مەهدی محەممەد –زاری كرمانجی :
لە ڕۆژانی 28,27ی05ی 2023 لە شاری لۆزانی سویسرا یەكەمین دیداری سەد ساڵەی ڕێككەوتننامەی لۆزان، لە ژێر ناونیشانی (سەدەیەك دوای پەیمانی لۆزان بۆچوون و دیدگاكان) بەڕێوەچوو
لە كۆتا ڕۆژی ئەم دیدراەدا، كۆنفدراسیۆنی ڕەوەندی كوردستانی دەرئەنجامی یەكەمین دیداری لە ڕاگەیەندراوێكدا بڵاو كردەوە.
دەقی ڕاگەیەنراوی كۆتایی یەكەمین دیداری كۆنفدراسیۆنی ڕەوەندی كوردستانی :-
دەرئەنجامی كۆتایی یەكەمین دیداری كۆنفیدراسیۆنی كوردستانی دەربارەی (١٠٠) ساڵەی رێككەوتننامەی لۆزان، لە شاری لۆزان لە رێكەوتی 28,27 ی 5 ی 2023
بەڕێزانی ئامادەبووان، پانێڵێست و بەڕێوەبەرانی پانێڵەكان، كوردستانیانی ئازیز لە ناوخۆی كوردستان و لە دیاسپۆرا، خۆبەخشان و هاوكارانمان بۆ ڕێكخستنی ئەم دیدارە ماندوو نەبن. بەوپەڕی سوپاسگوزاری و پێزانینەوە لە ئامادەبوون و بەشداریكردنتان دەڕوانین و زۆر بەرزی دەنرخێنین.
لە كۆتایی ئەم دیدارەدا، بە پێویستی دەزانین بە كورتی و پوختی چەند دەرئەنجامێك و سەرەنجێك و راسپاردەیەك ڕابگەیەنین:
1ـ یەكەمین دیداری كۆنفیدراسیۆنی ڕەوەندی كوردستانی، بە قەبارەیەكی مەزن و لە دەرەوەی خاكی كوردستان بە بەشداری و ئامادەبوونی سەدان كوردستانیان لە دەرەوە و ناوەوەی كوردستان و دەیان دۆستی كوردستان لە شاری لۆزان لە وڵاتی سویسرا، لەو شوێنەی كە كوردستانی تێدا دابەش كرا، بەسەركەوتوویی ئەنجامدرا.
لە دیدارەكەدا 4 پانێڵ و بە بەشداری 20 توێژەر، پسپۆڕ و شارەزا و سیاسەتمەدار، بە زمانەكانی كوردی و فەڕەنسی و ئینگلیزی، لە ڕەهەند و گۆشەنیگای جیاوازەوە هەڵسەنگاندن و خوێندنەوەیان بۆ ئاسەوارە فرەلایەنەكانی ئەم ڕێككەوتننامەیە شوومە، لە ماوەی 100 ساڵی ڕابردوودا كرد.
