زاری كرمانجی – سۆران:
ماوەی چەندین ساڵە، سەدان پارچە زەوی لە نەخشەی 22ی دێلزیان لە سنووری ناحیەی دیانای سەر بە ئیدارەی سۆران دابەشكراون، بەڵام تا ئێستا خزمەت گوزاری سەرەتایی نەگەێندراوەتە ئەو نەخشەیە، بە گووتەی هاووڵاتییان و خاوەن نوسینگەكانی خانووبەرەش، یەكێكە لە پڕ كێشەترین نەخشە و زێدەڕۆی زۆری كراوەتەسەری، ناشی شارنەوە، بەهۆی زەویەكانی ئەو نەخشەیە، خەڵكێكی زۆر تووشی زەرەری ماددی، گرفتی یاسایی و كێشەی كۆمەڵایەتی هاتوون، چاوەڕوان دەكەن لایەنی پەیوەندی دار بەشێوەیەك لە شێوەكان كێشەكانیان چارەسەر بكات و خزمەتگواریش بگەینێتە ناوچەكە.
عەلی دێلزی خاوەنی نوسینگەی خانووبەرە، بە زاری كرمانجی گووت:” كاتێك نەخشەی 22 لە دێلزیان دانراوە، هەڵەی شارەوانی تێدابووە، چونكە دۆخ و شوێنەكەیان لە نزیكەوە نەبینیوە و لای خۆیانەوە دیاناوە، چونكە پێش نەخشەكە دروست بكرێت بەشی زۆری زەویەكان خانوویان لەسەر دروست كرابوو، لە هەمان كات، زێدەڕۆیی كردنە سەر ئەو نەخشەیەش گرفتێكی دیكەیە.
زیاتر گووتی:” شارەوانی خۆی ئەو زەویانەی بە خەڵك داوە لە بەرامبەر قەرەبۆ كردنەوەی هاووڵاتییان لە شوێنێكی دیكە كە زەویان بەرپڕۆژەی حكومەت كەوتووە، بەڵام ئامادە نییە ئەو نەخشەیە چارەسەرێكی بۆ بدۆزێتەوە، ئەم زەویە چەندین كێشەی بۆ خەڵك دروست كردووە، لەوانە كێشەی یاسایی، كۆمەڵایەتی، دارایی، ئەمانە و چەندین كێشەی دیكە .
عەلی دێلزی، دووپاتی كردەوە، لەو زەویانەی نەشخەی 22، خاوەنی زەوی كشتووكاڵی واتە خاوەنی یەكەم، قەرەبۆی خۆی لە حكومەت لەبەرامبەر زەویەكە وەرگرتووە، بەڵام هەڵكەوتەی ناوچەكە وایە جیا لە زەوی، گردۆلكەشی بەسەرەوەیە، بۆیە هەڵساوە ئەو گردانەشی كە بەسە زەویەكە وەیە كڕین و فرۆشتینان پێوەكراوە، بە شێوەی تۆز و با فرۆشتوویانە، پارچە زەوی هەیە تاپۆی بەناوی كەسێكە، بە تۆز و با دوو كەسی دیكە كڕیویانە و كەسیش ئاگایان لێك نییە .
ئەو خاوەن نوسینگەی خانووبەرە، ئاشكراشی كرد:” نرخی زەویەكانی نەخشەی 22، لە 2500 دۆلار دەستپێدەكات تا 20 هەزار دۆلار، بەشی زۆریشییان تاپۆن شارەوانی نەیان توانیوە چارەسەری زەویەكانی نەخشەی 22 بكەن، ئەمەش بووەتە هۆی زەرەرمەندی سەدان خەڵك، چونكە جیا لە دروست بوونی كێشە و گرفتی زۆر، هاووڵاتی هەیە پارچە زەوی تاپۆی بە 30 وەرەقە كڕیوە، كاتێك دەفرۆشێت 15 وەرقە خەرجی زەڕیبە دەبی بداتە حكومەت، ئەمەش زیانی زۆری پێدەگات، لە كاتێكدا هیچ خزمەت گوزاری لێ نیە و پارچە زەویەكانیش پڕ گرفت و كەم و كوڕین، ئەمەش لاوازی دەسەڵاتی شارەوانیە، چونكە ساڵانی پێشتر خۆی زەویەكانی دابەش كردووە و تاپۆشی پێداون، بەڵام ئامادە نییە پشتگیری بكات كێشەكان چارەسەر بكات .
لای خۆیەوە، فەرزنگ ئەحمەد بەڕێوەبەری ناحیەی دیانا، بە زاری كرمانجی راگەیاند:” هەركەسێك زەوی تاپۆی هەبێت، سەردانی شارەوانی بكات بۆ وەرگرتنی رێكارەكان و دەتوانێت خانوو دروست بكات، بەڵام شوێن هەیە خانوی لێ دەكات لەهەمانكاتدا تاپۆ نییە بۆیە رێی پێنادرێت و ناتواندرێت خانوو دروست بكات.
فەرزەنگ ئەحمەد، بەڕێوەبەری ناحیەی دیانا، دەشڵێت:” لەبارەی نەخشەی ٢٢ تا ئێستا بەتەواوی چارەسەر نەكراوە، كۆمەڵە بڕیاریك هەیە چاوەروانین بگەین بە رێچارەیەكی هاوبەش، تەواوی نەخشەكانی سۆران تێكەڵاویەكی زۆریان هەیە ، بۆیە هەندێك بابەت پێویست بە رای هاو بەش هەیە و پرسەكە ئالۆزە، لەهەوڵداین نەخشەكە بگۆڕین بۆ ئەو دۆخەی ئێستای شێونەكە، ئەوكات ئەوانەی زێدەڕۆكار و خەوان موولكن دیار دەبن و لە هەمان كات شوێنی نیشەجێ بوون دیاری دەكرێت.
گووتیشی:” نەخشەی 22 كە لە سنووری گەڕەكی ئازادی تا دێڵزیان درێژدەبێتەوە، لە رابردوو بەشی زۆری بە زێدەڕۆی كراوە، هەموو هەوڵێك دەدەین بۆ چارەسەر كردنی گرفتەكانی نەخشەكە .
