زاری كرمانجی- سۆران:
رێكخراوی هەنگاو بۆ مافەكانی مرۆڤ زانیاری وردیان لەسەر گرژییەكانی دوێنی شاری سەقز و سنە بڵاو كردەوە و تێدا ئاماژە بەوە كراوە كە زیاتر لە 38 كەس بریندار و 13 كەسیش دەست بەسەر كراون.
لە بڵاو كرداوەكەی رێكخراوەی هەنگاودا هاتووە ” ناڕەزایەتی مەدەنییانەی ڕۆژی ڕابردووی خەڵكی شارەكانی سەقز و سنە دوای دەستتێوەردانی هێزە ئەمنییەكان ئاڵۆزی لێكەوتەوە. بە پشتبەستن بە ئامارەكانی هەنگاو لانی كەم 38 كەس لەو ناڕەزایەتییانە بریندار بوون و 13 كەسی دیكەش دەستبەسەر كراون”.
زیاتر خراوەتە روو ” ڕۆژی ڕابردوو لانی كەم 33 كەس بە تەقەی هێزە چەكدارەكانی ئێران بریندار كراون كە پێنج كەسیان بە هۆی ناجێگیربوونی باری تەندروستییان بۆ ناوەندە دەرمانییەكانی شاری تەورێز گوازراونەتەوە”.
لە بارەی قوربانییانی گرژییەكانی دوێنێی شاری سنەش وا برڵاو كردۆتەوە ” لە ناڕەزایەتییەكانی شەوی ڕابردووی سنە لانی كەم 5 هاووڵاتی بریندار بوون كە 3 كەسیان بە چەكی ساچمەیی بریندار كراون و دوو كەسیان كە یەكێكیان كچێكی 14 ساڵە بووە بە باتۆم بە سەختی بریندار بوون و لە نەخۆشخانە خەوێندراون كە هەنگاو بە هۆكاری ئەمنی ناوی ئەو دوو كەسە بڵاو ناكاتەوە”.
زیاتر روونكراوەتەوە كە ” لە سەقز لانی كەم 8 هاووڵاتی لەلایەن ناوەندە ئەمنییەكانەوە دەستبەسەر كراون، هەنگاو زانیویەتی كە دەیان چالاكی مەدەنی كورد لە شارەكانی سنە و سەقز لە ماوەی دوو ڕۆژی ڕابردوودا لەلایەن ناوەندە ئەمنییەكانەوە بە تەلفۆن هوشدارییان پێدراوە كە بەشداریی ناڕەزایەتییەكان نەكەن و لە تۆڕە كۆمەڵایەتییەكان بانگەشە بۆ مانگرتنی گشتی لە شارەكانی كوردستان نەكەن”.
هەنگاو بڵاوی كردۆتەوە ” كەشی شارەكانی سنە و سەقز بەتەواوەتی ئەمنی كراوە و ئەمڕۆ 70 كەس لە هێزەكانی سوپای پاسدارن لە شارەكانی بۆكان و مەهاباد و هەروەها ژمارەیەك لە هێزە تایبەتییەكان لە شاری بانەوە براونەتە سەقز و لە بەندیخانەی ئەو شارە جێگیر كراون”.
