جەبار عەبدولڵا مهاجیر
بارزانی نەمر ئەو سەركردە مەزنە بوو گشت ژیانی خۆی فیدای گەل و نشتیمانی كرد، دوای دەیان داستان و نەبەردی و خۆڕاگری توانی گەلی كورد بەجیهان بناسێنێت، شانبەشانی گەلانی جیهان شۆڕشی بەرپاكرد لەدژی ئەو زوڵم و ستمكاریانەی دەرحەق بەگەلەكەی ئەنجام درا لەماوەكانی ڕابردوو، مەزنایەتی بارزانی نەمر لەوەدابوو هەمیشە دادپەروەرو خۆنەویست بووە ئامانجی سەرەكی ئازادی و بەدیهێنانی دادپەروەری بوو لەو چوارچێوە جوگرافیەی تیادا دەژین، جگە لە تایبەتمەندیەكانی لەڕووی ئاینی و پلانە سەربازیەكان مرۆڤێكی ئاین دۆست بووە لەپلانە سەربازیەكان و جەنگەكان لەڕیزی پێشەوە بووە وەكو جەنگاوەر و وەرەیێكی پۆڵاین بۆ پێشمەرگەكان، دۆستی مرۆڤایەتی بوو هەمیشە كەسایەتیێك بوو حەزی بەدانوستان و گفتوگۆ بووە ئارەزووی شەڕو خوێن ڕشتنی نەبووە، بەڕوونی داواكاریەكانی دیارو بەرچاو بوون كە داوای بەدەستهێنانی مافەڕەواكانی دەكرد بۆ نەتەوەكەی.
لەو كاتەی بارزانی دەستی كرد بەشۆڕش سەرەتا دەركەوتنێك بوو بۆگەلی كورد بۆئەوی بەجیهان بناسرێت، خاوەن ئیرادەیێكی بەهێز بوو، بەم بۆنەیەوە توانی بەزوترین كات سرنجی وڵاتان بەلای خۆیدا ڕابكێشێت بۆ نموونە یەكێتی سۆڤیەتی جاران كەپاڵپشت بوون بۆ سەرخستنی شۆڕشی بارزان و دۆستی یەكەمی بارزانی نەمر بوون، پەیوەندیەكانی شۆڕش و یەكێتی سۆڤیەت پێی هاوێشتە قۆناغێكی هەستیاروو گرنك تاوای لێ هات دەرگایان بەڕووی بارزانی نەمردا كردەوە نیەت پاكی خۆیان سەلماند بۆ گەلی كورد، ئەمەش هەڵوێستێكی گرنگ بوو بۆ شۆڕشی دووەمی بارزان تاكو بتوانن خۆیان یەك بخەن و بەهێزتر دەربكەون دژی دوژمنانی كورد، ئەمەو دەیان هەوڵدان و فیداكاری لەپێناو سەربەستی بۆ گەلی كورد، ئیستاش كردنەوەی ئەو یادگە مەزنە لە بارزان بۆ خەباتی بارزانی نەمر پڕۆژەیەكی گرنگ بوو، ئەمە دەبێتە هۆكارێك بۆزیاتر ناساندنی خەباتی ئەو مرۆڤە مەزنە.
لەلایەكی تر دەبێتە بیرەوەریێكی گرنگ بۆ نەوەكانی داهاتوو تاكو باشتر شارەزایان هەبێت دەربارەی ئەو مرۆڤانەی كەخاوەن بیرۆكەی بەهێز بوونە لەسەرخستنی دۆزی ڕەوای گەلەكەیان و چۆنیەتی خەباتكردنیان لەپێناو ئازادی، بینینی ئەو كەلوپەلانەی كەخودی بارزانی نەمر لەو سەردەمە بەكاری هێناون بۆمرۆڤ وەك ڕوحێكی بێ جەستە وان وەك بڵێین بۆدیداری ئەو تێكۆشەرە مەزنە دەچیت و لەنزیكەوە دەیبینی، دەبێ مرۆڤ چ هەستێكی بۆ دروست ببێت لەوكاتەی كەلەنزیكەوە ئەو كەلوپەلانە دەبینێت و ساڵانێك بوو لەوێنەكاندا پێیان ئاشنابووین، سەرەڕای كردنەوەی ئەو مۆزەخانەیە پێویستە بەشێك لە پەرتوكی مێژوو تایبەت بكرێت بەو یادگە نشتیمانیە و لەناوەندەكانی خوێندن گرنگی پێ بدرێت بۆزیاتر ئاشناكردنی نەوەكان بەمێژووی خەبات و ناساندنی قارەمانێكی وەكو بارزانی نەمر كەگشت تەمەنی خۆی لەپێناو گەلێكی زوڵم دیدە تەرخان كردوو هەوڵەكانی بونەهۆكاری ئازادی بۆتەواوی كورد لەكۆی جیهان نەك كوردستانی باشوور بەتەنها، ئەمڕۆ پێویستە هەموومان ڕووحیەت و دادپەروەری لەو جەنڕاڵە گەوریە وەربگرین و هەڵگری پەیامە پیرۆزەكانی ببین.
