وەیسی سەعید وەیسی
61 ساڵ بێ پسانەوەو دابڕان سەرۆك مەسعود بارزانی، پێشمەرگەی كوردستانە، خەمی گەل و نیشتیمانی لەسەر شانە، هەمیشە لە ژیانیدا وەك پێشمەرگەیەك خۆی ناساندووە و لە سەنگەری بەرگریكردن داواكاری مافەكانی خەڵك و بەدیهێنانی خواستە نەتەوەییەكان بووە، شانازی بەپێشمەرگایەتی كردووە، نەك پلە و پۆست و ناونیشانی تر.
61 ساڵەسەرۆك مەسعود بارزانی، بووتە بەشێك لە مێژووی خەبات و تێكۆشان، مێژووی گەلەكەمان بەبێ باسكردنی مێژووی رێبازی بارزانی و سەرۆك مەسعود بارزانی هیچ بەهاو نرخێكی نییە، بۆیەش وەك بەشێكی جیانەكراو لە مێژووی شۆڕش و خەباتی گەلی كوردستان سەیر دەكرێت، كاریزمایەكی بەهێزە و تەنیا رەمزی حزبێك نییە، بەڵكوو هی هەموو خەڵكی كوردستانە، لەگەڵ ئەوەی لە قۆناغە جیاوازەكانی خەبات و تێكۆشانی دا زۆر هەوراز و نشێوی بینیوە و رووبەڕووی زۆر قۆناغی سەخت و دژوار بووتەوە، بەڵام هەر لە سەنگەری بەرگری كردن مایەوە بۆ داواكردنی مافەڕەواكانی خەلكی كوردستان.
هەمیشە داكۆكی لەو بەها نەتەوەیی و نیشتمانییانەی كردووەتەوە كە بە درێژایی تەمەنی پێشمەرگایەتی خەباتی بۆ كردوون، پشت ئەستوور بە ئیرادەی بەهێز و باوەڕ بەخۆبوون بە كێشەی رەوای گەلەكەی، بۆ ساتێك سڵی نەكردووە لەوەدیهاتنی خواستە نەتەوەییەكان، بۆیە هەمیشە شانازی بە پێشمەرگەبوونییەوە دەكات لە مێژووی گەلی كوردستاندا لە ئاستی نەتەوەیی، نیشتمانی و دیپلۆماتیكیشدا سەرۆك مەسعود بارزانی بە پێشمەرگەی رێگەی ئازادی و رزگاری و بەیەكەوە ژیان ناسراوە، لە ماوەی شەڕی رووبەڕووبوونەوەی تیرۆریستانی داعش، لەجیاتی جیهان راستەوخۆ سەركردایەتی شەڕی دژی تیرۆرستانی دەكرد و سەرپەرشتی و فەرماندەیی هەڵمەتەكانی پێشمەرگەی دەكرد، هەمیشە لە سەنگەرەكانی پێشەوەدا لەگەڵ پێشمەرگە قارەمانەكان دا بووە بۆ پارێزگاری و بەرز راگرتنی شكۆی خەڵكی كورستان، بە سوربوون و پێداگرییەكی رابەرانەوە لەسەر بڕیاردانی گەلی كوردستان، لە مافی چارەنووسی خۆی، وەك تەواوكارێك بۆئەركی پێشمەرگایەتی، لە رێكەوتی 25/9/2017، رێفراندۆمی بۆ سەربەخۆیی باشووری كوردستان ساز دا، لە ئەنجامدا 93% دەنگدەرانی كوردستان، بە بەڵێ دەنگیان بۆ سەربەخۆیی كوردستان دا كە بە وێستگەیەكی وەرچەرخان دادەندرێت لە مێژووی گەلی كوردستان.
هەمیشە وەك پێشمەرگەیەك پارێزەری بەیەكەوە ژیانی نەتەوەیی، ئایینی و سیاسی بووە، ئەزموونی دوورودرێژی لە دروستكردنی پردی پەیوەندی پێكەوەبوونی سەرجەم پێكهاتەكان، سەلمێنەری ئەو راستییەیە كە پێكەوەژیانی ئاشتیانە، یەكتر قبووڵكردن و لێبووردەیی لە بنەما سەرەكییەكانی كاركردنی بووە، بەسوود وەرگرتن لە كوولتوورەی رێبازی بارزانی، بێ جیاوازی داكۆكیكردووە لە مافی سەرجەم پێكهاتەكانی كوردستان، لەم پێناوەدا قوربانیی گەورەی بەخشیوە، ئێستاش دوای تەمەنێكی دوورودرێژی پڕ لە شانازی هێشتا بەردەوامە لە خەبات و تێكۆشان پێناو دەستەبەركردنی مافە نەتەوەیی و نیشتمانییەكان و پاراستنی دەسكەوتەكانی گەلی كوردستان، تاهەتایە وەك پێشمەرگە و سیمبولێك بۆكوردایەتی وسەربەخۆیی گەل وخاكی كوردستان دەمێنێتەوە، بۆیەش هەمیشە پەرۆشی یەكڕێزی و و هەڵوێستی لایەنەسیاسیەكانە، هەر لە روانگەی پاراستن و بەهێزكردنی قەوارەی دەستوریی هەرێمی كوردستان، كە بەخوێن و خەبات بەدەستهاتوون.
لە رێوڕەسمی كردنەوەی مۆزەخانەی نیشتیمانی بارزانی دا بڕیاری هەڵدانەوەی لاپەڕەیەكی نوێی لە كۆی پەیوەندییەكانی دا، تا بە كۆبوونەوە و گفتووگۆ كردن چارەسەری گرفتەكان بكرێت، ئەمەش كاریگەریەكی گرنگی هەبوو بۆ چارەسەركردنی كێشەكان و پاراستنی بەرژەوەندییە نیشتیمانییەكان، سەرەنجام لە16 ی 5ی 2023 هەردوو مەكتەبی سیاسی یەكێتی و پارتی لە سلێمانی كۆبوونەوە بەمەش كەشی برایەتی و كاری پێكەوەیی دروستكرد و كەلێنەكانی رابردوو ناهێلێت.
لە ناخەوە پیرۆزبایی پیرۆزترین پلە و پایە لە سەرۆك بارزانی دەكەین كە بۆماوەی 61 ساڵە پێشمەرگەی رێگەی ئازادی و رزگاری و بەیەكەوەژیانە لە كوردستان. خوای گەورە تەمەن درێژ و تەندروست باشی بكات بۆ كوردستان.
