زاری كرمانجی – سۆران:
یەكێك لە پڕۆژە ستراتیژییەكانی لە سنووری ئیدارەی سۆران، لە قۆناغی جێبەجێ كردن دایە و بەشەو و رۆژ كاركردن تێیدا بەردەوامە، پڕۆژەی دووسایدی سپیلك خەلیفانە، سەرپەرشتیاری ئیدارەی سۆرانیش، دەڵێت:” هەوڵدەدەین پێش وەرزی زستان ئەو پڕۆژەیە تەواو بكرێت”.
لە رێكەوتی 15ی ئەیلوولی ساڵی رابردوو، بە ئامادەبوونی مەسرور بارزانی سەرۆكی حكوومەتی هەرێمی كوردستان و وەزیری ئاوەدانكردنەوە و نیشتەجێكردن و بەرپرسانی حزبی و حكوومی، بەردی بناغەی دروستكردنی پڕۆژەی دووسایدی سپیلك خەلیفان دانرا، بە درێژایی ٨ كیلۆمەتر و نیو بە گوژمەی زیاتر لە ٦٤ ملیار دینار بۆ ماوەی ٦٠٠ رۆژ لایەن كۆمپانیای كاڤین گروپ دەست بە جێبەجێ كردنی كرا .
هەڵگورد شێخ نەجیب، سەرپەرشتیاری ئیدارەی سەربەخۆی سۆران، بە زاری كرمانجی راگەیاند:” بە پێی ئەو بەرنامەییەی داندراوە، كارەكانی دووسایدی رێگای سپیلك خەلیفان پێش ورزی زستان تەواو دەكرێن”.
سەرپەرشتیاری ئیدارەی سۆران باسی لەوەشكرد:” جگە لەوەش دیزاینی ئەوەشكراوە فراوانكردنی زار گەلی و دەروازەی خەلیفان بگرێتەوە”.
بەتەواو بوونی ئەو پڕۆژەیە سیمایەكی جوانتر بەو ناوچەیە دەبەخشێت و دەبێتە هۆی نەمانی جەنجاڵی و كەمبوونەوەی رووادوەكانی هاتووچۆ و رەخساندنی چەندین هەلی كار بۆ هاونیشتیمانیان”.
