محەممەد مەحموود- سۆران:
بەمەبەستی چارەسەر كەمی هۆڵی خوێندن و دابین كردنی پێداویستییەكان لە ئێستادا لەناو كۆلێژی تەكنیكی سۆران لە قۆناغی یەکەم، كاری درووستكردنی هۆڵی تازەی خوێندن و ژووری مامۆستایان و چەند كارێكی تر بە گووژمەی نزیکەی ٢٠٠ ملیۆن دینار لە قۆناغی جێ بەجێ كردندان و بۆ ساڵی نوێی خوێندن دەكەونە خزمەتی قوتابییان “.
پاكستان حەمەدە مین یوسف، راگری كۆلێژی تەكنیكی سۆران بە زاری كرمانجی راگەیاند:” دوا بە دوای گۆڕانكاری و گۆڕینی ناوی (پەیمانگەی تەكنیكی سۆران) بۆ ( كۆلێژی تەكنیكی سۆران )، بەرپرسیارەتی و ئەركی سەرشانمانی قوڕستربووە و ئامادەكاری و دابینكردنی پێداویستییەكانی زیاتربوونە، وەكو پێداویستی پزیشكی و ئامێرەكانی تاقیگەی زۆرتر و كوالێتی باشترمان پێویستە، لەگەڵ دابینكردنی شوێنی گونجاو و هۆڵی خوێندن و تاقیگەی تازە بۆ ئەوەی بە باشترین شێوە خزمەتی قوتابییان بكەین و كەشێكی لەباریان بۆ برەخسێنین لە كۆلێژ بۆ خوێندن”.
راگری كۆلێژی تەكنیكی سۆران، دەڵێت:”: ( پ.د. ئیدریس محەمەد تاهیر هەركی سەرۆكی ( زانكۆی پۆلیتەكنیكی هەولێر ) بۆ پڕكردنەوەی كەلێنی كەموكوڕییەكان بە پەرۆش و هاریكار و پاڵپشت هاتوونەتە پێشەوە، ئەم پێداویستییانەی بۆ كۆلێژ دابینكردووە، كۆمپیوتەر ،تاقیگە”.
سەرەڕای ئەم پێداویستییانەی سەرەوە، بڕیاری دروستكردنی نهۆمی دووەم دراوە و ئێستا بەشێكی باشی كارەكانی نهۆمەكە تەواو بووە، كە پێكهاتووە لە : ( 5 هۆڵ و ژوورەكانی مامۆستایان و سەرۆك بەش و بڕیاردەر ) ، ئەمەش جێگەی دەستخۆشی و پێزانینمانە بۆ ئەو پاڵپشتییە سەرۆكایەتی زانكۆی پۆلیتەكنیكی هەولێر”.
پاكستان حەمەدەمین یوسف، راگری كۆلێژی تەكنیكی سۆران لە كۆتاییدا باسی لەوەكرد ” كاری درووستكردنی نهۆمی دووەم و زیادكردنی ژوورەكان %50 تەواو بوونەو لەكاتی دەستپێكردنی ساڵی نوێی خوێندن دەكەوێتە خزمەتی قوتابییان، جگە لەمەش لەم پشووی هاوینە چەند كارو پڕۆژەیەكی تریشمان لەبەر دەستەو رەزامەندی وەرگیراوە بۆ یاریگای ناو كۆلێژیەكەمان و تاقیگەی زیاتر ، هەموو هەوڵێكی خۆمان دەدەین بۆ ئەوەی بە باشترین شێوە خزمەتی قوتابییان و پڕۆسەی خوێندن بكەین لە كۆلێژی تەكنیكی سۆران، گوژمەی ئەنجامدانی ئەو کارانەش نزیکەی ٢٠٠ ملیۆن دینارە”.
