جاری وا هەبووە سێ بۆ شەش مانگ دوور لە كەسوكارمان لە چیا و چۆڵەكانی كوردستان دەماینەوە
شەهلا رەشید- بارزان:
لیوا سەیدخان مەحموود ئیسقەیلی، میوانی بەرنامەی پێشمەرگە بوو، لەو بەرنامەیەدا باسی لەو داستانانە كرد كە تێیدا بەشداری كردووە و دەڵێ: جاری وا هەبووە سێ بۆ شەش مانگ دوور لە كەسوكارمان لە چیا و چۆڵەكانی كوردستان دەماینەوە و بەرگریمان لە خاكی كوردستان كردووە، هەموو ئەم شەڕ و داستانانەی تۆمار كراون بۆ ئەمڕۆ بوون كە ئێستا بە ئاشتی و ئارامی لە كوردستان دەژین.
لیوا سەیدخان مەحموود ئیسقەیلی، لە دەستپێكی قسەكانیدا بۆ زاری كرمانجی، گوتی: لە ساڵی 1950 لە گوندی ئیسقەیلی لە دایكبوومە و نەوەی ساڵح ئیسقەیلیم كە كەسێكی ناسراو بوو، بەتایبەتی لەلای بارزانی نەمر، ئەو كات وەك ئێستا نەبوو هەژاری زۆربوو، گوندەكانمان هەمیشە بەر شاڵاوی رژێمی بەعس دەكەوتن، گەورەكان بۆیان دەگێڕاینەوە لەم گوندانە بەردەوام شەڕ بووە و چەندین شەهید و بریندار هەبوونە، منیش لە ساڵی 1965 بووم بە پێشمەرگە و چەكی شەڕەفم هەڵگرت، ئەو كات بە تەنیا چوومە لای ئیدریسی جوانە مەرگ كە لە حاجی ئۆمەران بوو، خانەمیری باوەیی لەوێ بوو و داوای چەكم لێ كرد كە بمداتێ، ئەویش بە خانەمیری گوت: ئەگەر بمێنێتەوە چەكێكی باشی پێ دەدەم، بەڵام ئەگەر نەمێنێتەوە چەك نییە، ئەوە بوو پێم گوت: بەڵێ دەمێنمەوە، ئیتر هەر لەوێ مامەوە تا ساڵی 1970، كە لەو ساڵەدا ڕێككەوتنامەی 11ی ئازار مۆركرا، ئیتر تا 1975 ماینەوە، دواتر ئاوارەی ئێران بووین.
لیوا سەیدخان، گوتیشی: جاری وا هەبووە سێ بۆ شەش مانگ دوور لە كەسوكارەكانمان لە چیا و چۆڵەكانی كوردستان دەماینەوە و هەواڵی ئەوانمان نەدەزانی، بەڵام كاتێك ڕێككەوتنامەی 11ی ئازار مۆركرا دوو مانگ لە ئەركدا بووین و مانگێكیش دەگەڕاینەوە ماڵ، رێككەوتنامەی 11ی ئازار بووە مایەی دڵخۆشیمان، چونكە بۆ ماوەی چوار ساڵ خەڵك حەسایەوە، بەڵام زۆری نەخایاند و ساڵی 1975 دووبارە شەڕ دەستی پێكردەوە، دواتر كە حكوومەتی بەعس ڕێككەوتنامەكەی پێشێل كرد، هێرشیان كردە سەر گوندی دیلمان، ئەوەبوو عومەر ئاغا، لەگەڵ كۆمەڵێك پێشمەرگە چوونە ئەو گوندە و نزیكەی دە رۆژ لەوێ مانەوە، ئێمەش ئەوانەی كە تەمەنمان بۆ شەڕ گونجاو نەبوو خزمەتمان دەكرد و خواردنمان دەبردە گوندەكە بۆ پێشمەرگەكان، ئەو كات چەكی باشمان لەبەر دەست بوو، دواتر من و سێ لە هاوڕێكانم لە دیلمان لەسەر سی ملیم بووین و بە شەو فڕۆكە هێرشی دەكردە