دیك دەبینێتەوە جێبەجێ بكەین، بە مەش گرفتی هاتووچۆیان نامێنێت، هەروەها پڕۆژەی دانانی ئاوەڕۆی لوولەی ” سندووقی ” كە چەندین ساڵە گرفتی سەرەكی سنتەری قەزای سیدەكانە، بە گوژمەی 750 ملیۆن دینار جێبەجێ دەكرێت و ئاساناكاری بۆ دانیشتوانان دروست دەبێت و سیمای شاریش جوانتر دەكات، هەر بۆ پلانی ئەمساڵ، پاركێكی مۆدێرنی سەردەمیانە لە سەنتەری قەزا دروست دەكەین، لە هەمان كات، بە گوژمەی 140 ملیۆن دینار، كاری رێكخستن بۆ نێو بازاڕی سیدەكان دەستپێ بكەین، وەك جوان كردنی سیامی بازاڕ و دانانی بیهاڕتۆن لە بەردەم دوكانەكان و چەند خزمەت گوزاریەكی دیكە، ئومێدەوارین لە ئایندەیەكی نزیكدا بخرێنە واری جێبەجێ كردن.
گووتیشی:” هەندێ كۆڵانی گەڕەكەكانی سیدەكان ماوە كاری لەسەر بكرێت، هەموو هەوڵێك دەدەین خزمەت گوزاری بگەینینە ئەو گەڕەك و كۆڵانەكان بە تایبەت لەو شوێنانەی خزمەت گوزاریان بۆ نەچووە”.