“لە هەوڵداین لە ڕواندز كارگەیەكی بەرهەمهێنانی غاز بنیادبنێین”

دیدار – محەمەد مەحموود
داڕشتنەوە – شەهلاسۆفی

لەدیدارێكی زاری كرمانجیدا، چیایی محەمەد، سەرۆكی شارەوانی قەزای رواندز، باسی لە گرنگترین بەرنامە و پڕۆژەكانی سنوورەكەی دەكات و رایگەیاند: ئەوەی لای من گرنگ بێت گرنگیدانە بەسیمای شار و نەهێشتنی زێدەڕۆیی، دووپات لەوەدەكاتەوە، رواندز تاكە قەزایە لە ئیدارەی سۆران كە هیچ شەقامێكی دووسایدی نییە.
لە دەستپێكی قسەكانیدا، سەرۆكی شارەوانی سۆران، بۆ زاری كرمانجی گووتی:” مەبەست لە ئەرك وبەرپرسیاریەتی زیاتر خزمەتكردنە بەهاووڵاتییان، لەماوەی دەستبەكاربوونم ئاگاداری ئەوەبووم كە كە شارەوانی كۆمەڵێك زەوی قەرزاری هاوڵاتیانین، وەك كەس وكاری شەهیدان كە پێشتر ڕەزامەندیان هەبووە، بەڵام زەوی نەبووە بۆئەوەی پێیان بدرێت، هەروەها لەهەوڵی ئەوەداین چەند نەخشەی كەرتی دابنێین، چونكە لەساڵی ( ٢٠١٣) وە هیچ نەخشەیەكی كەرتی لەڕواندز دانەنراوە، گرنگی نەخشەی كەرتی، ڕێگری كردنە لەزێدەڕۆیی و درووستكردنی گەڕەكی تازەیە، هەروەها بۆ قەرەبووكردنەوەی ئەوهاوڵاتییانەی مافیان كەوتۆتە لای شارەوانی، ئەمەش سوودی دەبێت.
سەبارەت بە دووساید كردنی شەقامەكان، چیایی محەمەد، سەرۆكی شارەوانی رواندز، گوتی:” رواندز تاكە قەزایە لەسنووری ئیدارەی سۆران كە هیچ شەقام و رێگەیەكی دووساید نییە، ئەمەش گرفتێكی گەورەیە بۆ دروست بوونی جەنجاڵی، چونكە ڕواندز شوێنێكی گەشتیارییە و ڕۆژانە نزیكەی پێنج هەزار گەشتیار ڕوو لەو ناوچەیە دەكەن، پێویستە دەروازەی قەزای ڕواندز بكرێتە دووساید، هەر لە كانی مەلانەبی تا دەروازەی شنگلبانە و شوێنیش هەیە.
ئاماژەشی بەوەدا:” هەندێ شوێن لە سنوورەكەمان كە ڕێگاكانیان پێویستیان بە كۆنكرێت و قیڕتاوكردن و نۆژەنكردنەوە هەیە، ئاوەڕۆیەكمان دروستكردووە بۆ ئەو ئاوەپیسەی لە شەهیدان دەهات و لەهاوینان بەهۆی بۆنەكەیەوە ببووە هۆی بێزاربوونی هاووڵاتییان.”
سەرۆكی شارەوانی ڕواندز، باسی لەو زەوییانە دەكات، كە لە ماوەی رابردوودا زێدەڕۆییان كراوەتەسەر و دەڵێت:” پێشتر لیژنەیەك بەبڕیاری ئەنجوومەنی وەزیران بۆكاركردن لەسەر ئەو زەوییانەی تۆمار نەكراون پێكهاتووە، بەڵام ئێستا كارەكانی ئەو لیژنەیە ڕاگیراوە و لە هەرێمی كوردستان بڕیاری تاپۆكردن دەرچووە و هاوڵاتییەكی زۆر داوایان پێشكەش كردووە بۆ تاپۆكردنی زەویی و خانووەكانیان.”
لەسەر پرسی زیاد كردنی داهات، سەرۆكی شارەوانی ڕواندز، گووتی:” زیادكردنی داهات خاڵێكی گرنگی پلانەكانمانە، ئەو كۆمپانیا و تیمەكانی شارەوانی كە پاشماوەكانی ناو بازاڕ كۆدەكەنەوە، دەمانەوێت لە هەر خاوەن دوكانێك و ماركێتێك بڕێك پارە وەربگیرێت بە شێوەیەك مانگانە ٥ بۆ ٢٥ هەزار دینار لەبری پاشماوەكانیان بۆهاوكاری شارەوانی.
لەدرێژەی قسەكانیدا سەرۆكی شارەوانی ڕواندز، ئاشكرای كرد:” دەمانەوێت گرێبەستێك لەگەڵ ئەوكۆمپانیایەی كە پێشتر زبڵ وخاشاكی كۆدەكردەوە لەڕواندز ببەستین كە بەنیازە كارگەیەكی بەرهەمهێنانی غازیش لەڕێگەی بۆڕیەوە بنیاد بنێن، بەمەش چیتر كێشەی سووتانی زبڵ وخاشاك نامێنێت و لەلایەكی تریشەوە كارگەیەكی غازمان دەبێت لە قەزای ڕواندز.
دووپاتی كردەوە، لەگەڵ سەرپەرشتیاری ئیدارەی سۆران و قایمەقامی قەزای رواندز گفتوگۆمان كردووە بۆ نۆژەنكردنەوەی چوار پارك لە ڕواندز، دڵنیایی دەدەمە دانیشتوانی قەزای ڕواندز بۆئەمساڵ باخچەی گشتی نۆژەن دەكرێتەوە، هەروەها 10 شوێن دیاریكراوە بكرێتە كۆشكی گەشتیاری تا بەوهۆیەوە زۆرترین هەڵی كار بۆگەنجان و هاووڵاتییانی سنوورەكەمان بڕەخسێت.

ئەو سەرۆك شارەوانییە، لەوهاوڵاتییانە دەكات كە ئەژەڵداری دەكەن لەنێو شار، دەڵێت: ئاژەڵەكانیان بگوازنەوە بۆشوێنی گونجاو، چونكە لەمەودووا لێپێچینەوە دەست پێدەكەین.
چیایی محەمەد، سەرۆكی شارەوانی رواندز، گووتیشی:” تائێستا فەرمانبەری ئەندازیار و دەرچووی بەشی یاسا و لیژنەی چاودێریكردنی شوێنە زێدەڕۆیەكانمان نییە، هەرچەندە چەند گەنجێك خۆبەخشانە لەگەڵمان هاوكارن و سوپاسیان دەكەین، بە شێوەیەكی گشتی لە رووی میلاك گرفتمان هەیە”.