موڕشید برادۆستی – سۆران:
وەزارەتی ناوخۆی حكوومەتی عێراق، بەمەبەستی بەرزكردنەوەی بەهای دینار لە رۆژانی رابردوو بڕیاریدا مامەڵەی كڕین و فرۆشتنی ئۆتۆمبێل بە دینار دەبێت، ئەم بڕیارە بەشێك لە كۆمپانیاكانی بواری ئۆتۆمبێلی لە هەرێمی كوردستانیش گرتۆتەوە، بەڵام تا ئێستا لە ئیدارەی سۆران كاری پێنەكراوە.
غەفار خدر خاوەنی پێشانگا لە سۆران، بە زاری كرمانجی گووت:” لە هەندێ كۆمپانیای ئۆتۆمبێل لە كوردستان، كڕین و فرۆشتن كراوەتە دینار، بەڵام تا ئێستا لە سۆران هیچ مامەڵەیەك بە دینار ناكرێت و هەمووی دۆلارە”.
غەفار خدر، دەڵێت:” ئەگەر ئەو بڕیارە لە سۆران جێبەجێ بكرێت و كڕین و فرۆشتنی ئۆتۆمبێل بە دینار بێت، پێویستە پلانی بۆ دابندرێت و كارتی بانكی دروست بكرێت، بە كارێكی باشی نازانم هاووڵاتی بڕێكی زۆری پارە بە دەستەوە بێت، چونكە دینار وەك دۆلار نییە و بۆ هەڵگرتن قەبارەی گەورەترە، بۆیە ئەگەر پلان نەبێ ئەحمەتە ئەو بڕیارە لە پێشانگاكانی ئۆتۆمبێل لە ئیدارەی سۆران جێبەجێ بكرێت”.
جەمالەدین عەبدولڕەزاق، بەڕێوەبەری نەهێشتنی تاوان لە وەزارەتی ناوخۆی عێراق، لە ناوەڕاستی مانگی رابردوو، رایگەیاندووە:” لەمەوداو مامەڵەی كڕین و فرۆشتنی ئۆتۆمبێل لە پێشانگەكانی پارێزگای سەلاحەدین بە دینار دەبێت و بەدواداچوون بۆ پێشانگەكانی ئۆتۆمبێل دەكرێت بۆ جێبەجێكردنی ئەم بڕیارە”.
ئەوەشی خستووەتەڕوو:” بازرگانەكان و خاوەن پێشانگەكانی ئۆتۆمبێل بەڵێننامەیان لێوەرگیراوە كە لەمەودوا كڕین و فرۆشتنی ئۆتۆمبێل بە دیناری عێراقی بكەن لەجیاتی دۆلار ئەمەش بەمەبەستی بەرزكردنەوەی بەهای دینار”.
ئەو بەرپرسەی وەزارەتی ناوخۆ، گووتیشی:” كە هەر كەس و شوێنێك پابەندی ئەم بڕیارە نەبێی لێپێچینەوەی یاسایی لەگەڵدا دەكرێت”.
