^{“داهاتی مانگانەی بەڕێوەبەرایەتی هاتووچۆی سۆران 400 ملیۆن دینارە”}

پشتیوان كەریم- سۆران:

عەقید زرار حسێن، بەڕێوەبەری هاتووچۆی ئیدارەی سۆران، لە دیدارێكدا لەگەڵ هەفتەنامەی زاری كرمانجی، دەڵێت: ئەمساڵ چەند بەشێكی نوێ دەكرێنەوە، هەروەها ژمارەی ئۆتۆمبێلە تۆماركراوەكانی سنوورەكە دەخاتەڕوو.
عەقید زرار حسێن، بەڕێوەبەری هاتووچۆی ئیدارەی سۆران، دەڵێت: سیستەمی هاتووچۆ ساڵ بە ساڵ لە ئیدارەی سۆران پێش دەكەوێت، وەكو بەڕێوەبەرایەتی هاتووچۆی ئیدارەی سۆران سیستەمی نوێی ئەلیكترۆنی كاری پێ دەكەین كە وەكو هەولێر و ناوچەكانی دیكە بە ئامێری ئەلیكترۆنی مۆڵەت چاپ دەكەین و دەدەین بە هاووڵاتییان، بەڵام تاقیكردنەوەكان وەك پێشترە، هەروەها لە ئێستادا جەنجاڵی لەناو بەڕێوەبەرایەتیەكەمان نییە، ئەوەش لەبەر ئەوەیە لە ماوەی یەك هەفتەدا تاقیكردنەوەكان ئەنجام دەدرێن و دوای سێ رۆژ مۆڵەت دەدرێت بە هاووڵاتییان، هەروەها لە بەشەكانی ساڵیانەش تابلۆی نوێ دەدرێت، هاوكات لەسەر هێڵین لەگەڵ بەڕێوەبەرایەتی هاتووچۆی هەولێر كە ئەمساڵ دوو بەشی نوێ لەناو بەڕێوەبەرایەتیەكەمان زیاد بكەین وەك دەرهێنانی مۆڵەتی نێودەوڵەتی و تابلۆی ئۆتۆمبێل، لەگەڵ ساڵیانەی ئۆتۆمبێلی بارهەڵگرەكانیش، هەروەها ئامێرێكی هێڵكاریمان وەرگرتووە بۆ هێڵكاریكردنی شەقامەكانی ئیدارەی سۆران.
لەبارەی نیگەرانی هاووڵاتییان لەهەمبەر كارمەندانی پۆلیسی هاتووچۆ، عەقید زرار حسێن، ئاشكرایكرد: گلەیی هاووڵاتییان لەوەیەدایە لەكاتی سەرپێچی ژمارەی ئۆتۆمبێلەكەیان تۆماردەكرێت كەمەفرەزەكانی هاتووچۆ لێپێچینەوەیان لەگەڵ دەكەن، بەوەش گلەیی دەكەن، ئەمە لە كاتێكدایە ئەوە ئەركی پۆلیسی هاتووچۆیە كە ئیجرائاتی یاسایی لەگەڵ تەواوی ئەو شۆفێرانەی كە سەرپێچیكارن بكات، بۆ ئەوەی رووداوەكانی هاتووچۆ كەم ببنەوە، بەوەش ناچارین رۆژانە بازگە دابنێین هاووڵاتییانیش ئەگەر گلەییان هەیە راستەوخۆ دەتوانن سەردانی بەڕێوەبەرایەتیەكەمان بكەن یان پەیوەندی بكەن، لە هەمانكاتدا هەر بێڕێزیەك بەرامبەر بە شۆفێر بكرێت ئیجرائات لەگەڵ كارمەندی خۆمان دەكەین، بەوەش هاووڵاتییەكە دەتوانێت سكاڵا تۆمار بكات.
