زاری كرمانجی – سۆران :
رژێمی بەعس بە وێرانكردنی گوند و ئاوایی و سروشتی كوردستان نەوەستا، بەڵكو ئەو شوێنانەی كە بە سنووری ناوچە ئازادكراوەكانی ژێر دەسەڵاتی بزوتنەوەی رزگاریخوازی خەڵكی كوردستان دەهاتە ناساندن و لەگەڵ ئەو رێگا و چیا و دەشتانەی گومانی هاموشۆی پێشمەرگەی لێ دەكرا، هەروەها ئەو تەپۆڵكانەی كە سەنگەر و بارەگای سوپاكەی لێبوو، تەواوی مین رێژ كرد.
مێژووی مین لە هەرێمی كوردستان بۆ ساڵی شەستەكان دەگەڕێتەوە،
جەبار مستەفا ڕەسوڵ، سەرۆكی دەزگای گشتیی كاروباری مین لە دیدارێكی لەگەڵ فەرمانگەی میدیا و زانیاری حكومەتی هەرێمی كوردستان باس لە وردەكاری رووبەری خاكی مینڕێژكراوی هەرێمی كوردستان كرد و گوتی:”هەرێمی كوردستان بە چەند قوناغێكی جیا جیا بە مین و پاشماوەی جەنگی پیس كراوە و بە پێی ئەو ڕووپێویەی لە دەزگای گشتیی كاروباری مین هەیە ٧٧٦ كیلۆمەتر چوارگۆشە لە هەرێمی كوردستان مینڕێژ كراوە و حكومەتی هەرێمی كوردستان بە هاوكاری ڕێكخراوە بیانییە هاوبەشەكان لە دوای ساڵی ١٩٩٢ی زایینییەوە تا ئێستا توانیویەتی ئەو ڕێژەیە بۆ ٢٥٨ كیلۆمەتری چوارگۆشە كەم بكاتەوە”.
هەروەكو سەرۆكی دەزگای گشتیی كاروباری مین ئاماژەی بۆ دەكات لە ساڵی 2022 بە هۆی پەتای كۆرۆنا و ئەو قەیرانەی رووبەرووی هەرێمی كوردستان بووە، كارو چالاكییەكانیان سستی بەخۆیەوە بینیووە و دەڵێ:” لەماوەی دەستبەكاربوونی كابینەی نۆیەم ، بەهۆی پەتای كۆرۆنا و ئەو قەیرانە دارایییەی هاتە كایەوە، دەزگای گشتیی كاروباری مینیش سستییەكی بەخۆیەوە بینی و هۆكارەكانی گواستنەوە و ئامێرەكانی كاركردن لە كەمییان دا، بۆیە تەنیا ٦٠٩ هەزار مەتر دووجا پاك كرایەوە”.
جەبار مستەفا باس لەوەش دەكات ساڵانە 500 بۆ 600 مین هەڵگیراونەتەوە و دەڵێ:” ئێستا ڕێكخراوی (MAG) لە دهۆك و سلێمانی و گەرمیان و چەمچەماڵ كاری پاككردنەوە و هۆشیاری دەكات و یارمەتی قوربانیانیش دەدات. لەو سێ ساڵەی كابینەی نۆیەم سەڕەرای بوونی هەموو ئاستەنگییەكان، ساڵانە ٥٠٠ تا ٦٠٠ مین هەڵگیراونەتەوە و لەناوبراون و هەروەها چەندین پاشماوەی جەنگیش چارەسەر كراون و دواتر لەناوبراون”.
لەبارەی گرفت و مەترسییەكانی مین لەسەر هاووڵاتییانی هەرێمی كوردستان بە تایبەتی لەو ناوچانەی بە مین چێنراون، جەبار گوتی:”ئێستاش لە هەرێمی كوردستان مین و پاشماوەی جەنگی هەڕەشەیەكی جدییە بۆ سەر گیان و ژیانی هاووڵاتیان بە تایبەتی لە ناوچە سنوورییەكان و ئەو دێهاتانەی ئاوەدان دەكرێنەوە و خەڵك دەچێتەوە سەر ڕەز و باخی خۆیان، بۆیە ئەو شوێنانە شوێنی مەترسیدارن لەبەر ئەوەی ٣٥٠٠ كێڵگەی مینڕێژكراو لە هەرێمی كوردستان هەیە و، لە سێ ساڵی ڕابردووشدا بەشێوەكی گشتی ٩٦ كەس بوونەتە قوربانی.”
