كاریگەرترین یاریزانی ئەم وەرزەی یانەی سۆرانە

ئەگەر كاروان نەبوایە، سۆران لە پلەكانی پێشەوی ریزبەند نەدەبوو

سەردار قازی ـ سۆران:

یاریزانێكی دیاریی كوردستانە و یاریی بۆ ژمارەیەك یانەی گەورە كردووە، لەئێستادا سۆران ـی كردووەتە بە وێستگەیەكی هەرە گرنگی ژیانی وەرزشی خۆی و بەجۆرێك درەوشاوەتەوە، كە بەر لە یارییەكانی یانەكە هاندەران چاودەگێڕن تا بزانن لەكام لاوە دەرەكەوێت.
یاریزانێكی هێمن و خۆڕەوشت بەرز، ناوەڕاستكارێكی قاچ زێڕین بەجۆرێك كاریگەری تەنیوەتە سەر ئەنجامەكانی ئەم وەرزەی سۆران، كە لەدڵی هاندەراندا لەنێو باشترینەكان دایە و وەك رۆڵەیەكی شارەكە دێتە هەژمار. گەر یارییەك لەنێو پێكهاتەی سەرەكی نەبێت، دەنگی ناڕەزایەتی لەسەر پەیژەكان بەرز دەبێتەوە و پێیان وایە نەبوونی ئەو لەنێو پێكهاتەی یانەكەی پایتەختی شەهیدان وەك گەلی بێ سەركردە وایە، كاریگەرترین یاریزان لای ئەوان كاروان باپیرە.
كاروان باپیر، گەنجێكی تەمەن 28 بەهارییە لەگەڵ پەیوەندیكردنی بە یانەی سۆران، ئاهێكی ئارامی بە قورگی هاوسۆزانی سۆران خلوربووەوە، بەجۆرێك لەنێو قاچەكانی كارواندا یاریسازكردنی ئیدریس حسێن ئەستێرە مێژووییەكەی خۆیانیان دەهاتە خەیاڵ.
ئەو ناوەڕاستكارە نایاب ئاستە، ئەم وەرزە لەپاڵ رێزدار وەلی كاریگەرترین یاریزانە سۆرانە و لەریزبەندی باشترینەكانی كوردستانە.
وەك بەشێكی زۆر لەئەستێرەكانی تۆپی پێ، هەر لە منداڵییەوە ئارەزووی وەرزشكردنی چەكەرە بووە لەنێو كۆڵان ئینجا خوێندگە و تیپی میللی.
ئەمما ئەزموونی لەگەڵ یانە لە ساڵی 2009 بۆ 2010 لە تیپی تازەپێگەیشتوانی یانەی وەرزشی پێشمەرگەی سلێمانی بووە.
لە تەمەنێكی كەمدا خاوەنی ئەزموونێكی دوور و درێژە، بەشداری كۆمەڵێك خولی پێگەیاندن و راهێنانی كردووە، جیاواز لەوەی لەگەڵ 9 یانەی هەرێم ئەزموونی یاریی كردنی هەیە، كە پێكهاتوون لە(پێشمەرگەی سلێمانی، پیرەمەگروون، ئاشتی، سیروانی نوێ، نەورۆز، خەڵاتی، پێنجوێن، چوارقوڕنە، رانیە و سۆران). جگە لە تۆپی پێ تێنسی سەر زەوی ـشی كردووە و یاریزانێكی لێهاتووی ئەم یارییەیە.
سەبارەت بە بڕوانامەوە كاروان دەڵێت، كە تەنها بڕوانامەی سەرەتایی هەیە و خۆشەویستی و سۆزی لە رادەبەدەر بۆ وەرزش بواری بەردەوامیدان بەخوێندنی بۆ نەهێشتووەتەوە.
كاروان، لەمنداڵییەوە هەستێكی بەبوونی بەهرەیەك كردووە لەخۆیدا، پەرەی بەم بەهرەیە داوە تا گەیشتووەتە ئەو ئاستەی ئێستا، گۆڵكاری یانەی سۆرانە لەخولی یانە نایابەكانی كوردستان.
