بەڕێوەبەری ئاوی سۆران: نزیكەی چوار ملیار دینار بۆ چارەسەركردنی گرفتی ئاوی سنوورەكەمان تەرخان كراوە

60%ی گوندەكانی ئیدارەی سۆران گرفتی ئاوی خواردنەوەیان هەیە و بە تانكەر ئاویان بۆ دابین دەكرێت

موڕشید برادۆستی – سیدەكان:
ماوەی چەندین ساڵە، بەشێك لە گوندەكانی سنووری ئیدارەی سەربەخۆی سۆران، بە دەست بێ ئاوی دەناڵێنن و گرفتی ئاوی خواردنەوەیان هەیە، بەشێك لە گوندەكان چوار وەرزی ساڵ لە رێگەی تانكەر ئاویان بۆ دابین دەكرێت .
ئیدارەی سۆران، خاوەنی چەندین كانیاو و رووبارە، زاری كرمانجی زانیوەتی، 60%ی گوندەكانی ئەو دەڤەرە گرفتیان لە ئاوی خواردنەوە هەیە، حكوومەتی هەرێمی كوردستانیش بە نزیكەی چوارملیار دینار، چەند پڕۆژەیەكی ئاو لە قەزا و ناحییەكانی ئیدارەی سۆران ئەنجام دەدات.
فارس كاڕەسوڵ موختاری گوندی ڕەشەگۆم لە دۆڵی بیاوی سنوری ناحیەی خەلیفان، دەڵێت:” لە گوندەكەمان ئێستادا سێزدە ماڵ هەن، جاران ژمارەكە زۆر زیاتر بوو، بەڵام بەهۆی كەمی ئاوی خواردنەوە بەشێكیان بەرەو شار چوون و ناچاربوون دەستبەرداری هەوار و كارو كەسابەتی خۆشیان بن، ئێستاش ئەگەر چارەسەرێكی بەپەلە بۆ لێدانی بیرو ڕاكێشانی هێڵی ئاوی خواردنەوە بۆ دانیشتوانی گوندەكەمان نەكرێت، ئەوا بە دڵنیایەوە ناچار دەبین بە تێكڕا بەرەو شوێنێكی دیكە كۆچ بكەین،
دڵێر ڕەشید بەرپرسی فەرمانگەی ئاوی خەلیفان، بە زاری كرمانجی راگەیاند:” ژمارەیەك گوندی سنووری فەرمانگەكەمان كێشەی ئاوی خواردنەیان هەیە، جگە لەوەی بە تانكەر ئاو بۆ سەرجەم ئەو گوندانە دابین دەكەین، بەڵام ئەمە بە چارەسەر نازانین، هەروەها چەندین جارو بەمەبەستی چارەسەركردنی ئەو گرفتە دەرخستەمان بۆ بەڕێوەبەرایەتی ئاوی سۆران و دەورووبەر كردووە، چەند جارێكیش نووسراومان بۆ ئیدارەی سەربەخۆی سۆران بەرز كردۆتەوە تا لە ڕێگەی لێدانی بیر و دابینكردنی ئامێرو كەرەسەتەی پێویست كێشەی كەمئاوی بە شێوەیەكی هەمیشەیی لەو گوندانە چارەسەر بكرێت.”
قارەمان شێخۆ، بەرپرسی فەرمانگەی ئاوی سیدەكان، بە زاری كرمانجی گووت:” سالانە بە مەبەستی روبەڕووبوونەوەی وشكە ساڵی و ئاسانكاری بۆ گوندنشینان، حكوومەتی هەرێمی كوردستان لە رێگەی تانكەر پڕۆسەی دابین كردنی ئاو ساڵانە ئەنجام دەدات، ژمارەیەكی زۆری گوندەكانی قەزای سیدەكانیش لەو پڕۆسەیە سودمەند دەبن.
بەرپرسی فەرمانگەی ئاوی سیدەكان، دەڵێت:” ئەمساڵ 25 گوندی سنوورەكەمان گرفتی ئاوی خواردنەوەییان هەیە و لە هەفتەی داهاتوو دەست دەكرێت بە دابین كردنی ئاوی خواردنەوە بۆ ئەو گوندانە.
گووتیشی:” هەر گوندێك سەرچاوەی ئاوی وشك بووبێت یا تۆڕی دابەش كردنی ئاوی گوندەكەیان خراپ بووبێت، لە رێگەی موختار، داواكاری دانیشتوانان پێشكەش بە فەرمانگەكەمان بكەن، تا بتوانین ئاویان بۆ دابین.
لای خۆیەوە، تەحسین سەعدوڵڵا بەڕێوەبەری ئاوی ئیدارەی سۆران، بە زاری كرمانجی راگەیاند:” بەهۆی نەبوونی سەرچاوەی ئاو، هەروەها نەبوونی تۆڕی دابەش كردن، بەشێك لە گوندەكانی سنوورەكەمان چوار وەرزی ساڵ بە تانكەر ئاویان بۆ دابین دەكەین، وەك گوندەكانی، بادلیان، دێڵزیان، هاودیان، شاوراوە و كەورین، هەندێ لە گوندی خەلیفان و سنووری سۆران.
بەڕێوەبەری ئاوی ئیدارەی سۆران، دەڵێت:” لە لایەن كابینەی نۆیەمی حكوومەتی هەرێمی كوردستان، لە سەر بوددجەی وەزارەتی شارەوانی و گەشت و گوزار، بە گوژمەی نزیكەی چوار ملیار دینار، بە دوو قۆناغ چەند پڕۆژەیەكی ئاوی خواردنەوە لە گوندەكانی سنوورەكەمان جێبەجێ دەكەین، پڕۆژەی جوندیان و هاودیان لە قۆناغی كۆتایدان، كەورین و چەند گوندێكی ناحیەی خەلیفانیش دەست بە جێبەجێ كردنییان دەكرێت.
گووتیشی:” بە شێوەیەكی گشتی، 60%ی گوندەكانی ئیدارەی سۆران گرفتی ئاوی خواردنەوەیان هەیە، گرفتەكانیشیان چەند جۆرێكن، وەك نەبوونی سەرچاوەی ئاو، كۆنی و خراپی تۆڕی دابەش كردن، گوندیش هەیە پڕۆژەی دابەش كردنی ئاویان هەر نییە، هەوڵی ڕژد دەدەین چارەسەری گرفتی ئاوی ئەو گوندانە بكەین.”.
“ژمارەیەك گوندی سنووری سۆران، چوار وەرزی ساڵ ئاویان بە تانكەر بۆ دابین دەكرێت”