سارا چاوشلی
ئەندامی پەرلەمانی کوردستان لە پێکهاتەی تورکمان
ئەو گۆڕانکارییەی بەشێک لە ئەندامانی لێژنەی دارایی پەرلەمانی عێراق لە پشکی بودجەی هەرێمی کوردستان کردیان، هەڵەیەکی گەورەیە و گێڕانەوەی کێشەکانی نێوان هەرێمی کوردستان و عێراقە بۆ خاڵی سەرەتا. هەمووان دەزانین سەرۆکی حکوومەتی هەرێمی کوردستان بەڕێز مەسرور بارزانی لەگەڵ دەستبەکاربوونی هەموو هەوڵێکی دا بۆ کۆتاییپێهێنانی کێشەکان و رێککەوتن. خۆشبەختانە تواندرا هەولێر بەغدا لەسەر کۆمەلێک پرس رێککبکەون. تواندرا لە بارەی هەناردەکردنی نەوت رێککەوتنێک بێتە دی، کە لە بەرژەوەندەیی خەڵکی کوردستان و هەموو عێراق دابێت.
زۆر بەداخەوە هەندێک لایەن ئەو گۆڕانکارییانەی لە پشکی بودجەی کوردستانیان کردووە وەک دەستکەوت بە خەڵکی دەفرۆشنەوە، دەیانەوێت بەو لێدوانە هەڵانە، خەڵکی کوردستان چەواشە بکەن، بەداخەوە هەموو ئەوەی دەیڵێن پێچەوانەی راستییە. ئەو گۆڕانکارییانەی لە بڕگەکانی ١١،١٢ و ١٣ی پشکی کوردستان کراون، پێشێلکاری روونی دەستوورین و ماف و دەسکەوت یاساکانی کوردستان پێشێل دەکەن، بە ئاشکرا دەیانەوێت لەو رێگایەوە پێشێلی دەسەڵاتە دەستوورییەکانی کوردستان بکەن.
و، وەک پێکهاتەیەکی سەرەکیی ئەم هەرێمە و بەشێک لە دانیشتووانی هەرێمی کوردستان، بەشدارین لە شانازی و دەستکەوتەکانی حکوومەتی هەرێمی کورستان و هاوخەمی کۆژانی دانیشتووان و پێکهاتەکانی کوردستان و قەوارەی هەرێمین، بۆیە ڕادەگەیەنین بە هەموو شێوەیەک وەک لە پێشتر پشتگیریی ڕێککەوتنی نێوان هەرێمی کوردستان و حکوومەتی فیدراڵیی عێراقمان کرد، ئێستاش ئێمە نیگەرانین لەو هەوڵە خراپانەی بۆ تێکدانی پەیوەندییەکانی هەولێر و بەغدا دەدرێت
خاڵێکی دیکەی جێگەی سەرنج ئەوەیە، کە لێژنەی دارایی لەبری رێکخستنی پرۆژە یاسایی بودجە، پەلیان هاوێشتووە بۆ کۆمەڵێک کاروباری دیکە، کە نە پەیوەندی بە ئیشی لێژنەی یاساییە، نە لە دەسەڵاتی ئەوانە، بۆ نموونە باسکردن لە کێڵگە نەوتییەکان و دەسەڵاتی بەڕێوەبردنی کێڵگە نەوتییەکان هەرگیز کاری ئەوان نییە. ئەوەش نیشانەیەکی روون و دیارە، کە مەبەستی ئەوان تێکدانی رێککەوتنەکان و دژایەتی کردنی خەڵک و قەوارەی هەرێمی کوردستانە، نەک بودجە و بەرژەوەندی خەڵک.
داواکارین لە هەموو لایەنەکان هەوڵەکانیان بخەنە گەڕ بۆ کۆتایی هێنان بەو کێشانە و گەڕانەوە بۆ رێککەوتنی هەولێر و بەغدا و هەڵوەشاندنەوەی ئەو گۆڕانکارییانە. پێویستە لایەنە سیاسییەکان و پەرلەمانتاران هاوکار بن بۆ کۆتایی پێهێنانی کێشەکان، نەک خۆیان ببنە هۆکاری هەڵوەشاندنەوەی رێککەوتنەکان و تێکدانی بارودۆخی گشتی.
ئێمە داوکارین مافەکانی خەڵکی کوردستان بەپێی دەستوور و یاساکان دیاری بکرێن، نەک بکرێنە بنەمای کێشەی سیاسیی و رکابەری سیاسیی و تۆڵەکردنەوە. هیچ دەسەڵاتێک لە عێراق سەرکەوتوو نەبووە لە سەپاندنی بڕیارەکانی بەهێز لە دژی خەڵکی کوردستان.
داوکارین بە زووی کۆتایی بەو کێشە بهێندرێت، چونکە ئەوە دەبێتە کێشەیەک بۆ تەواوی عێراق، دواکەوتنی پەسندکردنی بودجە، دژی بەرژەوەندی هەموو خەڵکی عێراقە. نەک هەر کوردستان. خەریکە نزیک دەبینەوە لە کۆتایی نیوەی یەکەمی ساڵ، تا ئێستاش بودجە پەسند نەکراوە، ئەوەش پێچەوانەی خواستی هەردوو حکوومەتە کە دەیانەوێت ژمارەیەک پرۆژە جێبەجێ بکەن و ژیانی خەڵک باشتر بکەن.
