سەرۆكی حكومەت : هەوڵی ئەوەدەدەین هاووڵاتیانمان لە ژیانێكی خۆشگوزەرانی دابن

زاری كرمانجی:

ئەمڕۆ سێشەممە، مەسرور بارزانی سەرۆكی حكومەتی هەرێمی كوردستان، لە سێزدەمین پێشانگەی نێودەوڵەتیی بیناسازی و ئاوەدانكردنەوە و ژێرخان و شارەوانی و ئامێر و دەزگای پیشەسازی) لە هەولێر كردەوە و پاشان لە پانێلێكی تایبەتدا تیشكی خستە چەندین تەوەری پەیوەندیدار بە پرۆسەی ئاوەدانكردنەوە و بیناسازی و وەبەرهێنان.

سەرۆكی حكوومەتی هەرێمی كوردستان، رایگەیاند:” یەكێك لە هەنگاوەكان ئەم جۆرە پێشانگایانەیە، ئەوەی كە بیستم زۆربەی بەشداربووانی ئەم پێشانگایانە كۆمپانیاكانی بیانین، كۆمپانیای ناوخۆییش زۆرن كە هەندێكیان بەشدارییان كردووە و هەندێكیان بەشدار نەبوون، بەڵام بەشداریكردنی كۆمپانیای بیانی لە ڕووی وەبەرهێنان لە كوردستان پێموایە ساڵ بە ساڵ زیاتر دەبێت، ئەمەش لەسەر خواستە، خواستی هاووڵاتی و خواستی كۆمەڵگە كە بە چ جۆرە كەرەستە و ستایلێك، ئەمە وادەكات لە بازاڕێكی ئازاددا بازاڕ خۆی تەحەكوم دەكات و كۆمپانیاكان خۆیان بەدوای هەلی كار دەگەڕێن، لە هەر شوێنێك هەلی كار زۆر بێت كۆمپانیاكان بۆی دەچن، بۆیە كوردستان پێویستە ئەم شوێنە بێت كە كۆمپانیای بیانی یان وەبەرهێنەری بیانی رابكێشێت و بێنە ئێرە. بەڵام ئەوەی لای ئێمە گرنگە و ئێمە دەمانەوێ ئەو جۆرە كۆمپانیایانە رابكێشین كە لەگەڵ ئەو ستاندارد و كوالێتییانەی قەبووڵكراون لە هەرێمی كوردستان بگونجێن.

مەسرور بارزانی سەرۆكی حكوومەتی هەرێمی كوردستان، گووتی:” بەرنامە و ئەجێندای حكوومەت بەرنامەیەكی خزمەتگوزارییەو تایبەتە بەوەی ئێمە چۆن بتوانین خزمەتی هاووڵاتیانمان بكەین كە ژیانێكی خۆشگوزەرانیان بۆ دابین بكەین. كە دێتە سەر بابەتی بیناسازی چەندین شت هەیە كە دەبێ لەبەرچاو بگیرێت، یەكێكیان پێداویستیی خەڵكە كە پێویستییان بەچییە ئەوەیان بۆ دابین بكرێ، بەڵام لەگەڵ ئەوەش هەندێك شت هەیە كە پێویستە لەبەرچاو بگیرێت. نرخی ئەو شوێنانەی كە بۆیان دروست دەكرێ یان یەكەی نیشتەجێبوون پێویستە بە شێوەیەك بێ كە خەڵك بتوانن تێیدا سوودمەند بن، ئەمەش بێگومان چەندین جۆر لەخۆی دەگرێ.
دووپاتی كردەوە، خەڵك هەیە لەوانەیە لە ڕووی مالییەوە توانای زیاتریان هەبێ و بە تەمای شتی باش بن، بێگومان دەبێ ئەمەیان بۆ لەبەرچاو بگیرێ. بەڵام لە لایەكی ترەوە خەڵكێك هەیە لە ڕووی ماددییەوە دەرامەتی زۆر نییە و كەم دەرامەتە. ئێمە لە حكومەت بەرنامەی ئەوەمان هەبووە كە 20 هەزار یەكەی نیشتەجێبوون دروست بكەین بۆ ئەوەی ئەو خەڵكە بتوانن سوود لەو پرۆگرامەی حكومەت وەربگرن كە ئێستا خراوەتە تەندەر، باسی ئەوە دەكرێ كە لە هەر سنوورێك، لە هەر ئیدارەیەكی سەربەخۆ و هەر پارێزگایەك بە چ شێوەیەك ئەم یەكە نیشتەجێبوونانە دروست بكرێن.

لەبارەی كەس و كاری شەهیدان، سەرۆكی جكوومەت، گووتی:” ئێمە هەندێك بەرنامەمان هەبووە كە چۆن بتوانین یەكەی نیشتەجێبوون بەبێ بەرامبەر بۆ بنەماڵەی سەربەرزی شەهیدان دابین بكەین، لە سنووری دهۆك وامان كردووە، لە هەولێر پرۆسەیەكە خەریكە ئیشەڵا تەواو دەبێ، لە هەموو پارێزگا و ئیدارە سەربەخۆكانی تریش بۆ بنەماڵەی شەهیدان وادەكەین، ئیشەڵا هەموو كەسێك ببێ بە خاوەنی خانووی خۆی یان جێگەی خۆی.

راشیگەیاند:” لە ڕووی بیناسازییەوە هەندێك شت هەیە كە پێویستە ئێمە لەبەرچاوی بگرین، یەكێكیان سیمای شارە، هەر جۆرە بینایەیەك یان هەر كارێكی بیناسازی لە كوردستان دەكرێ، پێویستە بگونجێ لەگەڵ ئەو سیمایەی ئێمە دەمانەوێ لە كوردستان هەبێ و ببێ بە شتێكی دڵگیر و خەڵك لەزەتی لێ بكات، لەبەر ئەوە جوانیی بیناسازی لە كوردستان پێویستە لەبەرچاو بگیرێت. دووەم بابەتی كوالێتییە، كەواتە نابێ كەمیی نرخ لەسەر حیسابی كوالێتی بێت، دەبێ كوالێتیی بیناسازی زۆر زۆر لەبەرچاو بگیرێت، لە ئاستێكدا بێت كە خەڵك متمانەیان هەبێ، خوانەخواستە ئەگەر هاتوو تووشی بوومەلەرزە بوون یان هەر شتێكی نەخوازراو هاتە پێشەوە، توانای بەرگریی ئەم جۆرە گرفتانەی هەبێ. ئەوەی تریش وەكوو باسم كرد، كوالێتییە، سیمایە، نرخە.