ڕاوێژكارێكی مه‌كته‌بی سیاسی پارتی دیموكراتی كوردستان هێرش ده‌كاته سه‌ر ئه‌و په‌رله‌مانتارانه‌ی یه‌كێتی كه پرۆژه‌ی بودجه‌ی عێراقیان به گۆڕانكاریه‌وه واژۆ كردوه.
عارف روشدی ڕاوێژكاری مه‌كته‌بی سیاسی پارتی دیموكراتی كوردستان ڕایگه‌یاند، بە پاڵپشتیی دوو پەرلەمانتاری یەكێتی، یاریی بە قووتی خەڵكی كوردستان دەكرێت ”بەپێی هەموارەكە نەك ناتواندرێت پاشەكەوت بدرێتەوە، بەڵكوو كێشە بۆ مووچەش دروست دەبێ“.
عارف روشدی ده‌ڵێت، ئەوەی دوێنێ لە لێژنەی دارایی پەرلەمانی عێراق لەبارەی پشكی هەرێمی كوردستان دەنگی لەسەر دراوە، ”پیلانی ڕەگەزپەرست و تایفییەكانە بە پاڵپشتیی دوو ئەندامی بەناو كورد، ئەگەر پێش دەنگدان و پەسەندكردنی لەنێو هۆڵی پەرلەمان چارەسەر و ڕاست نەكرێتەوە، هەرێمی كوردستان ڕووبەڕووی تەنگژەی قووڵی ئابووری و سیاسی دەكاتەوە.“
جەختیشی كردۆتەوە كە ئەو كارە، ”یارییەكی دڵڕەشانەی بە ئەنقەستی مەبەستدارە بە قووتی خەڵكی كوردستان وەك هەستیارترین بابەت، نەك وەك هەندێ پروپاگه‌نده‌یی بۆ دەكەن گوایە پاشەكەوت دەدرێتەوە! چونكە لە بنەڕەتدا ڕێژەی بەشی تەرخانكراوی هەرێم لە ئاستی دانیشتوانەكەیدا ڕەچاو نەكراوە، تەنانەت بەپێی داتاكانی وەزارەتی پلاندانانی عێراقی كە دەبوایە 14% بێت، كەچی كەمكراوەتەوە بۆ 12.67%، جگە لەوەی یەك دیناری بودجەی هەرێم لە ساڵی 2014ەوە نەدراوە كە هۆكاری سەرەكیی پاشەكەوتكردنی ناچاریی مووچە بووە، ئەم پارە نەدراوەش نەخراوەتەوە سەر بودجەی هەرێمی كوردستان، ئیتر چۆن پاشەكەوت دەدرێتەوە؟“
دوێنێ لیژنه‌ی دارایی له په‌رله‌مانی عێراق دوای ده‌ستكاریكردنی دوو ماده‌ی په‌یوه‌ست به شایسته‌داراییه‌كانی هه‌رێمی كوردستان راپۆرتی خۆی له‌باره‌ی بودجه ئاماده‌كردو حكومه‌تی هه‌رێم به‌توندی ڕه‌تی كرده‌وه.