سەرمان، بە سی ملیم بەردەوام تەقەمان دەكرد، هەروەها جێ گۆڕینەوەش هەبوو بەشێكمان دەچووینەوە بۆ پشوو و بەشێكی دیكەش دەهاتنە جێمان، كاتێك لە ساڵی 1975 شۆڕش تێكچوو چووینە ئَێران، ئەو كات هاتووچۆ هەر بەپێیان بوو تا چۆمان چەندین رۆژ بەپێ رۆیشتین، دواتر لەوێ بە ئۆتۆمبێل چووینە حاجی ئۆمەران، دواتر چووینە ئۆردۆگای زێوە، لە ساڵی 1976 كە شۆڕش دەستی پێكردەوە ئێمەیان برد بۆ جەهرۆ و لەوێ چەند خولێكیان بۆ كردینەوە، دواتر دابەشیان كردین، نەدەبا دوو برا پێكەوەبانە، تا ماوەیەك كەس ئاگای لە كەس نەبوو، ئەگەر شۆڕشی ئێران دەستی پێ نەكردبایە بەشێك لە ئێمە نەماندەتوانی یەكتریش بدۆزینەوە، چەند كەسێك بووین لە تاران ماینەوە، كە ئەو كات ماڵی سەرۆك بارزانی لە كەرەج بوو، ئیتر نامەی دەستنووسیمان بۆ یەكتر دەنارد، دواتر بەرێگەی نایاسایی خۆم و كەسێكی دیكە سەردانی عێراقمان كرد و چەكیشمان لەگەڵ بوو، كە ئەو كات لەسەر یەك فیشەك خەڵك لە سێدارە دەدرا، ئەوەبوو چووینە گوندێك كە چەند ناسیاوێكی تێدابوون و كاتژمێر 3ی شەو چووینە ماڵێك و لەوێ خواردنمان خوارد و كەمێك پشووماندا، بەیانی هەر هەندەمان دیت چەكدارەكانی رژێمی بەعس دەورەیان لە گوندەكە داوە و داوامان لە كچێكی ئەو ماڵە كرد چەكەكانمان بشارێتەوە، چەكدارەكان هەموو گوندەكەیان نۆری تەنها ئەو خانووە نەبێت كە ئێمە تێدا بووین، دواتر چەكدارەكان رۆیشتن، دواتر ئێمەش لەو گوندە نەماین و هاتین بۆ گوندی ئیسقەیلێ و شەوێكیش لە گوندەكە ماینەوە دواتر گەڕاینەوە ئێران، لەو ماوەیەدا بەشداریم لە چەندین داستان كردووە، لەوانە داستانی خێرزۆكا ئەو كات جەرگیز پێندرۆی بەرپرسمان بوو و ماوەی یەك هەفتە لە خێرزۆكا بووین و توانیمان داستانی خێرزۆكا تۆمار بكەین، بێ ئەوەی هیچ زیانێكی مرۆیمان هەبێت، لە داستانی خواكوڕكیش بەشداریم كردووە، هەموو ئەم شەڕ و داستانانە بۆ ئەمڕۆ بوون كە ئێستا بە ئاشتی و ئارامی لە كوردستان بژین.
لیوا سەیدخان مەحموود ئیسقەیلی، لە بارەی بارزانی نەمر، دەڵێ: چەندین ساڵ لەگەڵ بارزانی نەمر بوومە، كەسێكی یەكسان و دادپەروەر بوو، جیاوازی لە نێوان پێشمەرگەدا نەدەكرد، داوای دەكرد هەموومان لەگەڵ یەكدی هاوكار بین و كارێك هەبێت پێكەوە بكەین، بارزانی نەمر كەسێكی زۆر سادە بوو، هەر كەسێكی دیتبایە رادەوەستا و قسەی لەگەڵ دەكرد، بارزانی نەمر زۆر حەزیشی لەوە بوو بە پێیان هاتووچۆ بكات، بۆ ئەوەی زیاتر خەڵكەكە بناسێت و قسەیان لەگەڵ بكات.
