” لە ئایندەیەكی نزیكدا دەبینە خاوەنی تاقیگەی پشكنینی سووتەمەنی”

دیدار- پشتیوان كەریم:

لە دیدارێكی هەفتەنامەی زاری كرمانجیدا، ئەمیر سەلیم شانەدەری، بەڕێوەبەری نەوت و كانزاكانی ئیدارەی سۆران، باس لە پرسی سوتەمەنی دەكات، وردەكاری لە سەر ئەو كارانەی بەڕێوەبەراتیەكەییان دەخاتە بەر باس كە بڕیارە ئەنجامی بدەن، ئاماژە بەوەش دەكات، بە مەبەستی دۆزینەوە و دیاری كردنی كانزا فلیزیەكان لە داهاتوودا پشكنین بۆتەواوی سنووری ئیدارەی سۆران دەكەین، هاوكات پرسی نەوت و غاز و بەنزینیش لەمیانەی ئەم دیدارەدا دەخاتەڕوو.
لەدەستپێكی قسەكانیدا، ئەمیر سەلیم، بەڕێوەبەری نەوت و كانزاكانی ئیدارەی سۆران، دەڵێت:” بەڕێوەبەرایەتی نەوت و كانزانكانی ئیدارەی سۆران لە مانگی 10ی ساڵی رابردوو كرایەوە، مەبەست لەدامەزراندنی ئەم بەڕێوەبەرایەتیەش بۆ رێكخستنی ئەو سێكتەرانە بوو كە پەیوەندییان بەسوتەمەنیەوە هەیە، وەك وێستگەكانی سوتەمەنی، كارەگەكانی غاز و لە هەمان كات چاودێكریكردنیان و زیادكردنی رێژەكەیان.
زیاتر گووتی:” ئەو كاتەی بەڕێوەبەرایەتی نەوت و كانزاكان لە سۆران كرایەوە، سنوورەكەمان لە قەیرانێكی گەورەی سوتەمەنیدابوو، بەڵام لەو ساتەوە هەماهەنگی باشمان دروست كرد بۆ زیادكردنی رێژەی غاز، هاوكات، ئەوەی گرینگە بەپێی رێژەی دانیشتوانان و كەشوهەوای ناوچەكە پێویستی بەسوتەمەنی زیاتر هەیە.
لە بارەی پرسی بەنزین، شانەدەری، دەڵێت، دانان و دیاری كردنی نرخی سوتەمەنی، پلان و سیاسەتی وەزارەتی سامانە سروشتییەكانی حكوومەتی هەرێمی كوردستانە، ئەوان لەباریەوە بڕیار دەدەن، تا مانگی پێشتر بەنزینی حكوومی 690 دینار بۆ تاكسی و 800 دیناری بۆ شۆفێران دیاری كرابوو، بەڵام دوای مانگی پێنج بڕیارەكان گۆڕانییان بەسەر داهات لە ئێستادا تەواوی وێستگەكان بەنزینی حكوومی یەك نرخە و بۆ هەرلیترێك 750 دینار دیاری كراوە، جێگیر كردنی نرخی بەنزین بەگشتی لەبەرژەوەندی خەڵك دابووە.
بەڕێوەبەری نەوت و كانزاكانی ئیدارەی سۆران، دووپاتی كردەوە، ساڵی رابردوو داوامان كردووە بۆ دابین كردنی تاقیگەیەكی پشكنینی سوتەمەنی، خۆشبەختانە وەزیری سامانە سروشتییەكان، رەزامەندی هێنانی تاقیگەی بۆ سۆران دەربڕیوە و لە ئایندەیەكی نزیك دەبینە خاوەنی تاقیگەی خۆمان لە سۆران، هەروەها رەزامەندیش دراوە بۆ هێنانی ئۆتۆمبێلێكی پشكنینی سوتەمەنی، بەمەش یارمەتیدەرێكی باش دەبێت بۆ زیاتر كۆنترۆڵكردنی وێستگەكان، هەر بەنزیخانەیەك لە هەر قەزا و ناحیەیەكی سنوورەكەمان بێت پشكنینی بۆ دەكرێت، پێویستە متمانە لە نێوان شۆفێران و خاوەن وێستگەكانی سووتەمەنی بگەڕێتەوە، هەرچەندە لە ئێستادا رۆژانە پشكنین لە وێستگەكان دەكرێت و نمونەی رەوانەی هەولێر دەكرێت، بەڵام بە هەبوونی تاقیگە لە سۆران كارئاسانیمان بۆ دروست دەكات و دەتوانین لە ماوەیەكی زوودا كوالێتی و باش و خراپی بەنزین بخەینەڕوو، هەر وێستگە و بەنزینخانەیەكیش بەنزین و سوتەمەنی كوالێت خراپ بفرۆشێت، لێپێچینەوەی توندی لەگەڵ دەكەین بەشێوەیەك تا حاڵەتی داخران.