2ـ لەم دیدارەدا، بەشانازیەوە وتاری جەنابی سەرۆك بارزانی، هەروەها وتاری سەرۆكی شارەوانی لۆزان و سەرۆكی كۆنفیدراسیۆن تێدا خوێنراوەیە. بە خۆشحاڵیەوە، بەشی هەرە زۆری پارت ولایەنە سیاسیەكانی گشت پارچەكانی كوردستانیش بەشداربوون وڕاوبۆچوونی خۆیان بەو پەری ئازادی و گیانی نیشتمانپەروەریەوە پێشكەشكرد. هەروەك ڕۆڵ و پێگە و جێدەستی بابەتیانەی سەركردە كوردستانییەكان لە 100 ساڵی ڕابردوودا، بەبێ جیاوازی، بە هەند و قەدر و قیمەتەوە، بەرز ڕاگیران و خەبات و ماندووبوون و قوربانیدانی ئەوان، دۆزی گەلی كوردستانی بە زیندووی تا ئەمڕۆ هێشتووەتەوە
3ـ سڕینەوەی گەلی كوردستان لە دەقەكانی رێكەوتنامەكە و بە بەشداری زلهێزەكانی ئەوكاتی جیهان، نەبووە هۆی تواندنەوەی گەلی كوردستان، كەواتە رێككەوتننامەی لۆزان لەم ڕووەوە شكستی هێنا. مێژوو شاهیدە، هەرچەندە كوردستان زیاتر پارچە پارچەكرا، وسەرەڕای گۆڕینی دیموگرافی و سیاسەتی نكوڵیكردن و سەركوتكردن، بەڵام هەوڵ و خەبات وتێكۆشانی نەپساوەی كوردستانیان هەر بەردەوام بووە و بۆ گشت گەلانی جیهان سەلمێنرا كە كورد (زیندووە قەت نانەوێ ئاڵاكەمان). لە بەرامبەریشدا گرتنەبەری شێوازە جیاوازەكانی خەباتیش دژی ستەمكاری و چەوساندنەوە و بێبەش كردن، وێڕای پاراستنی هەبوون و ناسنامەی گەلی كوردستان، نەبووەتە هۆی خستنی ئەو دەوڵەتانەی كە كوردستانیان بەسەردا دابەش كراوە.
بۆیە ئەزموونی 100 ساڵی ڕابردوو، پێویستە ببێتە مایەی وانە و جۆراوجۆر بۆ هەموو لایەك كە تەنها ئاشتەوایی و دیالۆگ و ڕێزگرتنی دوولایەنە ڕێگە دروستەكەیە.
سەبارەت بە راسپاردەكان ئەم دیدارەش، كوردستانیانی ئازیز، بەڕێزانی ئامادەبوو،
پوختەی ڕاسپاردەكانی ئەم دیدارە مێژووییە، لەم چەند خاڵەدا كورت و پوخت كراونەتەوە:
4ـ دوای سەد ساڵ لە رێكەوتنامەی لۆزان كە واقعی سنورە نێودەوڵەتیەكان سەپاندویەتی بە سەرماندا، مەخابن دابەشبوونی كوردستان واقیعێكە و هەیە و كوردستان چوار بەشە. پرسی هەر پارچەیەكیش لەوی دیكەیان جیاوازە و تایبەتمەندی خۆیی هەیە و هەر خەباتێكیش لە هەر
پارچەیەك دەبێت لە سنوور و چوارچێوەی ئەو پارچەیەدا بێت. بۆیە هەر جوڵە و هەوڵێك لە هەر پارچەیەكی كوردستان پێویستە بە دیدێكی ژیرانە و واقیعیانەوە بێت. بە جۆرێك كە كاریگەریی و لێكەوتەی خراپی لەسەر هیچ پارچەیەكی دیكەی كوردستان نەبێت. وێڕای ئەوەی كە پێشكەوتنی دۆزی كوردستان لە هەر پارچەیەك، پێشكەوتنی پرسی كوردستانە بە شێوەیەكی گشتی.
