موڕشید برادۆستی – سیدەكان:
كابینەی نۆیەمی حكوومەتی هەرێمی كوردستان، ژمارەیەك پڕۆژەی گرنگ و ستراتیژی لە قەزای سیدەكانی سەر بە ئیدارەی سەربەخۆی سۆران وەگەڕخستووە، قایمقامی قەزاكەش دەڵێت، بە تەواو كردنی ئەو پڕۆژانە ئاستی ئاوەدانی دەڤەرەكەمان دەچێتە قۆناغێكی دیكەوە.
ئیسحان چەلەبی، قایمقامی قەزای سیدەكان بەوەكالەت، بە زاری كرمانجی راگەیاند:” ژمارەیەك پڕۆژەی گرنگی رێگەوبان لە سنووری قەزای سیدەكان دەست بەجێبەجێ كردنییان كراوە، كە پێكهاتوون لە پڕۆژەی رێگەی دۆڵی زەرزێ، رێگەی گەلی شێخزدان، رێگەی گەلی لێتان، درێژای ئەو رێگایانە 32 كیلۆمەترە و بە گوژمەی زیاتر لە چوار ملیار دینار بە ئەنجام دەگەیندرێن و قیڕتاو دەكرێن، بڕیار وایە، تا پێش وەرزی زستانیش، كۆتایی بەم پڕۆژانە بێت و بە ڕووی هاووڵاتییاندا بكرێتەوە، چەندین گوندی دەڤەرەكەمان سودی لێ دەبینن و ئاسانكاری بۆ دانیشتوانانی گوندەكان دروست دەبێت.
قایمقامی قەزای سیدەكان بەوەكالەت، ئاشكراشی كرد:” پڕۆژەی نەخۆشخانەی 25 تەختی سیدەكانیش كاركردنی تێدا بەردەوامە و 75%ی كارەكانی بەكۆتا هاتووە، گوژمەی ئەو پڕۆژەیەش نزیكەی سێ ملیار دینارە، هەروەها ڕەزامەندەی بۆ چاككردنەوە و نۆژەن كردنەوەی رێگەی سیدەكان – دەشتی هێرت وەرگیراوە، بە گوژمەی 100 ملیۆن دینار لەلایەن بەڕێوەبەرایەتی چاككردنەوە و پاراستنی رێگە و بانی سۆران دەست بەجێبەجێ كردنی دەكرێت.
چەلەبی، ئاماژەشی بەوەدا:” رەزامەندی دروست كردنی باڵەخانەی بانكی سیدەكان بە گوژمەی 978 ملیۆن دینار دەرچووە و لە داهاتووەكی نزیك بەردی بناغەی دووبارە دادەندرێتەوە و بەڵێندەر دەست بە كارەكانی دەكات.
هەرچی بۆ پلانی ئەمساڵی 2023یە، بە گووتەی قایمقامی قەزای سیدەكان، دەرخەستە بۆ چەند گەڕەك و كۆڵانێكی سیدەكان كراوە، دەڵێت:” بە گوژمەی یەك ملیار و 200 ملیۆن دینار وابڕیارە پڕۆژە بۆ سەنتەری قەزا جێبەجێ بكرێن، بەشێك لە پڕۆژەكان قیڕتاوكردنە و هەروەها دروست كردنی ئاوەڕۆی سندووقی، جیا لەمەش پاركێك لە سەنتەری سیدەكان لەسەر ڕووبەری سێ هەزار مەتر چوارگۆشە دروست دەكرێت، بە تەواو بوونی ئەو پڕۆژانەش، ئاستی ئاوەدانی و پێشكەوتنی سیدەكان دەچێتە قۆناغێكی نوێیەوە، هیوادارین بتوانین بە شێوەیەكی باش خزمەتی سیدەكان بكەین”.