لە بەشێكی دیكەی قسەكانیدا، ئەمیر سەلیم، گووتی:” كاری بەڕێوەبەرایەتیمان بەدەر لە سوتەمەنی، كانزاكانیش دەگرێتەوە، خۆشبەختانە ئیدارەی سەربەخۆی سۆران زۆر دەوڵەومەندە بە هەبوونی رێژەی كانزا فلیزییەكان، زۆرترین كانزا فلیزییە بە نرخ و باشەكان كەوتوونەتە سنوورەكەمان، دەبێ لیژنە پشكنینی بۆ بكات، پێدانی رەزامەندی وەزارەتمان پێویستە، بە گشتی تا داتا نەبێت ناتوانرێت بە فەرمی لەو بارەوە قسە بكەین.
دەشڵێت:” لە ڕووپێوی جیۆلۆجی نوسراومان بۆ هاتووە لە تەواوی ئیدارەی سۆران ڕووپێوی ئەنجام بدەین، بۆ ئەو مەبەستە كۆبونەوەمان لەگەڵ سەرۆكی زانكۆی سۆران كردوە و سود لە زانكۆ وەردەگرین بەو پێیەی لە زانكۆی سۆران بەشی جیۆلۆجی بوونی هەیە، بەلامانەوە باش بوو هەماهەنگیمان هەبێت و خەریكین كاری لەسەر بكەن بۆ ئەوەی زیاتر خزمەت بەو بوارە بكەین، لە كاتێكدا كابینەی نۆیەمی حكوومەتی هەرێمی كوردستان گرینگی تایبەت بە كانزكان دەدات و بۆئەوەی باشتر سودی لێوەر بگرین بە تایبەتی ئەو كانزایانەی كە بەهای ئابووری باشیان هەیە، دەتوانین وەك بناغەیەك بۆ پێشخستنی ئابووری وڵات سودی لێ ببینین و دەڤەرەكەشمان سودمەند بێت، لەداهاتووشدا یاسا و رێنمای تازەی بۆدەربچێت.
سەبارەت بە پرسی نەوت و غازیش، ئاشكرای كرد:” لەمەودووا لە وەرزی زستان و وەرزەكانی دیكەش ناهێڵین قەیران و كەمی غاز دروست بێت، ژمارەی تایبەت هەیە هاووڵاتییان دەتوانن پەیوەندیمان پێوەبكەن، زانیاری بریكارەكانی كارگەی غازەكان بۆ ئێمە نەهاتووە لە داهاتوو دەگەڕێتەوە، هەروەها لە بارەی نەوتیش، دەزانم ئەو دەڤەرە زستانی سەختی هەیە بە بەراورد بە ناوچەكانی دیكەی كوردستان، دابینكردنی نەوت لە وەزارت و دابەشكردنیش كاری ئێمەیە، هەروەها داواكردنی خەڵك و گەیاندنی بۆ سەرووخۆمان لە ئەستۆی ئێمەدایە، خواستمانە سوتەمەنی زۆر دابەش بكرێت و دەمەوێت بە بریكارەكانی سۆران بڵێم، دابەشكردنی نەوت بە شێوازی كۆن نامینێت، لەسەرەتا دوو داواكاری رێژەی سوتەمەنی توانیمان زیاد بكرێت كە داواكاری پشكنین و تاقیگەی سوتەمەنی بوون چارەسەر بوونە، داواكاری سێیەمیشمان (عەمبار) و هەڵگری سووتەمەنی داوامان كردووە، بەڵام تێچووی زۆرە، كاری لەسەر دەكەین لە داهاتوو بەدڵنیاییەوە دەبینە خاوەنی عەمباری خۆمان.
ئەوەشی خستەڕوو، بەهۆی كەمی میلاك و نەبوونی فەرمانبەر، وەك پێویست كار و باری هاووڵاتییان رای ناكەین، بەم هۆیەش كەم كورتی دروست دەبێت، پێویستمان بە پسپۆڕی جیۆلۆجی هەیە، سەرپەرشتیاری ئیدارەی سۆرانیش خەریكی رەزامەندی گرێبەستەكانە بەتایبەتی پسپۆڕییەكان، بە دابین كردنی پسپۆڕی و فەرمانبەری شارەزا دەتوانرێت كاری باشتر بۆ هاووڵاتییان بكەین، ئومێدەوارین لە داهاتوویەكی نزیك ئەو كێشەیە چارەسەر بكەین .
ئەمیر سەلیم، بەڕێوەبەری نەوت و كانزاكانی ئیدارەی سۆران، گووتیشی:” دانیشتوانانی دەڤەری سۆران لە رابردوودا قوربانی زۆری داوە، بەڵێن دەدەین ئەوەی لە توانامان دابێت هەوڵی رژدی بۆ بدەین، بە هیچ شێوەیەكش قبوڵی ناكەین سوتەمەنی خراپ كە لە هەولێر نەفرۆشێت بۆ ئێمەی بنرێن، بەنزینی باش و سووتەمەنی باش دەبێت بوونی هەبێت، لە هەمان كاتیش، بەنزینی پاڵپشتركراوی حكوومەتیش دەبێت زیاتر بكرێت”.