5ـ هەر لەو میانەیەدا، ئەزموونی هەرێمی كوردستانی عێراق، ئەزموونێكە كە خاوەنی پێگە و قەوارەی یاسایی و دەستووریی خۆیەتی. پێویستە هەمووان لە خەم و مشووریی پاراستنی قەوارەكەیی و بەهێزتركردنی پێگەكەیدا بن. بە تایبەت كە ئەم قەوارەیە سەلماندوویەتی نەك
مایەی هەڕەشە نییە بۆ وڵاتانی دراوسێ، بەڵكو فاكتەرێكی سەقامگیریی و ئاشتەواییە ونموونەیەكی بەرچاوی پێكەوەژیان و قبوڵكردنی یەكترە
6ـ یەكنەبوون و پەرتەوازەیی لە 100 ساڵی ڕابردوودا، لە پەنای سیاسەتی نێودەوڵەتی دژ بە بەرژەوەندی گەلی كوردستان، هەمیشە فاكتەرێكی سلبی و لە زۆر وێستگەشدا كەمەرشكێن،
بووە. پاش یەك سەدە، هەر هەوڵ و بزاوتێك بۆ بەرپەرچدانەوەی ستەمی مێژوو، پێویستی بە یەكدەستی و یەكگرتوویی كوردستانیانە هەیە. مێژووش پێمان دەڵێت كە لە هەر وێستگەیەك
مێژووییدا كە دەستكەوتێك بە دەست هاتبێت، بە یەكگرتوویی و یەكدەستی بە دەست هێنراوە. 4.هاوكات ئەزموونی یەك سەدەی ڕابردوو، لە لۆزانەوە تا ئێستا، پێمان دەڵێت كە خەباتی ڕزگاریخوازانەی كوردستان، دەبێت سوود لە پشتیوانی نێودەوڵەتی و ڕای گشتی وڵاتانی دیموكراسی، وەربگرن.
7ـ رەوەندی كوردستانی لە دەرەوەی نیشتمان، ئێستا ڕەوەندێكی زەوەند و بەهێزە. چ لە ڕووی كەمایەتی و چ لە ڕووی چۆنایەتییەوە. پێویستە كوردستانیانی دیاسپۆرا هەوڵی زیاتر بدەن بۆ ناساندنی دۆزی گەلی كوردستان، هەموو هەوڵەكانیان بخەنە گەڕ بۆ سەرخستنی دۆزی ڕەوای كوردستان و لۆبیكردن بۆ دروستكردنی دۆست و پاڵپشتی نێودەوڵەتی زیاتر. لەمەشدا پێویستە كوردستانیانە بیر بكرێتەوە و ئەو سنوورە دەستكردانەی كە بەسەرماندا سەپێنراون، نابێت كوردستانیان خۆیان تۆختری بكەنەوە.
8ـ ئافرەتانی كوردستان لە هەموو وێستگەكانی خەباتدا ڕۆڵی گەورە و گرنگ و كاریگەریان بینیووە و دەبینن. لەم دیدارەشدا بەشێكی زۆری هەوڵ و ماندووبوون و ئامادەسازیی و ڕێكخستنەكانی لە ئەستۆی خانمانی كوردستانی دیاسپۆرادا بووە. بۆیە پێویستە لە دیدارەكانی داهاتوودا ئافرەتان لە دیدارەكانی داهاتووی كۆنفیدراسیۆن زیاتر بەشدار بن، بە شێوەیەك
بگونجێت لەگەڵ ئەو پێگە گەورەیەی ئافرەتان لە خێزان و كۆمەڵگای كوردەواریدا هەیە.
لە كۆتاییدا پێویستە سوپاسی شارەوانی لۆزان، ناوەندی ڕەوەندی كوردستانی لە سویسرا، قسەكەران و ئامادەبووان لە پانێلەكان دەكەین، زەحمەتیان كێشا لە دوورەوە هاتن، گرێدانی ئەم دیدار بە بێ هاریكاری ئەم بەرێزانە مەحاڵ دەبوو. دەرگای كۆنفدراسیۆنی رەوەندی كوردستانی، وەك پلاتفۆرم و چەتری كۆكەرەوەی كوردستانیانی دیاسپۆرا بە جیاوازی بیروڕایانەوە، ئاوەڵایە بۆ هەر پێشنیارێك و تێبینیەك و سەرنجێك بۆ ئەوەی لە دیدار و كار و چالاكییەكانی داهاتوویدا لەبەرچاویان بگرێت.
زۆر سوپاس و كوردستان هەر ئاوا بێت و بە هیوای سەفەر و گەڕانەوەی سەلامەت بۆ هەمووتان
كۆنفدراسیۆنی ڕەوەندی كوردستانی
28.05.2023
