سەندیكای رۆژنامەنووسان كار لەسەر پڕۆژەی ماڵی موكریانی دەكات

راپۆرت- محەمەد هەسنانی:
نزیكەی 10 ساڵ لەمەوبەر بەردی بناغەی درووستكردنی ماڵی حوزنی موكریانی لە قەزای رواندز داندراوە و تا ئێستا پڕۆژەكە جێبەجێ‌ نەكراوە، نووسینگەی سۆرانی سەندیكای ڕۆژنامەنووسانی كوردستانیش، لەگەڵ لایەنە پەیوەندیدارەكان لە هەوڵدان بۆ ئەوەی دەست بە ئەنجامدانی پڕۆژەكە بكرێت.
لەمبارەوە، هەژار ئیبڕاهیم، ئەندامی دەستەی كارگێڕی نووسینگەی سۆرانی سەندیكای ڕۆژنامەنووسانی كوردستان، بە زاری كرمانجی راگەیاند:” نزیكەی 10 ساڵە بەردی بناغەی نۆژەنكردنەوەی ماڵی حوزنی موكریانی لە قەزای رواندز دانراوە، كەچی بە هۆكاری دروستبوونی قەیرانی دارایی و چەند هۆكارێكی دیكە تائێستا پڕۆژەكە بە شێوەی كرداری دەست بەجێبەجێ‌ كردنی نەكراوە، ئەوەش نیگەرانی ڕۆشنبیران و ڕۆژنامەنووسانی دەڤەرەكەی لێكەوتۆتەوە و خوازیارن هەرچی زووە دەست بەم پڕۆژەیە بكرێت”.
گووتیشی:” وەك نووسنگەی سۆرانی سەندیكای رۆژنامەنووسانی كوردستان، بەردەوام لە هەوڵداین، بۆ ئەوەی پڕۆژەكە زیاتر دوانەكەوێت. كۆپیەكیشمان لەتەواوی دۆسیەی پڕۆژەكە بەهەموو زانیاریەكانیەوە لە ئەنجوومەنی سەندیكای ڕۆژنامەنووسانی كوردستان وەرگرتووە، بەنیازین لەسەردانێكماندا داواكاریەكە بە فەرمی بدەینە هەڵگۆرد شێح نەجیب سەرپەرشتیاری ئیدارەی سەربەخۆی سۆران، تا لە چوارچێوەی پڕۆژەكانی دیكە ئیشی لەسەر بكرێت و بچێتە واری جێبەجێكردنەوە.تا ببێتە جێگای ڕەزامەندی ڕۆژنامەنووسان و خانەوادەی حوزنی و رۆشنبیران”.
هەژار ئیبڕاهیم دەشڵێت:” لە ماوەی ڕابردوو، د. كوردستان موكریانی، نووسەر و لێكۆڵەر، سەردانی ستافی نووسینگەی سۆرانی سەندیكای ڕۆژنامەنووسانی كوردستانی كردو لە دانیشتنێكدا تیشكخرایە سەر هەنگاوەكانی هەوڵدان بۆ پڕۆژەی دروستكردنی ماڵی حوزنی موكریانی لە قەزای رواندز، وەك ستافی نووسینگەی سۆران، هەوڵ و هەنگاوەكانمان لەبارەی پڕۆژەكە روونكردەوە بە ئاراستەی هەنگاونان بۆ ئەوەی ئەمساڵ پڕۆژەی دروستكردنی ماڵی حوسێن حوزنی لەهەمان ئەو شوێنە بنیات بنرێت كە لە رۆژگارێكدا حوسێن حوزنی موكریانی چاپخانەی تێدا داناوە و دواتریش گۆڤاری زاری كرمانجی لەڕواندز چاپ و بڵاوكردووەتەوەو بە پڕۆژەیەكی گرنگی دەزانین”.
ئاشكراشی دەكات:” بیرۆكەی نۆژەنكردنەوەی ماڵی حوسێن حوزنی موكریانی لە رواندز، پڕۆژەیەكی سەندیكای ڕۆژنامەنووسانی كوردستانە، كە خۆی دەبینێتەوە لە دروستكردن و بنیاتنانی باڵەخانەیەك و دروستكردنی هۆڵێك لە شێوەی مۆزەخانەیەك تایبەت بە پاراستنی ئەرشیفی رۆژنامەوانی، پێشتر سەندیكای ڕۆژنامەنووسانی كوردستان ئەو پارچە زەویەی كڕیووەتەوە كە پێشتر حوسێن حوزنی موكریانی تیایدا ژیاوەو چاپخانەی لێداناوە، بە ئەمانجی دووبارە بنیاتنانەوەی”.
ئەو ئەندامی دەستەی كارگێڕی نووسینگەی سۆرانی سەندیكای ڕۆژنامەنووسانی كوردستان، ئاماژەی بەوەشدا: ” لە ساڵی 2013 لە رێوڕسمێكدا بە ئامادەبوونی نوێنەرانی حكوومەتی هەرێمی كوردستان و سەندیكای رۆژنامەنووسان و خانەوادەی حوزنی موكریانی و بەرپرسانی ئیداری و ژمارەیەك لە رۆشنبیران و رۆژنامەنووسان، بەردی بناغەی پڕۆژەی دروستكردنی ماڵی حوزنی لە قەزای رواندز داندرا، بەڵام بەهۆی گۆڕینی نەخشەی پڕۆژەكەو دواكەوتنی، هەروەها درووستبوونی قەیرانی دارایی كارەكانی پڕۆژەكە ڕاگیرا، ئێستاش وەك نووسینگەی سۆرانی سەندیكای ڕۆژنامەنووسان هەوڵەكانمان دەستپێكردوە، بە ئامانجی ئەوەی كە پڕۆژەكە بە كرداری بچێتە واری جێبەجێكردنەوەو گەشبینین بە هەوڵەكانمان و بەهیواین بتوانین لەم رووەوە خزمەتێك پێشكەش بكەین و هەوڵەكانمان بەرهەم داربێت”.
حوسێن حوزنی موكریانی، لە ساڵی 1890 لە شاری مەهاباد، لە گەڕ‌ەكی حاجی حەسەنیان هاتووەتە دنیاوە، سەرەتا لای باوكی و خاڵەكانی خوێندوویەتی و لە تەمەنی 21 ساڵیدا ئاوارە بووە و چەندین وڵاتی دەرەوەی بینیوە، وەك (ڕووسیا، ئەفغانستان، سووریا، لوبنان، میسر، حیجاز و فەڕەنسا) و چەند وڵاتێكی دیكە، بۆ ماوەی پازدە ساڵ بە هەموو توانایەكییەوە هەوڵی داوە بۆ كۆكردنەوەی زانیاریی مێژوویی سەبارەت بە مێژووی گەلی كورد، كە لەو كاتەدا لە زمانەكانی عەرەبی و هیندی و توركی و فارسی و فەڕەنسی و ڕووسیدا هەبوون، لەبەرئەوەی خۆی شارەزاییەكی باشی لەم زمانانەدا هەبووە، گەلێك نووسراوی بەپێزی وەرگێڕاوەتە سەر زمانی كوردی، هەروەها حوزنی موكریانی ساڵی 1925 هاتووەتە ڕواندز و چاپخانەی زاری كرمانجی دامەزراندووە. ساڵی 1943 لە ڕواندز دوورخراوەتەوە و تا كۆچی دوایی كردووە لە بەغدا ژیاوە.