محەمەد هەسنانی-سۆران:
بەرپرسی بنكەی تەندروستی پشكنینی چاو لە ئیدارەی سۆران، دەڵێت: “هەفتەی چوار ڕۆژ پشكنینی چاو بۆ هاووڵاتییانی ئیدارەی سۆران ئەنجام دەرێت، ئەمەش وایكردووە كە قەڕەباڵغی لەسەر بنكەكەمان كەم بێتەوەو ئیش و كاری هاووڵاتییانیش زووتر رای بكرێت.
لەبەردەوامی قسەكانیدا هونەر یاعقوب ئەسعەد، بەرپرسی بنكەی تەندروستی پشكنینی چاو لە ئیدارەی سۆران، بە زاری كرمانجی راگەیاند: ” سنوورەكەمان فرەوانەو هەرپێنج قەزاكانی ئیدارەی سۆران بە ناحیەو گوندەكانی لە خۆدەگرێت، بۆ رایی كردنی مامەڵەكانیان پشكنینی چاو لە بنكەكەمان ئەنجام دەدەن، وەك ئاسانكاریەكیش بۆ ئەو هاووڵاتییانەی رۆژانە سەردانمان دەكەن، بۆ ئەوەی قەڕەباڵغی زۆر دروست نەبێت، بە هاوكاری د.كامەران مەلا محەمەد، بەڕێوەبەری گشتی تەندروستی سۆران، هەفتەی چوار ڕۆژ پشكنینی چاو لە بنكەكەمان ئەنجام دەدرێت، واتە ڕۆژانی هەموو رۆژانی (یەكشەممە، دووشەممە، سێشەممە، چوارشەممە) ئەمەش هۆكارێكی باش بووە بۆ ئەو كەسانەی سەردانمان دەكەن، نۆرەی زوو پشكنینی چاویان بگاتێ و مامەڵەیان بۆ رایی بكرێت و زۆر لە چاوەڕوانیدا نەمێنەوە”.
بەرپرسی بنكەی تەندروستی چاو لە ئیدارەی سۆران، گووتیشی: ” بنكەكەمان لە ناو هۆڵی بەڕێوەبەرایەتی هاتووچۆی ئیدارەی سۆرانە، بەمەبەستی چەند جۆرە مامەڵەیەك هاووڵاتییان بۆ پشكنینی چاو سەردانمان دەكەن، بەتایبەتیش بۆ ئەو كەسانەی مۆڵەتی شۆفێری دەردەهێنن یان مۆڵەتەكەیان نوێ دەكەنەوە، ئاسانكارییەكی دیكەیە، كە هەر لەناو بەڕێوەبەرایەتییەكە كارەكانیان رای دەكرێت و مۆڵەتەكانیان وەردەگرنەوە”.
هونەر یاعقوب ئەسعەد، دەشڵێت ” وەك چەند كارمەندێكی تەندروستی بەشێوەیەكی دڵفرەوان و خەمخۆرانە پشكنینی چاو بۆ هاووڵاتییان ئەنجام دەدەین و كارەكەیان بەپێی رێژە بۆیان دیاری دەكرێت، لەگەڵ ئەوەشدا هەوڵمانداوە شوێنی دانیشتن و چاوەڕوانی ئەو كەسانە دابین بكەین، بۆ ئەوەی لەكاتی نۆرەی پشكنینی چاو ماندوو هیلاك نەبن”.
هەروەها دابینكردنی ئامێرەكانی ساردی و گەرمی بۆ وەرزەكانی گەرماو سەرما، لەگەڵ چەندین خزمەتگوزاری دیكەی پەیوەست، هەوڵیشمانداوە هیچ كێشەو گرفتێك بۆ هاووڵاتییان دروست نەبێت و ئەوەی پەیوەست بە ئێمەبێت كارەكانمانەوە بێت بۆ هاووڵاتییان ئەنجامی بدەین.
