” گەنجان چاویان لە هاوكاری و پاڵپشتی حكوومەتە، بۆ ئەوەی ببنە خاوەن كاری خۆیان”
مەهدی محەممەد – سۆران :
چاوەڕێ دەرفەتێك دەكەن بۆ ئەوەی لەو بێكارییە دەربازیان بێت و ببنە خاوەن كارێك و جیهانێكی شایستە بە خۆیان دروست بكەن.
باس و خواسی پێدانی قەرزی بچووك، ئەوانی دڵخۆش كردووە و لە ئێستاوە خەریكی دانانی پلانی كار و بیرۆكەی نوێن بۆ پرۆژەی بازرگانی.
قارەمان محەممەد دوو بیرۆكەی بازرگانی لە خەیاڵدایە و باس لەوە دەكات هەر كاتێك پێدانەوەی قەرزی بچووك ڕاگەیاندرا، مامەڵەی وەرگرتنی دەست پێ دەكات و دەڵێ : “دوو بیرۆكەی پرۆژەی كارم هەیە، بەڵام بە هۆی نەبوونی پارەوە نەمتوانیوە جێ بە جێ بكەم، ئێستاش كە باس لە پێدانەوەی قەرزی بچووك دەكرێت، هەست دەكەم لەدایكبوونی یەكێك لە پرۆژەكانمان نزیك بووەتەوە،”
قارەمان ئەوەش دەڵێ :”بێ كاری كاریگەری كردووتە سەر دەروونی گەنجان و ئەگەر جاروبار حكومەتی هەرێمی كوردستان دەرفەتی كار بڕەخسێنێت و قەرز بە گەنجان بدات، دڵنیام گەنجان جیهانێكی تایبەت بە خۆیان دروست دەكەن و كار و ژیانێكی شایستە بۆ خۆیان فەراهەم دەكەن كە چاویان لە دەستی كەس نەبێت.”
حەمید عوسمان، هاوڕێ قارەمانە و ئەویش خاوەن بیرۆكەی خۆیەتی و دەڵێ : “گەنجان چاویان لە هاوكاری و پاڵپشتی حكومەتی خۆیانە تا دەستیان بگرێت و لەو بێ كاری و بێ ژیانی دا دەرباز یان بكات، بە تایبەت دەرچووانی زانكۆ، جا ئەگەر قەرز بە مەبەستی پرۆژە بداتە گەنجان، گومانی تێدا پاڵەپەستۆیەكی زۆر لەسەر حكومەت نامێنێت و گەنجان چیتر چاوەڕێ دامەزراندن ناكەن،”
حەمید باس لەوەش دەكات :”ئەگەر دەرفەتی كاركردن بۆ گەنجان بڕەخسێت، كاری باش دەكەن و بیرۆكەی زۆر جوانیان هەیە، كە هەم خزمەت بە خۆیان و هەمیش بە نیشتمان دەكات.”
سامان مستەفا، نزیكەی دوو ساڵە دووكانێكی بچووكی لە یەكێك لە گەڕەكەكانی سۆران داناوە، ئەو حەز دەكات دووكانەكەی بگوازێتەوە نێو بازاڕ و پەرە بە كارەكەی خۆی بدات، بەڵام پارەی پێویستی لە دەست دانییە بۆ ئەنجامدانی ئەو كارە و چاوەڕێ دەرفەتێك دەكات، ئەو دەڵێ : “پێدانی قەرزی بچووك، ئومێد و هیوایەكی تر بە گەنجان دەبەخشێتەوە و ئەو بیرۆكەیە لە مێشكی خۆیان فڕێ دەدەن كە هیچ كەس و لایەنێك نییە خزمەتیان بكات و خاوەنداریەتییان لێ بكات، بە پێچەوانەوە ئەمجارە هەست دەكەن حكومەتێك هەیە هەمیشە خەمی ئەوانی لەبەرچاوە و كاریان بۆ دەكات،”
سامان ئەوەش دەڵێ :”كاری خۆم هەیە بەڵام حەز دەكەم پێش بخەم و بیگوازمەوە نێو بازاڕ، بۆ ئەم كارەش پێویستیم بە پارەیە و كە ئەو بڕە پارەیەشم لە دەست دانییە، بەڵام ئەگەر بەیانی ئەو قەرزە وەربگرم، هەموو ئەو كارانەم پێ دەكرێت كە لە خەیاڵم دایە،
سازگار محەممەد لە ماڵەوە كاری ئۆنلاین دەكات و باس لەوە دەكات ئەو قەرزەی پێ بدرێت، دووكانێكی بچووك دەكاتەوە و كارەكانی لەوێدا بەرێ دەكات :”لەگەڵ دوو برادەری تۆم كاری ئۆنلاین دەكەین، گەر دووكانێكی بچووكمان هەبێت باشتر دەتوانین كارەكانی خۆمان بكەین، بۆ ئەمەش چاوەڕێ قەرزی بچووك دەكەین، چونكە هیچ كارێك بێ پێشكەوتن و گۆڕانكاریكردن تێدا سەركەوتوو نابێت، بۆیە ئێمەش دەمانەوێت كارەكەی خۆمان پێش بخەین،”
لەسەر ئەو هەنگاوەی حكومەتی هەرێم و ئیدارەی سۆران بۆ پێدانی قەرزی بچووك بە هاووڵاتییان و گەنجان، سازگار دەڵێ :”حكومەتی هەرێمی كوردستان لە پێناو دەستگرتن و بوون بە خاوەن كارییان، قەرزی بچووك بداتە گەنجان، بەم كارە حكومەت زۆر لە كێشەی گەنجان چارەسەر دەكات و ئەو بارگرانییەش لەسەر شانی خۆی لا دەبات، ئەو كات گەنجان لە داهاتوودا دەبنە خاوەن كاری خۆیان و پشت بە خۆیان دەبەستن و هۆكارێكیش دەبن بۆ باشتركردنی ژێرخانی ئابووری و هەرگیز وڵاتی خۆیان جێ ناهێڵن”.
