لە سۆران لەلایەن هاووڵاتییان و كەسانی بەرپرس زێدەڕۆیی دەكرێتە سەر موڵكی گشتی

زاری كرمانجی – سۆران:

رەجەب زوبێر، قایمقامی قەزای ناوەندی سۆران، لە دیمانەیەكی زاری كرمانجی دەڵێت: كێشەی سەرەكی سۆران زێدەڕۆییە بۆ سەر موڵكی گشتی. دەشڵێ: ئەو زێدەڕۆییانەی بوونەتە بەربەست لەبەردەم ئەنجامدانی پڕۆژە خزمەتگوزارییەكان، بەتایبەتی دروستكردنی رێگاوبانەكان هەڵدەگیرێن. گوتیشی: بابەتی تاپۆكردنی دوكانەكانی ناو بازاڕی سۆران، وایكردووە لیژنەیەك لە ئاستی ئەنجوومەنی وەزیران پێكبهێندرێت و چارەسەرێك بۆ ئەو بابەتە بدۆزنەوە، بۆ ئەوەی نە هاووڵاتی زەرەرمەندبێت نە حكوومەت.
قایمقامی قەزای ناوەندی سۆران، گوتی: لە پلانماندایە ئەو نەخشانەی دێلزیا بە تایبەت نەخشەی 25 و چەند نەخشەیەكی دیكە كە تاپۆن، خزمەتگوزاری سەرەتاییان بۆ ببەین و ڕێگاكان بكەینەوە، تا خەڵك لەو زەویانە خانوو بەشێوەیەكی یاسایی و ڕێكوپێك و لەژێر ڕێنمایی حكوومەت دروست بكات، نەك پەنا بباتە بەر زێدەڕۆیی و دواجار سیمای شاریش ناشیرین ببێت.
رەجەب زوبێر، گوتیشی: ئەوانەی زێدەڕۆییان كردۆتە سەر موڵكی گشتی، هاووڵاتی ئاسایی تێدایە، لە هەمان كات بەرپرسیش هەیە، بەڵام ئێمە وەك حكوومەت ڕێگە بەهیچ كەسێك نادەین جا لە هەر پلە و پۆستێك بێت، زێدەڕۆیی بكاتە سەر موڵكی گشتی.
قایمقامی سۆران، ناشی شارێتەوە، زێدەڕۆیی گرفتی زۆری بۆ دروست كردوون، دەشڵێت: لە جێبەجێ كردنی پڕۆژەكان و تەنانەت زۆرجار بۆ دروستكردنی قوتابخانە یا هەر باڵەخانەیەكی دیكەی حكوومی، لە گەڕەكەكان كێشەمان بۆ دروست بووە بەهۆی زێدەڕۆیی بۆ سەر موڵكی گشتی، لەگەڵ ئەوەش لە ئێستادا زێدەڕۆیی بە بەراورد بە ساڵانی پێشتر كەمبۆتەوە و دەمانەوێ لە سۆران كۆتایی بەم كارە بهێت.
رەجەب زوبێر، ئاشكراشی كرد: دوای تێپەڕبوونی وەرزی سەرماو سۆڵە، لە ئێستادا دەستكراوەتەوە بە ئەنجامدانی پڕۆژە خزمەتگوزارییەكان، ئەو زێدەڕۆییانەش كە بوونەتە بەربەست لەبەردەم ئەنجامدانی پڕۆژە خزمەتگوزارییەكان، بەتایبەتیش دروستكردنی شەقام و رێگاوبانەكان سەرجەمیان تێكدەدرێن.
دەشڵێ: پێشتر بەهۆی زێدەڕۆییەكان سستییەك لەبەردەم پڕۆژە خزمەتگوزارییەكان دروست ببوو، بەڵام هەوڵی چارەكردنیان دراوە، هەندێكیان پێویستیان بە قەربووكردنەوە هەیە، بەشێوەیەكی گشتی ناكرێت، لەبەر خانووییەك یان زێدەڕۆیەك پڕۆژەیەكی گشتی رابگیرێت.
قایمقامی قەزای ناوەندی سۆران، دەشڵێ: بەمەبەستی چارەكردنی كێشەی زبڵ و خاشاك لە سنووری ئیدارەی سەربەخۆی سۆران، كار لەسەر پڕۆژەی دانانی كارگەیەكی ریسایكلین كراوە و شوێنێكی تایبەتیشی بۆ تەرخانكراوە، بۆ دانان و جێبەجێ‌ كردنی كارگەی ریسایكلین هەوڵەكان جددین و پڕۆژەكە لە قۆناغی كۆتایدایە ئەمساڵ دەكەوێتە بواری جێبەجێكردنەوە.
رەجەب زوبێر، ئاشكراشی كرد: ئەو كوشتارگەی ئێستا هەمانە بچووكە، دەمانەوێت كوشتارگەیەكی گەورەتر و هاوچەرخ لە سۆران دروست بكەین، بۆ ئەو مەبەستە لەگەڵ وەبەرهێنەران قسەكراوە و ئەوانیش داواكاری خۆیان پێشكەش كردووە بۆ ئەوەی كوشتارگەیەكی نوێ و هاوچەرخ لە سۆران دروست بكەین، بەمەش ئەو گرفتانە چارەسەر دەبن كە ئێستا لە كوشتارگەی سۆران هەنە، بەهۆی بچووكی شوێنەكەی.
قایمقامی قەزای ناوەندی سۆران، گوتی: یەكێك لەو كێشانەی لە سۆران هەمانە ئەوەیە زۆربەی دوكانەكانی سۆران تاپۆنەكراون، كە بە چەند قۆناغێك دروستكراون، هەندێكیان پێش ساڵی ٢٠٠٠ و هەندێكیشیان دواتر دروستكراون، لە ئێستادا سەرقاڵی دیراسەكردنی ئەو بابەتەین، ئەگەر بەپێی یاساكە بێت دەبێت ئەوانە هەموویان گرێبەستیان لەگەڵ بكرێت، هەندێك لەوانە خۆیان بەحەقتر دەزانن.
رەجەب زوبێر، ئاماژەی بۆ ئەوەشكرد: لیژنەیەك لەسەر ئاستی ئەنجومەنی وەزیران پێكهاتووە، نوێنەری چەند وەزارەتێكی تێیدایە لە ئیدارەی سۆرانیش نوێنەر دیاریكراوە لەگەڵ ئەو لیژنەیە بۆ ئەوەی رێگاچارەیەكی گونجاو بۆ ئەو بابەتە بدۆزرێتەوە، نە هاووڵاتی زەرەرمەندبێت نە حكوومەت، لەگەڵ ئەوەش ئەو بابەتە بۆ كاركردن بابەتێكی قوڕسە و ئاسان نییە.
لە كۆتاییدا رەجەب زوبێر، قایمقامی قەزای ناوەندی سۆران، ڕایگەیاند: ئەمساڵ بەردی بناغەی پاركێكی مۆدێرن لە سۆران دادەنرێت، بۆ ئەمەش بەهەماهەنگی لەگەڵ ئیدارەی سۆران بیر لەوە كراوەتەوە یاریگای ناو سەنتەری سۆران، نزیك بازاڕ بكرێتە پڕۆژەیەكی گەشتیاری سەرنجڕاكێش بۆ ئەوەی خەڵك بتوانێت لەنێویدا پشوو بدات، جگە لەوەش دەكرێتە گەراجی وەستانی ئۆتۆمبێل بۆ ئەوەی جەنجاڵی ناو بازاڕ و كەمی گەراج چارەسەر بكرێت كە لەناو بازاڕی سۆران ئەو گرفتە هەیە”.