زاری كرمانجی- سۆران:
دوای ئەوەی هەفتەی ڕابردوودا لەلایەن هێزەكانی (گەشتی ئیرشاد) كە تایبەتن بە جێبەجێكردنی باڵاپۆشی لە وەڵاتی ئێراندا، بە بیانووی جێبەجێنەكردنی یاسای باڵاپۆشی، كچێكی كوردیان بەناوی ژینا ئەمینی و چەند ئافرەتێكی دیكەیان دەستگیر كرد، ژینا ئەمینی جەڵتە لێیدا و دوای چەند ڕۆژێك مانەوە لە نەخۆشخانە گیانی لەدەستدا.
ڕووداوەكە كاردانەوەی ناوخۆیی و دەرەكی بەدوای خۆیدا هێنا و كەسوكارەكەی و ڕێكخراوەكانی مافی مرۆڤ دەڵێن ” ژینا بەهۆی ئەشكەنجەدانەوە جەڵتە ئەو ڕووداوەی بەسەردا هاتووە”.
ئەمڕۆش وەك ئیدانە كردنی ئەك رەفتارەی هێزەكانی ئیرشاد مانگرتنی سەرتاسەری راگەیندراوە.
حزبی دیموكراتی كوردستانی ئێران، لەمبارەوە ڕایگەیاند ” ئەمڕۆ دووشەممە مانگرتنی سەرتاسەرییە لە شارە كوردییەكانی ئێران، ئەوەش وەك هەڵوێستێك لەبەرامبەر گیان لەدەستدانی (ژینا ئەمینی) و لە ئاگادارینامەیەكدا حزبە كوردییەكان داوایان لە هاووڵاتییانی كوردی ئێران كردووە بەشدار بن لەو ناڕەزایەتییە”.
فوئاد خاكی بەیگی، ئەندامی رێبەری حزبی دیموكراتی كوردستانی ئێران ڕایگەیاند”مانگرتنەكەی ئەمڕۆ یەكێك لە بەهێزترین مانگرتنەكان دەبێت، پێشبینی دەكەم بەشێكی زۆری ڕۆژهەڵاتی كوردستان بگرێتەوە، ئەو مەسەلەی (ژینا ئەمینی) پەیوەندی بە تەنها (گەشتی ئیرشاد)ەوە نییە، چونكە ئەوان بەڕێوەبەری یاساكانی كۆماری ئیسلامین، هەتا حكومەتی كۆماری ئیسلامی مابێت یاساكانی هەر بەڕێوەدەچێت، بۆیە ئامانجی سەرەكی لە ڕاستیدا نەمانی ئەم ڕژێمەیە كە بەشێوەیەكی پێكهاتەیی نابێت چوارچێوەكەی بمێنێت چونكە هەتا ئەو ڕژێمە مابێت ئەو كردەوانە و ئەو یاسا شكێنیانە و ئەو دژیایەتیانەی مافی مرۆڤ و نامرۆڤایەتی و نائەخلاقی هەردرێژەی دەبێت. “
