هەر ئەركێكی پێ سپێردرابێت بە شانازییەوە جێبەجێی كردووە
زاری كرمانجی- سۆران:
غەفوور غەفوور حاجی، ناسراو بە غەفوور شیڤی، لە ساڵی 1946 لە بنەماڵەیەكی كوردپەروەر لە دایكبووە و هەر لە تەمەنی منداڵییەوە چەكی شەڕەفی كردۆتە شان و بۆتە پێشمەرگە و لە چەندین داستان بەشداری كردووە و خاوەنی دەیان شەهیدە.
غەفوور شیڤی، لە ساڵی 1946 لە گوندی شیڤێ، كە دەكەوێتە مزووری باڵا، لە بنەماڵەیەكی كوردپەروەر لە دایكبووە، لە تەمەنی منداڵییەوە بۆتە پێشمەرگە و خاوەنی دەیان شەهیدە، دوو كوڕ و كچێك و خێزان و چەندین كەسوكاری دیكەی شەهید بوونە، خۆشی تا كۆچی دوای كرد، پێشمەرگە بووە و لە چەندین داستان بەشداری كردووە.
غەفوور غەفوور، لە ساڵی 1962 چەكی شەڕەفی كردۆتە شان و بۆتە پێشمەرگە، بەشداری لە هەر دوو شۆڕشی ئەیلوول و گوڵان كردووە، هەروەها لە چەندین داستان بەشداری كردووە، وەك داستانەكانی خواكۆڕك، كۆڕێ و چەندین داستانی دیكە، لەپاڵ پێشمەرگە قارەمانەكان بەرگری لە خاكی كوردستان كردووە، هەروەها لە بادینان بەشداری چەندین چالاكی كردووە، پاشان دەچێتە لای لوقمان بارزانی و درێژە بە ئەركی پێشمەرگایەتی دەدات و تاكو ساڵی 1975 ئاوارەی ئێران دەبێت، سەرەڕای ئاوارەبوونی، لەسەر خەباتەكەی بەردەوام بووە و پێشمەرگایەتی كردووە، لە ئێران لەگەڵ فەرماندە عەلی خەلیل مزووری، چەندین جار هاتوونەتە هەرێمی كوردستان و چالاكی سەربازییان لە دژی حكوومەتی بەعس ئەنجام داوە، بۆ ماوەی چەندین ساڵ لەبەرەكانی پێشەوەی شەڕ بووە و نەگەڕاوەتەوە ماڵەوە، كە جاری وا هەبووە شەش مانگ نەدەگەڕایەوە ناو ماڵ و منداڵەكانی و درێژەی بە ئەركی خۆی داوە، لە ساڵی 1985 لە كاتی بۆردومانكردنی ئۆردوگای زێوە، كە ئەو كات لە كانی سپی لە ئەركدابووە خێزان و دوو كوڕ و كچێكی شەهید دەبن، پاشان گەڕاوەتەوە خێزانی بەناوی زین شێخۆ، كوڕەكانیشی بەناوی سیروان و سەروان، كچەكەشی بەناوی خلمەت شەهید بوونە، هەروەها هەر لەو بۆردومانەدا دوو كچی دیكەشی بریندار دەبن، لە كاتی ناشتنی شەهیدەكان، شەهیدی هەمیشە زیندوو ئیدریس بارزانی و سەرۆك بارزانی دێنە سەر گۆڕستانی مەلاباسەك بەشداری لە ناشتنی تەرمی شەهیدەكان دەكەن، ئەو كات غەفوور شیڤی دەچێتە پێش سەرۆك بارزانی و پێی دەڵێ، قوربان جارێك ماڵمان خراپبووە، با نەبێتە دووجار هەر ئێستا دەبێت لێرە بڕۆن، سەرۆك بارزانی هەر ئەو كات فەرمووی غەفوور خۆ من لە منداڵەكانی ئێوە ئازیزتر نیم، غەفووریش پێی گوت چوار شەهیدم داون ئەوانەی ماون ئەوانیش قوربانی ئێوە بن، بەس ئێوە بۆمان بمێنن كاتێك سەرۆك گوێی لەو قسانە دەبێت فرمێسكی لەچاو دێـتە خوارەوە.
غەفوور شیڤی، لە ساڵی 1991 بەشداری لە ڕاپەڕینی كردووە، هەتا بە تەواوەتی كوردستان ئازاد بووە، پاش ئازادكردنی هەرێمی كوردستان، ماڵەكەی لە ئێران گواستەوە بۆ هەرێمی كوردستان، پاشان دەبێتە ئامر فەوج لە فەرماندەی بارزان و، بەردەوام دەبێت لە ئەركی خۆی، لەو ماوەیەدا هەر ئەركێكی پێ سپێردرابێت بە شانازییەوە جێبەجێی كردووە تا خانەنشین بووە.
لەو ماوەیەدا بەردەوام سەردانی سەرۆك بارزانی دەكرد، هەتا لەگەڵی باسی شەهیدانی ئۆردوگای زێوەی كردووە و رایگەیاند هەندێك لەوانەی شەهید بوونە بە شەهیدی هاووڵاتی تۆمار كراون، سەرۆك ئەو كاتە زۆر كز بوو و رایگەیاند ئەوانە هەموو شەهیدن، نابێت بە شەهیدی هاووڵاتی حساب بكرێن، لە هەموو دانیشتنەكانیشیدا ئەو دوعایەی دەكرد من بمرم بەس مردنی سەرۆك بارزانی بە چاوەكانی خۆم نەبیم، وەسیەتیشی كردبوو كە مردم بە جەمەدانی سۆر بم نێژن، وەكو نێچیرڤان، كوڕەكەی بۆ زاری كرمانجی دەڵێ: وەسیەتەكەشی بەجێهێنرا، لە 24/9/ 2021 لە تەمەنی 75 ساڵی بەهۆی نەخۆشی كۆچی دوای كرد و گەیشتە كاروانی نەمران، لە پاش خۆی كوڕێك و 8 كچی بەجێهێشتووە، كوڕەكەی وەكو خۆی دەڵێ: زیاتر لە 24 ساڵە پێشمەرگەمە و پەیمانم داوە لەسەر رێبازی باوكم درێژە بە خەبات بدەم، ئێستاش پێشمەرگەمە لە فەرماندەی بارزان”.
