زاری كرمانجی-مێرگەسۆر
نەخۆشخانەی مێرگەسۆر لە چەند بەشێك پێكهاتووە و لە هەموو ئەم بەشانەشدا پسپۆڕی تایبەتی خۆیان هەیە، بەڵام هەموو پزیشكەكان ناتوانن رۆژانە بەردەوام دەوام بكەن، جگە لەمە نەخۆشخانەی مێرگەسۆریش وەك هەموو شوێنەكانی دیكە كەموكوڕی هەیە.
د. هەرمێ جەلال نەقشبەندی، بەڕێوەبەری نەخۆشخانەی مێرگەسۆر، لە دیدارێكی زاری كرمانجی، باس لە كارە رۆژانەكانی نەخۆشخانەی مێرگەسۆر و فریاكەوتن دەكات و دەڵێت”نەخۆشخانەكەمان لە دوو بەشی سەرەكی پێكهاتووە كە بریتین لە راوێژكاری و فریاكەوتن، راوێژكاریش چەند بەشێكی دیكە لە خۆ دەگرێت لەوانە، ئافرەتان، میزەڕۆ، نەشتەرگەری گشتی، تاقیگە، سۆنەر، CTscan، ددان و هەناوی و …هتد، ئەو بەشانەش زۆربەی زۆریان پزیشكی پسپۆڕ و تایبەتی خۆیان هەیە، هەفتانە دوو رۆژ دەوام دەكەن و رۆژێكیش بە ئیشكگر دەمێننەوە، ئەوەی دیكەیان بەشی فریاكەوتنە كە 24 كاتژمێر لە خزمەت هاووڵاتییاندایە، هەرچەندە دەوامی پزیشكەكان كەمێك گرفتە لەبەر ئەوەی لە شوێنی دوورەوە دێن و ناتوانن بمێننەوە چونكە بۆ ئەمە شوێن و خزمەتگوزاری تەواویان پێویستە، شوێنیشمان هەیە بەڵام خزمەتگوزارییەكان وەك پێویست نییە، بۆیە زۆرجار كە هاووڵاتییەك دێت لەوانەیە ئەو رۆژە پزیشكی پسپۆڕ لەوێ نەبێت، هەندێ پسپۆڕیش زۆر كەمن وەك پزیشكی قورگ و لووت و چاو، لە هەر یەك لەم پسپۆڕیانە یەك پزیشكمان هەیە.
زیاتر گووتیشی” كاتەكانی دەوامی فریاكەوتن و نەخۆشخانە گرفتی بۆ ئێمە دروست كردووە، چونكە بەشی سۆنەر و تیشكمان لە فریاكەوتن نییە و تەنها لە نەخۆشخانەكە هەمانە، هەرچەند پێشتر شوێنی بۆ دروستكراوە بەڵام ئامێرمان نییە، هەر كات پێویستمان بە تیشك و سۆنەر هەبێت دەبێ نەخۆشەكە لە فریاگوزاری ببەینە نەخۆشخانە كەچی دەوامەكە لەوێ تا كاتژمێر 2ی نێوڕانەیە، ئەمەش دووبارە دەبێتە گرفت بۆ هاووڵاتییان، زۆرجاریش ئەو ئامێرانەی كە هەن تێكدەچن تایبەت سۆنەر، هۆكارەكەشی بۆ ئەوە دەگەڕێتەوە كە ئەم نەخۆشخانەیە نزیكەی 63 هەزار دانیشتووی لەسەرە ئەمەش زۆرە و پێویستی بە دوو ئامێری سۆنەر هەیە كاتێك یەك تێكدەچێت ئیش بە ئامێرەكەی دیكە بكرێت، چونكە چاككردنەوەی ئەمانە روتینیاتن و كاتی دەوێت هەروەها وا دەكات كارەكان زوو رانەپەڕن.
لەبارەی ئاماری سەردانیكردن، بەڕێوەبەری نەخۆشخانەی مێرگەسۆر، ئاشكراشی كرد” رۆژانە هاووڵاتییەكی زۆر سەردانمان دەكەن، ئەگەر باسی ئاماری چوار مانگی رابردوو بكەین، ئەوا 9973 كەس سەردانی بەشی راوێژكاریان كردووە، فریاكەوتن 3564، تاقیگە 21116، هەروەها 30 نەشتەرگەری گەورەمان ئەنجامداوە، بەشی لە دایكبوونی منداڵان 40 سەردانیكەر، تیشك 1000، دووپشك و مار لەوانە 55 پێوەدانی دووپشك هەبووە، نەخۆشییەكانی سك چوون 15كەس، جاری وا هەیە رۆژانە 10 كەس سەردانی فریاكەوتن دەكەن جاری واش هەیە تەنانەت شوێنی پشوودانی كارمەندەكانیش پڕ دەبێت، هەروەها هەموو جۆرە نەشتەرگەرییەكانی وەك شكان، ئافرەتان، دانانی پلاتین و گشتی ئەنجام دەدرێن، پێشتر هەر حاڵەتێكی نەخوازراومان هەبووایە دوای چارەسەری سەرەتایی رەوانەی هەولێرمان دەكرد بەڵام ئێستا رەوانەی سۆران دەكەین بەهۆی ئەوەی پسپۆڕی لەوێ زیاد كراون، تایبەت كە سۆران بووە بەڕێوەبەرایەتی گشتی تەندروستی، ئەوە بۆ ئێمەش كاری ئاسانی كردووە و هیوادارین زیاتریش بێت.
د. هەرمێ جەلال، بەڕێوەبەری نەخۆشخانەی مێرگەسۆر، لە كۆتا قسەكانیدا گووتی” سەبارەت بەو كارگە شیرمەنییەی كە تازە كراوەتەوە لە دەڤەرەكە، بەراستی ئەمە جیگەی دڵخۆشی و دەستخۆشییە، چونكە چەندین كارگەی وا خۆماڵی بكرێنەوە هەر باشە، لەبەر ئەوەی ئێمە دەتوانین ئاگادار بین كە چۆن و بە چ شێوازێك ئەمانە دروست دەكرێن، تایبەت بۆ تەندروستی گرنگە و پێویستە لە هەموو روویەكەوە گرنگی پێبدرێت.