لەبارەی ئۆتۆمبێلی بێ سەرەتا، بەڕێوەبەری هاتووچۆی ئیدارەی سۆران هێمای بۆ ئەوەكرد: لەگەڵ وەزارەتی ناوخۆ لەسەر ئەم پرسە لەسەرهێڵین لە هەموو كۆڕ و كۆبوونەوەكان لەگەڵ وەزیری ناوخۆ ئەم پرسە باسكراوە و وەزیریش لە گفتوگۆدایە كە رێكارێكی گونجاو بدۆزێتەوە بۆ ئەم بابەتە، تا ئێستا هیچ شتێك نییە كە بڵێین ئەو ئۆتۆمبێلانە تۆمار دەكرێن یانا، بۆیە چاوەڕوانی وەڵامین، هاوكات وەرگرتنی ئیجرائات لەگەڵ پێشانگەكانی ئۆتۆمبێل كە ئۆتۆمبێلی بێ سەرەتا مامەڵەی پێدەكەن لە دەستهەڵاتی قایمقامەكانە كردنەوەی پێشانگە یا نوێكردنەوەی مۆڵەتی پێشانگە بەپێی رێنماییەكانی وەزارەتی ناوخۆیە كە دەرچووە بۆ پێشانگەكان وەك هاتووچۆی سۆران ناتوانین راستەوخۆ ئیجرائات لەگەڵ پێشانگەكان بكەین، بەڵام لەڕێی ئەو گرێبەستانەی كە بۆمان دێت ئەگەر بزانین پێشانگەیەك ئۆتۆمبێلی بێسەرەتا مامەڵەی پێوە دەكات لەرێی دادگا ئیجرائاتی یاسایی لەگەڵ دەكەین، هەروەها ژمارەی ئۆتۆمبێلە بێسەرەتاكان بەپێی دواین سەرژمێری ساڵی 2021 هەشت هەزار ئۆتۆمبێلی بێ سەرەتا لە سنووری بەڕێوەبەرایەتیەكەمان تۆمار كراون، بەڵام لە ئێستادا ئەو رێژەیە كەم بۆتەوە، بەڵام بۆ ئۆتۆمبێلی تۆماركراو ئامارێكی ووردمان لەبەردەست نییە، بەڵام بەنزیكەیی 80 بۆ 90 هەزار ئۆتۆمبێلی ژمارە لە ئیدارەی سۆران هەن، ئەم رێژەیەش بەپێی ئەندازەی شەقامەكان زیاترە بەو پێیەی شەقامەكان كۆنن و شەقامی نوێ كەم دروستكراوە، بۆیە شەقامەكات تەحەمولی ئەو جەنجاڵیە زۆرە ناكەن، هەوڵ هەیە شەقامی نوێ دروست بكرێت، بەمەش جەنجاڵی دروست نابێت.
لە بارەی داهاتی بەڕێوەبەرایەتی پۆلیسی هاتووچۆی ئیدارەی سۆران، عەقید زرار حسێن، گوتی: بەشێكی زۆری داهاتەكەمان وەك پێبژاردن راستەوخۆ دەچێتە سەر داهاتی بەڕێوەبەرایەتی هاتووچۆی هەولێر و داهاتی دەرهێنانی مۆڵەت و پێبژاردنی راستەوخۆ لە بەڕێوەبەرایەتیەكەمان وەردەگیرێت، مانگانە 300 تا 400 ملیۆن دینار داهات لەبەرێوەبەرایەتی هاتووچۆی سۆران دەچێتە خەزێنەی حكوومەت، هیچ لەم داهاتە بۆ بەڕێوەبەرایەتیەكەمان نییە، هەموو ئەو پڕۆژانە و داواكاریانەی هەمانە ئاراستەی وەزارەتی ناوەخۆ دەكەین لەرێگەی پەرەپێدانی هاتووچۆ و بەشێكی داهاتی سزا و پێبژاردنەكان دەخرێتە سەر پەرەپێدان بۆ تەواوی كوردستان بەپێی پێویست وەزارەتی ناوەخۆ خەرجی دەكات، ئێمە چەند پڕۆژەیەكمان هەبووە، كە بەنزیكەیی 700 ملیۆن دینار لەسەر پەرەپێدانی هاتووچۆی پارێزگاكان بۆمان خەرجكراوە كە لە ئێستادا ئەو پڕۆژانە لەبواری جێبەجێ كردندان وەك دانانی گادڕێڵ و هێڵكاری شەقامەكان و بەشێك لە پڕۆژەكانیش وەزارەتی ناوخۆ راستەوخۆ جێبەجێ دەكات.
لە دواین قسەكانیدا لەبارەی فراوانبوونی ئیدارەی سۆران، بەڕێوەبەری هاتووچۆی ئیدارەی سۆران، رایگەیاند، دوای هێنانە كایەی ئیدارەی سۆران و دروستبوونی چەند قەزا و ناحیەیەك، لە قەزای سیدەكان كە پێشتر بنكەی هاتووچۆ بوونی هەبوو داوامان لە وەزارەتی ناوخۆ كردووە دوای بوونی بەقەزا ئاستی بنكە بەرز بكرێتەوە بۆ بەش، ئەو شوێنانەی دەكرێن بە ناحیە ئەگەر بەپێویستی بزانین بنكەی هاتووچۆی لێ دەكەینەوە، داواكارم لە شۆفێران پابەندی رێنمایەكانی هاتووچۆ بن، بەهۆی وەرگرتنی ئیجرائات و دانانی كامێرا لە دوو ساڵی رابردوو رێژەی گیان لە دەستدان بە رووداوەكانی هاتووچۆ 50% كەم بۆتەوە، ئەمساڵیش تا ئێستا هیچ گیان لەدەستدانێك تۆمار نەكراوە كە بەهۆی رووداوی هاتووچۆوە بێت، ئەمە لە كاتێكدایە لە ساڵانی رابردوو25 تا30 هاووڵاتی بەرووداوی هاتووچۆ گیانیان لەدەست داوە، بەڵام ساڵ بە ساڵ رێژەكە كەم دەبێتەوە.