زاری كرمانجی- مێرگەسۆر:
لە رێورەسمی کردنەوەی کارگەی زۆم بۆ بەرهەمە شیرەمەنییەکان، قایمقامی مێرگەسۆر رایگەیاند، ئەم کارگەیە دەبێتە هۆی ئەوەی دانیشتووانی گوندەکان لەناوچەکانی خۆیان بمێننەوە، هەروەها بەرهەمێکی کوردەواری و خاوێن وتەندروستیش بۆ خەڵکی هەرێمی کوردستان بەرهەمدەهێندرێت.
ئەمڕۆ سێشەممە (30ـی ئایاری 2023)، مەسرور بارزانی، سەرۆکی حکومەتی هەرێمی کوردستان کارگەی شیرەمەنیی زۆم لە گوندی ژاژۆکی سەر بە قەزای مێرگەسۆر کردەوە.
لەلایەن خۆیەوە، غەفوور ئەحمەد، قایمقامی قەزای مێرگەسۆر لە وتەیەکدا ئاماژەی بە گرنگی پڕۆژەکە کرد و رایگەیاند، کردنەوەی کارگەی (زۆم) وەک پڕۆژەیەکی بەرهەمهێنانی شیرەمەنی لە سنووری قەزای مێرگەسۆر، کاریگەری گرنگی دەبێت بۆ بەروبوومی گوندنشین و ئاژەڵدارانی ناوچەکە، هاوکات بەشێکە لە جێبەجێکردنی هەنگاوەکانی حکومەت بۆ پشتبەستن بە بەرهەمی ناوخۆیی و فرەچەشن کردنی سەرچاوەکانی داهات لە هەرێمی کوردستان.
قایمقامی مێرگەسۆر، گوتیشی: “زۆربەی دانیشتووانی ئەم سنوورە خانەوادەی سەربەرزی شەهید و ئەنفالکراوانن، لە پڕۆژەکە سوودمەند دەبن، کە ئەمەش داخوازی و هیوای سەرۆک بارزانییە، بۆ خزمەتکردنی هاووڵاتییان و رەخساندنی هەلی کار و دابین کردنی ژیانێکی باشتر بۆیان”.
غەفوور ئەحمەد، گوتیشی: “ئەو کارگەیە دەبێتە هۆکارێک کە خەڵکی هەرێمی کوردستان، بەرهەمێکی کوردی و خاوێن و تەندروستی شیرەمەنیان لەناوخۆ هەبێت، لە هەمانکاتدا بەشێکە لە هۆکارەکانی بەهێزکردنی ئاسایشی خۆراک لە هەرێمی کوردستان”.
لە بەشێکی دیکەی گوتارەکەیدا، گرنگی ئەم کارگەیە لەوەشدایە کە هەوڵێکە کە دانیشتووانی گوندەکان لەشوێنی خۆیان بمێننەوە و کۆچ نەکەن وگرنگی بە بەرهەمە کشتوکاڵییەکان و ئاژەڵداری بدەن.
