پشتیوان كەریم – زاری كرمانجی:
لە بەدواداچوونێكی زاری كرمانجی بۆ پرۆژە گەشتیارییەكەی گەلی عەلی بەگ كە ساڵی رابردوو قسەی لەسەر كراو و بڕیاربوو لەم ماوەیەدا بكەوێتە كار، بەڕێوەبەری گشتی گەشتوگوزاری ئیدارەی سۆران، ئاشكرای دەكات كە ماستەرپلانێكی نوێی گەشتیاری دادەنرێت و دەڵێ:” كۆتایی هەفتەی ڕابردوو سەرۆكی حكومەتی هەرێمی كوردستان سەردانی ئیدارەی سۆرانی كرد، پرۆژەی رێگای دوو سایدی سپیلك – خەلیفانی دانا، لەوێشەوە گوتی تیمێكی پسپۆڕ رادەسپێرین بۆ دانانی ماستەرپلانێكی نوێی گەشتیاری بۆ تەواوی ئیدارەی سەربەخۆی سۆران”.
بارزان محەممەد، بەڕێوەبەری گەشتی گەشتوگوزاری سۆران، ئاشكراشی كرد:” بە راسپاردنی تیمێك و دانانی ماستەرپلانێكی نوێی گەشتیاری بۆ تەواوی ناوچە گەشتوگوزارەكانی سنووری ئیدارەی سۆران، گرنگی و تایبەتمەندی باشی دەبێت و كەرتی گەشتیاری بووژاندنەوەیەكی تر بە خۆیەوە دەبینێ و سێكتەری گەشتوگوزاری لە ئیدارەی سۆران دەباتە قۆناخێكی تر”.
بارزان، ئاشكراشی كرد:” هاتنی گەشتیارانی ناوخۆ و ناوەڕاست و باشووری عێراقی بەردەوامی هەیە، جموجۆڵی گەشتیاری لە سنووری ئیدارەی سۆران بەردەوامە، كۆتایی ئەم هەفتەیەش هەزاران گەشتیار سەردانی ناوچە گەشتیارەكانی سنووری ئیدارەی سۆرانییان كردووە”.
………
