“ڕۆژێك دێت لەسەر دەستی سەرۆك بارزانی كوردستان دەبێتە دەوڵەت”
مستەفا دۆلەمەری – سۆران:
مقەدەم ئەشقی میرخان، میوانی بەرنامەی پێشمەرگە بوو، لەو بەرنامەیەدا باسی لەو داستانانە كرد كە تێیدا بەشداری كردووە و دەڵێ: هەموو ئەو شەڕ و داستانانەی كە تۆمار كراون بۆ ئەمڕۆ بووە كە بە ئاشتی و ئارامی لە كوردستان بژین و لەسەر دەستی سەرۆك بارزانی بە مافەڕەواكانی خۆمان بگەین. مقەدەم ئەشقی، لە دەستپێكی قسەكانیدا، دەڵێت: لە ساڵی ١٩٦٢ لە دایكبوومە و بۆ یەكەم جار لە ساڵی ١٩٧٨ لە گوندی بێڕۆخ پەیوەندیم بە ریزەكانی شۆڕشەوە كرد و لەگەڵ شەهید سەفەری سلێمان دۆلەمەری بوومە پێشمەرگە، ئەو كات گەنج بووم، هەر لەبەر گەنجایەتی تارادەیەك ترسم لە شەڕە تەقە بوو، یەكەم شەڕ كە بەشداریم تێدا كرد لە گوندی پیران بوو كە ئێستا ناحیەیە، دواتر لە ساڵی ١٩٨٠ بەشداریم لە شەڕی مێرگەسۆر كرد، ئەو كات لەگەڵ پێشمەرگەكانی دیكە گورزێكی گەورەمان لە دوژمن دا، بەسەرپەرشتی د. سەعید و سەفەری دۆلەمەری و حاجی میرخان لە رێگەی گوندی خۆشكان كەمینەیەكمان دانا و دوژمنمان تێكشكاند و زیانێكێ زۆرمان پێگەیاندن، لەو شەڕانەی دەكران ئەگەر بریندارێكمان هەبوایە هیچ شوێنێكمان نەبوو كە ڕەوانەیان بكەین بە ناچاری رەوانەی ئێرانمان دەكرد. ئەو فەرماندەیە، گوتیشی: لەو شەڕانەی كە دەكران ژمارەی پێشمەرگە زۆر كەمتر بوو لەچاو ژمارەی دوژمن، بەڵام بەهۆی ئەو بیروباوەڕەی كە هەمان بوو هەموو كات دوژمنمان تێك دەشكاند و زیانێكی زۆرمان پێ دەگەیاند. دەشڵێ: ئەو كاتەی كە پێشمەرگە بووین، زۆر بە كەمی دەچووینەوە بۆ ماڵەوە هەر لە چیاو چۆڵەكانی كوردستان دەماینەوە و بەرگریمان لە خاكی كوردستان دەكرد، بە زستان دەگەڕاینەوە بۆ كەتینە و بە بەهارانیش دەچووینە بێرۆخ، لە تەواوی ئەو شەڕانەی كە بەشداریم تێدا كردووە شەڕی سەری بەرد بەلای منەوە گرنگ بوو لە ٣١-٥-١٩٨٨ كە ١٨ پێشمەرگە بووین و یەك رۆژ لەو ناوچەیەدا ماینەوە توانیمان بەسەر دوژمندا سەربكەوین، بەبێ ئەوەی هیچ زیانێكی گیانیمان هەبێت، دواتر گەڕاینەوە بۆ گوندی لێرسماق، چوار فرۆكەی جەنگی بە ئاسمانی ئەو گوندەدا دەسووڕانەوە، دواتر تەقەیان لە ئێمە كرد و دوای ئەوە ئێمەش تەقەمان لێ كردن و ئەو فڕۆكانە سەربازیان داگرت و ئێمەش هەر تەقەمان كرد، ئەو كات ئەحمەد مەلاسواری بریندار بوو و گوتی، من چیتر ناتوانم بڕۆم ئێوە بڕۆن من توانای رۆیشتن نەماوە، بەڵام شەهید سەفەری دۆلەمەری پێی گوت تەنها ئەو كاتە بەجێت دەهێڵم كە هەموومان بە یەكەوە دەمرین، بە برینداری لەگەڵ خۆمان برد و لە گوندی لێڕسماق سەركەوتین و چووین بۆ گوندی قەلەندەر، ئەو كات سەرۆك بارزانی دەستخۆشی لە ئێمە كرد، داستانی خواكوڕكیش داستانێكی گەورە بوو، پێشمەرگە بەسەر دوژمن سەركەوت، سەرۆك بارزانیش لە بەرەی پێشەوەی شەڕ بوو، ئەوەش هێزێكی زۆری بە ئێمە بەخشی بوو و هەموو كاتێكیش دەیگوت هیچ كاتێك لە دوژمن نەترسن پێشمەرگە زۆر لەوە بەهێزترە كە ئەوان دەیزانن. مقەدەم ئەشقی میرخان، ئەوەشی گوت: لە ساڵی 2014 بەشداریم لە شەڕی داعش كرد لەگەڵ لەشكری گوڵان یەكەمجار چووین بۆ سحێلا و دواتر چووین بۆ شەڕی ئەبوو عەجەل كە گەورەترین شەڕ بوو لەگەڵ تیرۆریستانی داعش، لەو شەڕەدا زیاتر لە 60 تەرمی داعش كەوتنە دەست هێزی پێشمەرگە، دواتر گەراینەوە بۆ سحێلا و لە 11-1-2015 لەسەر فەرمانی مەنسوور بارزانی، بەرەو گوێر چووین و تاوەكو ساڵی 2015 لەوێ ماینەوە، تا كۆتایی بە تیرۆریستانی داعش هات و كوردستان لەو تیرۆریستانە پاك بوویەوە، لە بەرەكانی پێشەوەی شەڕ بووم، لە هەموو ئەو قۆناغانەی شەڕمان لەگەڵ دوژمن كردووە، خەبات و قوربانیدانی ئێمە بۆ سەربەخۆبوونی كوردستان بووە، ڕۆژێك دێت لەسەر دەستی سەرۆك بارزانی بەو ئاواتە دەگەین و كوردستان دەبێتە دەوڵەت.
