ڕێبین ڕەحیم
ئەوەی لە پرۆژە یاسای بوددجەی عێراق بەسەر هەرێمی كوردستان دەهێنرێت و هێنراوە هیچی كەمتر نییە لە16ی ئۆكتۆبەر، ئەو هادی عامریەی سەرپەرشتی هێرشەكانی 16ی ئۆكتۆبەری كرد بۆ سەر هەرێمی كوردستان و نەهێشتنی ئەزموونی حكومڕانی كوردستان هەر ئەویش ئێستا بەنوێنەرایەتی قائانی و خەزعەلی خەریكی سەربڕینمانە بەناوی پرۆژە یاساو كاری پەڕلەمانی و حكومەتداری عێراقەوە .
ئەم دۆخە خراپەی ئێستای هەرێمی كوردستان، بەرهەمی ئەو ناتەبایی و نەبوونی یەكڕیزیەیە كە نەك نیمانە بەڵكو هەر نەماوە و هەر هێزێكی سیاسی بۆخۆی و بەپێی بەرژەوەندیەكانی خۆی خەریكی مامەڵەو موزایەدەیە لە عێراق و لە كوردستان و ئەم پرۆژە یاساییە نەك خۆشبەختی ناهێنێت بۆ كوردستان ناهێنێت، بەڵكو دەبێتە عورفێكی خراپ ساڵ دوای ساڵ پێگەو ڕۆڵی هەرێمی كوردستانی زیاتر پێ لاواز دەكرێت و ئێوەش لێرە هەر دانیشن خەریكی ڕەخنە و جنێو و سوكایەتی بن بەیەكترو بە ئەزموونی هەرێمی كوردستان .
ئێستا شمشێری تائیفی و ناخی ڕەشی دوژمنكارانەی هێزگەلی مەزهەبی و قەومی لەسەر گەروی كوردستانەو هێشتاش لێرە كەس موی گیانی گرژنابێت بڵێت ئەو دۆخە قابیلی قبوڵكردن نییە و هاوارێك بە گوێی جیهانی بێ مۆراڵی سەرمایەداریدا بدات و بڵێ نزیكەی حەوت ملیۆن كەس لەبەردەم برسی كردن و ڕزیلكردن و ئەتككردنی كەرامەتیدایە ئەگەریش پارتی هەنگاوێكی لەم جۆرە بەتەنها بنێت دڵنیابن هێزەكانی دیكە ئامادەی هاوكاری حەشدی شەعبی و حەسە پلایس و كیلابی و عامرین نەك بەرگری لە خاك وخەڵكی كوردستان بۆیە پارتیش هەردوو دەستی بە كەلەپچەی هێزگەلی ناوخۆیی بەستراوەو ئەوەی ئەو بۆ كوردستان دەیكات ئەمان لە كەمترین ماوەدا دەیدەن بەئاودا.
بۆیە دڵنیابن قبوڵكردنی ئەم دۆخە دەمانباتە تونێلێكی تاریك بەجۆرێك هیچ ئاسۆیەكی ڕوونمان لێوە دیار نییەو بەناو دۆستە بێ مۆراڵەكانی كوردیش تەنها تەماشای مەرگی ئێمە دەكەن و لە فەڕەنسایی مافی مرۆڤیشەوە بەبێ گوێدانە ژیانی نزیكەی حەوت ملیۆن مرۆڤ ڕێگە لە فرۆشتنی نەوتی كوردستان دەگرن و ناهێڵن بەهەر جۆرە قەرز و فەرزێك بوە موچەو داهات بۆ كوردستان پەیدابكەین هەرچۆن نەبێت خۆمانی پێ ببەین بەڕێوە.
ئێستا دیمەنەكە ڕوونە ئەوان لەوێ ڕێگەیان لە فرۆشی نەوتی ئێمە گرت و ئەمانیش لێرە هەزارو یەك بەند ماددە بۆ لە قاڵبدان و قۆڵبەستنی هەرێمی كوردستاندادەنێن بەناوی یاساوە و ئێمەش هێشتا لێرە خەریكی دانە چیڕەی ڕقوكین و هەڵمەتی پێشوەختەی هەڵبژاردن و موزایەدەی نامۆراڵانەین و بێ ئاگا لەوەی تیخی تیژی ئەوان گەردنی هەموومانی كردوەتە ئامانج نەك تەنها یەك هێزی سیاسی و لایەنێكی دیاریكراو”.
لە دوێنێ شەوەوە، بەقەد ساتەكانی خیانەتی 16ی ئۆكتۆبەر خەمم بۆ بێ كەسی كوردو كاڵفامی و نەبوونی یەكڕیزی وتەبایی هێزو لایەنەسیاسیەكانی كوردستان و ئاقیبەتی هەرێمی كوردستان خواردوە، شەرمنانە بیر لەو هەموو خوێن و خەبات و شەهید و قوربانیدانە دەكەمەوە سەدساڵە لەپێناوی ئازادیدا دەیدەین و ئێستاش بەدیار چەقۆی دوژمنەوە خەركی خنەبزەی بەرژەوەندی تەسكی حیزبی حیلكەحیلكی سەرشاشەو خۆبەپاڵەوانكردن و شێرە بەفرینەی بێ ماناین بەڕاستی كوردبوون ئازارێكی سەخت و ناخ سوتێن و بێچارەسەرە”.