لەم وەرزە كاروان بەشداری 22 یاریی كردووە، توانیویەتی 6 گۆڵ تۆمار بكات و 5 ئاسیست بدات بە هاوڕێكانی، واتا بەشداری 11 گۆڵی یانەی سۆرانی كردووە.
لەكاتێكدا یانەكە لەم وەرزە 30 گۆڵی تۆماركردووە. زۆرینەی گۆڵەكانی كاروان لە كاتی هەستیار و بەرانبەر ركابەرە سەختەكانی یانەكە بوونە.
لای كاروان كریستیانۆ رۆناڵدۆ، باشترینی مێژووی تۆپی پێیە و دەڵێت، “لەكوردستان یاریزانی زۆر باش هەن بەس كەسم بە دیاری كراوی نەكردووەتە پێشەنگ.”
دەربارەی باشترین راهێنەر ـیش ئاماژه بەوە دەدات: ” تۆزێك قورسە وەڵام دانەوەی لەبەر ئەوەی ئێمە زۆرێك هەن نەمان بینیون،
بەڵام ئەوەندەی بینبێتمان و ئاگادار بین
پێم وایە كاپتن سەمیر بابۆ و مامۆستا رەفیق باشترینن. لەنێو یاریزانەكانیشدا
وەكو یاریزانیش لەئێستادا ئاسۆ رۆستەم پێشەنگە.”
كاروان كەوتە نێو گفتوگۆ و بەردەوامی بەئاخاوتنەكانی دەدات: “هەوڵم داوە رێنوێنی تازە پێگەیشتووان بكەم بۆ ئەوەی قوڵتر بێنە نێو جیهانی وەرزشی، بە شێوەیەكی بەردەوام ئەوەندەی بۆمان كرابێت و لێمان زانیبێت رێوێنی یاریزان و خەڵكی ئاسایمان كردووە بۆ رووكردنە وەرزش، بێگومان هاندانی تازەپێگەیشتوان كارێكی گرینگ و زۆر پێویستە، چونكە ئەوان داهاتووی كۆمەڵگەن پێویستە هانبدرێن و پشتگیری تەواو بكرێن.”
دەشڵێت: “وەك هەر یاریزانێك خەونمە یاریی بۆ هەڵبژاردەی كوردستان بكەم. وەرزش بۆمن حەزە و بووەتە مایەی بژێوی ژیانیش.”
دەبێت فاكتەری بەردەوامبوونی ئەو ناوەڕاستكارە نەرم و نیانە چی بێت، لەنێو جەنجاڵی پڕ تەگەری ژیاندا. كاروان وەڵام دەداتەوە و دەڵێت: “زۆر كەس پاڵپشتیان كردووم بۆ پێشڤەچوونی حەزەكەم، بەڵام گرینگترینیان خۆم بووم حەزی خۆم نەبوایە بەردەوام نەدەبووم. ناتوانم پەنجە بۆ هیچ كەسێكی دیاریكراو رابكشێم بەوەی وەك پشتەڤانێكی هەمیشەییم وەسفی بكەم.”
ئاشقی تۆپی پێی سەماكارانی سامبا و یانەی ریال مەدریدە.
كاتێك هاتینە سەر باسی دۆخی وەرزش لە هەرێمی كوردستن ئاهێكی هەڵكێشا و گووتی: ” زەمینەسازی باش نەكراوە بۆ ئەوانەی وەرزش دەكەن زۆر كەسیش بەو هۆكارە دووردەكەونەوە، هیوادارین داهاتوو لایەنی پەیوەست زەمینەیەكی لەبار بڕەخسێنێت، چوون وەرزش ناسنامەی گەلانە.”
پێشی وایە، ژمارەی یاریزانان زیاد بووە بە هۆكاری پێشڤەچوونی ئاستی رۆشنبیری وەرزشی و هەموو ئەو هۆكارانەی كە وادەكەن وەرزشوانی ئاست بەرز دروست بێت. تۆپی پێ لای من واتا ژیان، ئاشتی، خۆشەویستی، رێزگرتن و یەكتر قبوڵكردن.
دوا پەیڤی كاروان تایبەتە بە یانەكەی: “یانەی سۆران لای من زۆر تایبەتە و باشترین و خۆشترین كاتی وەرزشیم لێرە بەڕێدەكەم.”